ນີ້ບໍ່ພຽງແຕ່ແມ່ນກິດຈະກຳການຕ່າງປະເທດລະດັບສູງຂອງພັກ ແລະ ລັດຫວຽດນາມ ເທົ່ານັ້ນ, ແຕ່ຫາກຍັງແມ່ນສານທາງການເມືອງອັນເລິກເຊິ່ງ ກ່ຽວກັບແນວທາງການຕ່າງປະເທດຂອງຫວຽດນາມ. ພາຍຫຼັງກອງປະຊຸມໃຫຍ່ຄັ້ງທີ XIV ຂອງພັກ: ເອກະລາດ, ເປັນເຈົ້າຕົນເອງ, ສັນຕິພາບ, ມິດຕະພາບ, ການຮ່ວມມື ແລະ ການພັດທະນາ; ຫຼາຍຝ່າຍ, ຫຼາຍຮູບແບບໃນການພົວພັນຕ່າງປະເທດ; ເປັນເພື່ອນ, ເປັນຄູ່ຮ່ວມມືທີ່ໄວ້ວາງໃຈໄດ້ ແລະ ເປັນສະມາຊິກທີ່ຫ້າວຫັນ, ມີຄວາມຮັບຜິດຊອບຂອງປະຊາຄົມສາກົນ.
ການເດີນທາງໄປປະຕິບັດພາລະກິດຄັ້ງນີ້, ດຳເນີນຂຶ້ນໃນພື້ນທີ່ພູມີສາດການເມືອງຂອງອາຊີຕາເວັນອອກສ່ຽງໃຕ້ (ອາຊຽນ) ຊຶ່ງແມ່ນພາກພື້ນແຫ່ງສາຍຄາຮ່ວມຂອງປະຊາຄົມອາຊຽນ ແລະ ເປັນໜຶ່ງໃນບັນດາສູນກາງການເຕີບໂຕທີ່ມີພະລັງຂັບເຄື່ອນສູງທີ່ສຸດຂອງໂລກ. ສຳລັບຫວຽດນາມ, ອາຊຽນ ຍາມໃດກໍຄົງມີຖານະເປັນບຸລິມະສິດທາງຍຸດທະສາດ ໃນນະໂຍບາຍການຕ່າງປະເທດ. ການທີ່ຜູ້ນຳສູງສຸດຂອງພັກກອມມູນິດ ຫວຽດນາມ ໄດ້ຢ້ຽມຢາມບັນດາຄູ່ຮ່ວມມືສຳຄັນໃນອາຊຽນ ແລະ ເຂົ້າຮ່ວມເວທີດ້ານຄວາມໝັ້ນຄົງຊັ້ນນຳ ຂອງພາກພື້ນ ໄດ້ສະແດງໃຫ້ເຫັນວິໄສທັດທີ່ສອດຄ່ອງທີ່ສຸດ: ຢາກປະກອບສ່ວນສ້າງສາອາຊີຕາເວັນອອກສ່ຽງໃຕ້ ໃຫ້ເປັນພາກພື້ນແຫ່ງສັນຕິພາບ, ສະຖຽນລະພາບ, ເພິ່ງຕົນເອງ, ສາມັກຄີ, ມີສຽງເວົ້າ ແລະ ບົດບາດນັບມື້ສູງຂຶ້ນ ໃນໂຄງປະກອບພາກພື້ນທີ່ກຳລັງກໍ່ຮ່າງສ້າງຕົວຂຶ້ນ.
ກ່ອນອື່ນໝົດ, ການຢ້ຽມຢາມຄັ້ງນີ້ ໄດ້ຢືນຢັນຢ່າງແຂງແຮງເຖິງການໃຫ້ຄວາມສຳຄັນຂອງ ຫວຽດນາມ ຕໍ່ສາຍພົວພັນເພື່ອນບ້ານມິດຕະພາບ ແລະ ການຮ່ວມມືຮອບດ້ານກັບປະເທດໄທ. ຫວຽດນາມ ແລະ ໄທ ແມ່ນສອງເສດຖະກິດສຳຄັນໃນອາຊຽນ, ມີຫຼາຍຈຸດຄ້າຍຄືກັນທາງດ້ານວັດທະນະທຳ, ປະຫວັດສາດ ແລະ ໂຄງສ້າງການພັດທະນາ. ພ້ອມທັງມີຄວາມສາມາດຊ່ວຍເຫຼືອສົ່ງເສີມ ຊຶ່ງກັນ ແລະ ກັນ ດ້ານການຄ້າ, ການລົງທຶນ, ກະສິກຳ, ການທ່ອງທ່ຽວ, ໂລຈິສຕິກ, ການຫັນປ່ຽນດີຈີຕອນ ແລະ ການພັດທະນາສີຂຽວ. ສາຍພົວພັນ ຫວຽດນາມ - ໄທ ໄດ້ຖືກຍົກລະດັບຂຶ້ນເປັນ “ຄູ່ຮ່ວມມືຍຸດທະສາດຮອບດ້ານ” ໃນປີ 2025, ສ້າງຂອບການເມືອງໃໝ່ໃຫ້ສອງປະເທດ ນຳການຮ່ວມມືເຂົ້າສູ່ລວງເລິກ ແລະ ແທດຈິງ.
ຄວາມໝາຍຂອງໄລຍະການຢ້ຽມຢາມໄທ ບໍ່ພຽງແຕ່ເປັນການເສີມສ້າງຄວາມໄວ້ເນື້ອເຊື່ອໃຈທາງການເມືອງເທົ່ານັ້ນ, ແຕ່ຫາກຍັງໄດ້ມີການກຳນົດຮູບແບບບັນດາພື້ນທີ່ການຮ່ວມມືໃໝ່ ລະຫວ່າງ ສອງເສດຖະກິດທີ່ມີອິດທິພົນໃຫຍ່ໃນອະນຸພາກພື້ນແມ່ນ້ຳຂອງ ແລະ ອາຊຽນ. ໃນຂະນະທີ່ຕ່ອງໂສ້ອຸປະທານຂອງພາກພື້ນກຳລັງໄດ້ຮັບການປັບໂຄງສ້າງໃໝ່. ໃນຂະນະທີ່ຄວາມໝັ້ນຄົງດ້ານອາຫານ, ພະລັງງານ, ແຫຼ່ງນ້ຳ ແລະ ການປ່ຽນແປງດິນຟ້າອາກາດ ກາຍເປັນບັນຫາທີ່ມີຊີວິດຊີວາ, ຫວຽດນາມ ແລະ ໄທ ຈຶ່ງມີເງື່ອນໄຂທີ່ຈະຮ່ວມກັນສົ່ງເສີມບົດບາດນຳພາໃນການຮ່ວມມືອະນຸພາກພື້ນ, ການເຊື່ອມໂຍງໂຄງລ່າງພື້ນຖານ, ການຮັບປະກັນວິຖີຊີວິດທີ່ຍືນຍົງໃຫ້ແກ່ປະຊາຊົນ. ໃນນັ້ນ, ມີປະຊາຊົນບັນດາປະເທດເຂດລຸ່ມແມ່ນ້ຳຂອງ, ລວມທັງ ສປປ ລາວ.
ສຳລັບສິງກະໂປ, ການຢ້ຽມຢາມຄັ້ງນີ້ ມີຄວາມໝາຍແຫ່ງບາດກ້າວປ່ຽນແປງໄປສູ່ຄຸນນະພາບ ໃນສາຍພົວພັນສອງປະເທດ.
ການຢ້ຽມຢາມສິງກະໂປ ຢ່າງເປັນທາງການຂອງສະຫາຍ ໂຕ ເລິມ, ໃນເດືອນມີນາ 2025 ໄດ້ກາຍເປັນຂີດໝາຍປະຫວັດສາດ, ເມື່ອສອງປະເທດ ໄດ້ຍົກລະດັບສາຍພົວພັນຂຶ້ນເປັນ “ຄູ່ຮ່ວມມືຍຸດທະສາດຮອບດ້ານ”, ເປັນການເປີດແຮງຂັບເຄື່ອນໃໝ່ ໃນການຮ່ວມມືດ້ານເສດຖະກິດດີຈີຕອນ, ເສດຖະກິດສີຂຽວ, ການເງິນ, ນະວັດຕະກຳ, ການສຶກສາ-ຝຶກອົບຮົມ, ຄວາມໝັ້ນຄົງ ແລະ ການບໍລິຫານຈັດການນະຄອນ.
ສິງກະໂປ ແມ່ນໜຶ່ງໃນສູນກາງຊັ້ນນຳຂອງອາຊີດ້ານການເງິນ, ເຕັກໂນໂລຊີ, ໂລຈິສຕິກ ແລະ ການບໍລິຫານຈັດການສະໄໝໃໝ່. ຂະນະທີ່ຫວຽດນາມແມ່ນເສດຖະກິດທີ່ກຳລັງພັດທະນາຢ່າງມີພະລັງ, ມີຕະຫຼາດກວ້າງຂວາງ, ມີກຳລັງແຮງງານໜຸ່ມ ແລະ ມີຄວາມມຸ່ງຫວັງກ້າວຂຶ້ນຢ່າງແຂງແຮງ. ການປະສານສົມທົບລະຫວ່າງປະສົບການ, ທຶນຮອນ, ເຕັກໂນໂລຊີ ແລະ ການບໍລິຫານຈັດການຂອງສິງກະໂປ ກັບ ສັກຍະພາບ ພັດທະນາຂອງຫວຽດນາມ ໄດ້ສ້າງພື້ນຖານການຮ່ວມມືທີ່ມີອະນາຄົດສົດໃສ ແລະ ເຕັມໄປດ້ວຍຄວາມມຸ່ງຫວັງທີ່ດີ.
ຈຸດທີ່ໜ້າສັງເກດ ກໍຄືສາຍພົວພັນ ຫວຽດນາມ-ສິງກະໂປ ບໍ່ພຽງແຕ່ພັດທະນາຢູ່ໃນຂອບເຂດສອງຝ່າຍເທົ່ານັ້ນ, ແຕ່ຫາກຍັງມີພະລັງແຜ່ຂະຫຍາຍໃນລະດັບພາກພື້ນອີກດ້ວຍ. ບັນດາເຂດອຸດສາຫະກຳ ຫວຽດນາມ-ສິງກະໂປ ໃນຫຼາຍປີຜ່ານມາ, ໄດ້ກາຍເປັນສັນຍາລັກຂອງການຮ່ວມມືທີ່ມີປະສິດທິຜົນ, ເຊື່ອມໂຍງການລົງທຶນເຂົ້າກັບການພັດທະນາທ້ອງຖິ່ນ, ສ້າງວຽກເຮັດງານທຳ, ຖ່າຍທອດເຕັກໂນໂລຊີ ແລະ ຊຸກຍູ້ຂະບວນການອຸດ ສາຫະກຳ.
ໃນໄລຍະໃໝ່, ສອງປະເທດ ສາມາດຂະຫຍາຍຮູບແບບນີ້ ໄປສູ່ເຂດອຸດສາຫະກຳສີຂຽວ, ນະຄອນອັດສະລິຍະ, ສູນຂໍ້ມູນ, ພະລັງງານສະອາດ, ການເງິນສີຂຽວ ແລະ ການຝຶກອົບຮົມແຫຼ່ງກຳລັງຄົນຄຸນນະພາບສູງ. ນັ້ນແມ່ນບັນດາຂົງເຂດທີ່ສອດຄ່ອງກັບແນວທາງ ແຫ່ງການພັດທະນາຂອງຫວຽດນາມ ພາຍຫຼັງກອງປະຊຸມໃຫຍ່ຄັ້ງທີ XIV: ເຕີບໂຕໄວແຕ່ຍືນຍົງ; ພັດທະນາບົນພື້ນຖານວິທະຍາສາດ-ເຕັກໂນໂລຊີ, ນະວັດຕະກຳ, ການຫັນປ່ຽນດີຈີຕອນ ແລະ ການເຊື່ອມໂຍງສາກົນຢ່າງເລິກເຊິ່ງ.
ສຳລັບຟີລິບປິນ, ການຢ້ຽມຢາມຄັ້ງນີ້ ສະແດງເຖິງວິໄສທັດອັນກວ້າງໄກຂອງຫວຽດນາມ ຕໍ່ຄູ່ຮ່ວມມືທາງທະເລທີ່ສຳຄັນໃນອາຊຽນ. ຫວຽດນາມ ແລະ ຟີລິບປິນ ຕ່າງກໍມີຜົນປະໂຫຍດພື້ນຖານຮ່ວມກັນ ໃນການຮັກສາສັນຕິພາບ, ສະຖຽນລະພາບ, ຄວາມໝັ້ນຄົງ, ຄວາມປອດໄພ, ເສລີພາບໃນການເດີນເຮືອ ແລະ ການບິນຢູ່ທະເລຕາເວັນອອກ. ຊຸກຍູ້ການແກ້ໄຂຂໍ້ພິພາດດ້ວຍມາດຕະການສັນຕິວິທີ, ສອດຄ່ອງກັບກົດໝາຍສາກົນ ໂດຍສະເພາະແມ່ນອະນຸສັນຍາສະຫະປະຊາຊາດ ວ່າດ້ວຍກົດໝາຍທະເລ ປີ 1982.
ພ້ອມກັນນັ້ນ, ສອງປະເທດ ຍັງມີພື້ນທີ່ການຮ່ວມມືອັນກວ້າງຂວາງໃນດ້ານກະສິກຳ, ການຄ້າເຂົ້າສານ, ສິນໃນນ້ຳ, ການສຶກສາ, ການຫັນປ່ຽນດີຈີຕອນ, ການຮັບມືໄພພິບັດ, ການແລກປ່ຽນປະຊາຊົນ ແລະ ການຮ່ວມມືໃນອາຊຽນ.
ໃນສະພາບການທີ່ຟີລິບປິນ ດຳລົງບົດບາດເປັນປະທານອາຊຽນ ໃນປີ 2026, ການເພີ່ມທະວີການພົບປະລະດັບສູງ ລະຫວ່າງ ຫວຽດນາມ-ຟີລິບປິນ ຍິ່ງມີຄວາມໝາຍອັນແທ້ຈິງ. ຫວຽດນາມ ສະໜັບສະໜູນບົດບາດປະທານອາຊຽນຂອງຟີລິບປິນ, ພ້ອມທັງປາຖະໜາຈະຮ່ວມກັບບັນດາປະເທດສະມາຊິກເສີມສ້າງຄວາມສາມັກຄີພາຍໃນກຸ່ມ, ຮັກສາຢ່າງໝັ້ນຄົງບົດບາດແກນກາງຂອງອາຊຽນ, ຊຸກຍູ້ການສ້າງປະຊາຄົມອາຊຽນ ເພິ່ງຕົນເອງ, ກວມລວມ ແລະ ປັບຕົວເຂົ້າກັບສະພາບການຫັນປ່ຽນ.
ສຳລັບປະເທດລາວ ຊຶ່ງຍາມໃດກໍໃຫ້ຄວາມສຳຄັນຕໍ່ຄວາມສາມັກຄີພາຍໃນອາຊຽນ ແລະ ການຮ່ວມມືອະນຸພາກພື້ນ, ເອກະສານດັ່ງກ່າວມີຄວາມໝາຍໃກ້ຊິດຕິດແທດ: ອາຊຽນທີ່ແຂງແຮງ ແມ່ນເງື່ອນໄຂສຳຄັນ ໃຫ້ແຕ່ລະປະເທດສະມາຊິກ, ບໍ່ວ່າໃຫຍ່ ຫຼື ນ້ອຍ, ລ້ວນແຕ່ມີສະພາບແວດລ້ອມແຫ່ງສັນຕິພາບ, ສະຖຽນ ລະພາບ ແລະ ໂອກາດໃນການພັດທະນາ.
ຈຸດເນັ້ນທີ່ມີຂະໜາດຄວາມສຳຄັນລະດັບພາກພື້ນ ແລະ ສາກົນ ກໍຄືທີ່ ສະຫາຍ ໂຕ ເລິມ ເລຂາທິການໃຫຍ່ ໄດ້ກ່າວປາໄສ ໃນເວທີສົນທະນາ Shangri-La ທີ່ສິງກະໂປ.
ນີ້ແມ່ນເວທີດ້ານຄວາມໝັ້ນຄົງ-ປ້ອງກັນຊາດຊັ້ນນຳຂອງອາຊີ, ເປັນບ່ອນໂຮມຊຸມນຸມຂອງບັນດາຜູ້ນຳ, ລັດຖະມົນຕີກະຊວງປ້ອງກັນປະເທດ, ນັກຊ່ຽວຊານດ້ານຍຸດທະສາດ ແລະ ບັນດາຜູ້ກຳນົດນະໂຍບາຍ ເພື່ອປຶກສາຫາລືບັນດາບັນຫາຄວາມໝັ້ນຄົງອັນຮີບດ່ວນຂອງພາກພື້ນ. IISS ໄດ້ບັນຍາຍເວທີສົນທະນາ Shangri-La ວ່າ: ແມ່ນກອງປະຊຸມດ້ານປ້ອງກັນຊາດຊັ້ນນຳຂອງອາຊີ, ເປັນບ່ອນທີ່ບັນດາລັດຖະມົນຕີປຶກສາຫາລືບັນດາສິ່ງທ້າທາຍດ້ານຄວາມໝັ້ນຄົງ ແລະ ດຳເນີນການພົບປະສອງຝ່າຍທີ່ສຳຄັນ.
ການທີ່ຜູ້ນຳສູງສຸດຂອງຫວຽດນາມ ກ່າວບົດປາໄສໃນເວທີດັ່ງກ່າວ, ໄດ້ສະແດງໃຫ້ເຫັນກຽດສັກສີ, ຖານະບົດບາດ ແລະ ຄວາມຮັບຜິດຊອບນັບມື້ສູງເດັ່ນຂຶ້ນຂອງຫວຽດນາມ ໃນບັນດາບັນຫາພາກພື້ນ ແລະ ໂລກ. ບົດລາຍງານຂອງຫວຽດນາມ ທີ່ Shangri-La ບໍ່ໄດ້ມຸ່ງສ້າງການປະເຊີນໜ້າ, ບໍ່ໄດ້ຢືນຢູ່ຝ່າຍໜຶ່ງເພື່ອຕໍ່ຕ້ານອີກຝ່າຍໜຶ່ງ, ແຕ່ຫາກຢຶດໝັ້ນຈຸດຢືນແຫ່ງການສ້າງຄວາມໄວ້ເນື້ອເຊື່ອໃຈ, ເຄົາລົບກົດໝາຍສາກົນ, ແກ້ໄຂຄວາມແຕກຕ່າງດ້ວຍມາດຕະການສັນຕິວິທີ, ເພີ່ມທະວີການຮ່ວມມືເພື່ອຈັດການບັນດາສິ່ງທ້າທາຍຮ່ວມ.
ນັ້ນກໍແມ່ນຈິດໃຈຫຼັກທີ່ສອດຫ້ອຍຢູ່ໃນແນວທາງການຕ່າງປະເທດຂອງຫວຽດນາມ: ເອກະລາດ ແລະ ເປັນເຈົ້າຕົນເອງ ແຕ່ບໍ່ໂດດດ່ຽວ; ເຊື່ອມໂຍງສາກົນຢ່າງເລິກເຊິ່ງ ແຕ່ບໍ່ໃຫ້ເສຍສັກສີ ແລະ ຜົນປະໂຫຍດແຫ່ງຊາດ-ປະຊາຊາດ; ຮ່ວມມືກັບທຸກຄູ່ຮ່ວມມື ບົນພື້ນຖານຄວາມສະເໝີພາບ, ເຄົາລົບຊຶ່ງກັນ ແລະ ກັນ, ຕ່າງຝ່າຍຕ່າງມີຜົນປະໂຫຍດ.
ຄໍາເຫັນ