ແຂວງວຽງຈັນຕ້ອນຮັບຄະນະຜູ້ແທນຂັ້ນສູງພັກກອມມູນິດຍີ່ປຸ່ນ

ວັນທີ24ທັນວານີ້ທີ່ໂຮງແຮມອິນທິຣາເມືອງວັງວຽງແຂວງວຽງຈັນໄດ້ຈັດພິທີຕ້ອນຮັບຄະນະຜູ້ແທນຂັ້ນສູງພັກກອມມູນິດຍີ່ປຸ່ນຊຶ່ງນຳໂດຍທ່ານຊິອິຄາຊູໂອະປະທານຄະນະບໍລິຫານງານສູນກາງພັກກອມມູນິດຍີ່ປຸ່ນສະມາຊິກສະພາຕ່ຳຍີ່ປຸ່ນແລະມີ ທ່ານວາລະໄຊເລັ່ງສະຫວັດຮອງຫົວໜ້າຄະນະພົວພັນຕ່າງປະເທດສູນກາງພັກພ້ອມດ້ວຍຄະນະຮ່ວມພາທາງ, ໃຫ້ກຽດຕ້ອນຮັບໂດຍທ່ານພູວົງບຸນຊູຮອງເຈົ້າແຂວງວຽງຈັນ, ມີທ່ານເຈົ້າເມືອງວັງວຽງ, ຮອງຫົວໜ້າຫ້ອງວ່າການແຂວງ, ຮອງຫົວໜ້າພະແນກການຕ່າງປະເທດແຂວງພ້ອມດ້ວຍພະນັກງານທີ່ກ່ຽວຂ້ອງຮ່ວມຕ້ອນຮັບ; ທ່ານພູວົງບຸນຊູຕາງໜ້າໃຫ້ການນຳແຂວງວຽງຈັນກ່າວສະແດງຄວາມຕ້ອນຮັບດ້ວຍໄມຕີຈິດມິດຕະພາບຢ່າງອົບອຸ່ນມາຍັງຄະນະຜູ້ແທນຂັ້ນສູງພັກກອມມູນິດຍີ່ປຸ່ນທີ່ໄດ້ມາຢ້ຽມຢາມແຂວງວຽງຈັນພ້ອມນີ້ກໍໄດ້ກ່າວລາຍງານສະພາບລວມຂອງແຂວງວຽງຈັນໂດຍຫຍໍ້, ແຂວງວຽງຈັນຕັ້ງຢູ່ພາກກາງຂອງປະເທດລາວ, ເປັນປະຕູຜ່ານລະຫວ່າງນະຄອນຫຼວງວຽງຈັນກັບບັນດາແຂວງພາກເໜືອຂອງລາວ, ພື້ນທີ່ສ່ວນຫຼາຍເປັນພູສູງແລະພູພຽງ, ມີພົນລະເມືອງທັງໝົດ481.248ຄົນ, ມີ428ບ້ານແລະ11ເມືອງ, ມີຄວາມອຸດົມສົມບູນໄປດ້ວຍຊັບໃນດິນສິນໃນນ້ຳມີຫ້ວຍນ້ຳເຊ, ພູຜາປ່າດົງທີວທັດທໍາມະຊາດສວຍງາມອັນເປັນທ່າແຮງພື້ນຖານສໍາຄັນໃຫ້ແກ່ການພັດທະນາເສດຖະກິດ-ສັງຄົມຂອງແຂວງວຽງຈັນ.ປະຊາຊົນສ່ວນຫຼາຍຖືເອົາການຜະລິດກະສິກຳເປັນພື້ນຖານເປັນຕົ້ນແມ່ນການຜະລິດເຂົ້າ, ການປູກພືດຕາມລະດູການ, ການລ້ຽງສັດ, ການປູກໄມ້ເສດຖະກິດແລະອືີ່ນໆ, ລວມຍອດຜະລິດຕະພັນພາຍໃນ (GDP) ຂອງແຂວງຂະຫຍາຍຕົວ4,2%/ປີເທົ່າກັບ70%ຂອງແຜນການຄິດເປັນມູນຄ່າ5.857ຕື້ກີບ/ປີ, GDP ຕໍ່ຫົວຄົນເທົ່າກັບ785ໂດລາ/ຄົນ/ປີ. ມີແຫຼ່ງທ່ອງທ່ຽວດ້ານທຳມະຊາດ-ປະຫວັດສາດແລະວັດທະນະທຳຫຼາຍແຫ່ງທີ່ສວຍງາມໃນແຕ່ລະປີສາມາດດຶງດູດນັກທ່ອງທ່ຽວພາຍໃນແລະຕ່າງປະເທດເຂົ້າມາທ່ຽວແຂວງວຽງຈັນໄດ້ຫຼາຍແສນເທື່ອຄົນ. ດ້ານການພົວພັນຕ່າງປະເທດໃນໄລຍະຜ່ານມາແຂວງວຽງຈັນໄດ້ມີການພົວພັນຮ່ວມມືກັບຫຼາຍປະເທດ, ສຳລັບປະເທດຍີ່ປຸ່ນກໍມີການພົວພັນຮ່ວມມືຫຼາຍດ້ານກາຍເປັນຄູ່ຮ່ວມຍຸດທະສາດຮອບດ້ານທີ່ສໍາຄັນ; ພ້ອມນີ້ຍັງໄດ້ໃຫ້ການຊ່ວຍເຫຼືອໃນຫຼາຍດ້ານໃຫ້ແກ່ສປປລາວເວົ້າລວມເວົ້າສະເພາະກໍຄືແຂວງວຽງຈັນເປັນຕົ້ນດ້ານການພັດທະນາຊັບພະຍາກອນມະນຸດແລະພື້ນຖານໂຄງລ່າງລວມ30ກວ່າໂຄງການ, ລວມມູນຄ່າການຊ່ວຍເຫຼືອເກືອບ3ລ້ານ8ແສນກວ່າໂດລາ.
ໂອກາດນີ້, ທ່ານຊິອິຄາຊູໂອກໍໄດ້ຕາງໜ້າຄະນະຜູ້ແທນຂັ້ນພັກກອມມູນິດຍີ່ປຸ່ນກ່າວສະແດງຄວາມຂອບໃຈຢ່າງສູງມາຍັງການນຳແຂວງວຽງຈັນທີ່ໃຫ້ການຕ້ອນຮັບຢ່າງອົບອຸ່ນແລະຮູ້ສຶກດີໃຈທີ່ໄດ້ມີໂອກາດມາຢ້ຽມຢາມແຂວງວຽງຈັນໃນຄັ້ງນີ້, ແຂວງວຽງຈັນເປັນແຂວງທີ່ມີຄວາມສວຍງາມແລະໜ້າຢູ່ຫຼາຍຂ້າພະເຈົ້າຫວັງຢ່າງຍິ່ງວ່າຈະມີໂອກາດກັບມາຢ້ຽມຢາມແຂວງວຽງຈັນອີກໃນຕໍ່ໜ້າ. ຈາກນັ້ນທັງສອງຝ່າຍກໍໄດ້ແລກປ່ຽນຂອງທີ່ລະນຶກຊຶ່ງກັນແລະກັນພ້ອມຖ່າຍຮູບຮ່ວມກັນ.ຫຼັງຈາກສຳເລັດພິທີພົບປະແລ້ວຄະນະຜູ້ແທນໄດ້ໄປເລາະຢ້ຽມຊົມສະຖານທີ່ທ່ອງທ່ຽວຈຳນວນໜຶ່ງພາຍໃນເມືອງວັງວຽງອີກດ້ວຍ.(ຂ່າວ-ພາບ: ແຂວງວຽງຈັນ)