ແຂ່ງຂັນຮ້ອງເພງຈີນຄັ້ງທີ 2 ພາຍໃຕ້ຫົວຂໍ້ໜຶ່ງແລວ ໜຶ່ງເສັ້ນທາງ ໃຫ້ສຽງດົນຕີປະສານຫົວໃຈ

ສູນວັດທະນະທຳຈີນ ປະຈຳ ສປປ ລາວຮ່ວມກັບ ສູນຄວບຄຸມບັນຊາການທາງລົດໄຟລາວ-ຈີນ ນະຄອນຫຼວງວຽງຈັນ, ສູນຄຸ້ມຄອງ ແລະ ບຳລຸງຮັກສາທາງລົດໄຟລາວ-ຈີນ ຫຼວງພະບາງ, ໂຮງຮຽນລຽວໂຕວນະຄອນຫຼວງວຽງຈັນ, ຄະນະອັກສອນສາດ ມະຫາວິທະຍາໄລແຫ່ງຊາດໄດ້ສໍາເລັດການຈັດກິດຈະກຳແຂ່ງຂັນຮ້ອງເພງພາສາຈີນຄັ້ງທີ 2 ພາຍໃຕ້ຫົວຂໍ້ ໜຶ່ງແລວ ໜຶ່ງເສັ້ນທາງ ໃຫ້ສຽງດົນຕີປະສານຫົວໃຈ ຮອບຊີງຊະນະເລີດ ຂຶ້ນໃນວັນທີ 29 ພະຈິກ ນີ້ ທີ່ສູນດັ່ງກ່າວ. 
ສຳລັບລາງວັນທີ 1 ຈາກການແຂ່ງຂັນຮ້ອງເພງພາສາຈີນແມ່ນ ນາງ ມະນີຢາດຟ້າ ຈັນທະວົງ ທີ່ໄດ້ນໍາເອົາບົດເພງ ມືຂ້າງຊ້າຍເອື້ອມດວງຈັນ ເຂົ້າແຂ່ງຂັນໄດ້ຮັບເງິນສົດ 15 ລ້ານກີບ, ລາງວັນທີ 2 ມີ 2 ລາງວັນ ລາງວັນລະ 7 ລ້ານກີບ, ລາງວັນທີ 3 ມີ 3 ລາງວັນ, ລາງວັນລະ 3 ລ້ານກີບ, ລາງວັນຊົມເຊີຍມີ 9 ລາງວັນລາງວັນລະໜຶ່ງລ້ານກີບ ນອກນັ້ນຍັງມີລາງວັນຂວັນໃຈສື່ມວນຊົນ1 ລາງວັນຈະໄດ້ຮັບໂທລະສັບໜຶ່ງໜ່ວຍ.
ທ່ານ ນາງ ຫຼີຢີ່ຜິງ ຫົວໜ້າສູນວັດທະນະທໍາຈີນໄດ້ກ່າວວ່າ: ຈຸດປະສົງຂອງກິດຈະກໍາໃນຄັ້ງນີ້ເພື່ອສ້າງເວທີ ໂອກາດໃຫ້ກັບປະຊາຊົນລາວ ແລະ ເປັນການແລກປ່ຽນມິດຕະພາບລະຫວ່າງສອງຊາດ ລາວ-ຈີນ ຈີນ-ລາວ, ເນື່ອງໃນຄົບຮອບ 10 ປີຂອງການສະເໜີ ໜຶ່ງແລວ ໜຶ່ງເສັ້ນທາງ ຂອງທ່ານ ສີຈີ້ນຜິງ ປະທານປະເທດ ສປ ຈີນ; ສູນວັດທະນະທໍາຈີນ ກໍໄດ້ຈັດເວທີການແຂ່ງຂັນຮ້ອງເພງຈີນຂຶ້ນ ພາຍໃຕ້ຫົວຂໍ້ ໜຶ່ງແລວ ໜຶ່ງເສັ້ນທາງ ໃຫ້ສຽງດົນຕີປະສານຫົວໃຈ; ໂດຍຫວັງວ່າຜ່ານກິດຈະກໍາຄັ້ງນີ້ ລາວ ແລະ ຈີນ ຈະມີການແລກປ່ຽນວັດທະນະທໍາຫຼາຍຍິ່ງໆຂຶ້ນ. ສູນວັດທະນະທໍາຈີນ ແມ່ນມີໜ້າທີ່ຄື ເປັນປະຕູໃຫ້ປະຊາຊົນລາວໄດ້ສໍາຜັດກັບວັດທະນະທໍາຂອງຈີນ ຫວັງວ່າຜ່ານກິດຈະກໍາຄັ້ງນີ້ ໃນອະນາຄົດຕໍ່ໄປສູນວັດທະນະທໍາຈີນຈະເປັນຊ່ອງທາງໜຶ່ງເພື່ອໃຫ້ປະຊາຊົນລາວໄດ້ມີໂອກາດມາຍົກລະດັບພາສາຈີນ ແລະ ເຂົ້າໃຈໃນວັດທະນະທໍາຈີນຫຼາຍຂຶ້ນ ຊຶ່ງຜູ້ເຂົ້າແຂ່ງຂັັນ ເຫັນວ່າແຕ່ລະຄົນມີຄວາມຕັ້ງໃຈ ມີມາດຕະຖານທີ່ສູງ ເນື່ອງຈາກວ່າກິດຈະກໍາໃນຄັ້ງນີ້ແມ່ນໄດ້ຄັດເລືອກຕັ້ງແຕ່ຮອບທໍາອິດມີ 130 ຄົນ ຄັດມາຈົນມີຜູ້ເຂົ້າຮອບ 15 ຄົນສຸດທ້າຍ  ໃນນີ້ສໍາລັບ 15 ຄົນ ແມ່ນເປັນບຸກຄົນໃນການແລກປ່ຽນວັດທະນະທໍາ, ທາງສູນຈະສືບຕໍ່ໃຫ້ກັບຜູ້ເຂົ້າແຂ່ງຂັນໃນຮອບ 15 ຄົນ ໄດ້ໂອກາດໃນການສະແດງຮ່ວມກັບສິນລະປິນຈາກ ສປ ຈີນໃນອະນາຄົດ ຊຶ່ງໃນປີ 2024 ສູນວັດທະນະທໍາຈີນ ມີແຜນຈະເຊີນຊ່ຽວຊານການຮ້ອງເພງມາຮ່ວມຝຶກອົບຮົມໃນ ສປປ ລາວ ເພື່ອໃຫ້ນັກແຂ່ງຂັນ ໄດ້ຮັບໂອກາດບຸລິມະສິດໃນການຝຶກອົບຮົມ ເພື່ອຍົກລະດັບດ້ານການຮ້ອງເພງ ແລະ ພາສາຈີນ.
ຂ່າວ-ພາບ: ຍຸພິນທອງ