ແຂວງຊຸງຊອງນຳໂດ ສເກົາຫຼີ ມອບລົດຮັບ-ສົ່ງຄົນເຈັບ17 ຄັນໃຫ້ສປປ ລາວ

ພິທີມອບ-ຮັບລົດຮັບ-ສົ່ງຄົນເຈັບ ( ອຳບູລັງ Ambulance) ຈາກແຂວງຊຸງຊອງນໍາໂດ ສເກົາຫຼີຈໍານວນ 17 ຄັນ ພ້ອມດ້ວຍອຸປະກອນໂປເຈັກເຕີ ແລະ ເຄື່ອງດັບເພີງລວມມູນຄ່າ498.226 ໂດລາ ມອບໃຫ້ກະຊວງແຮງງານ ແລະ ສະຫວັດດີການສັງຄົມ(ຮສສ) ໄດ້ຈັດຂຶ້ນໃນວັນທີ 13 ພຶດສະພາຜ່ານມາ ທີ່ກະຊວງ ຮສສ ໂດຍມີທ່ານ ດຣ ຢູ ຮຽນຊຸກ ປະທານສະມາຄົມສິລະປະ ແລະ ແລກປ່ຽນວັດທະນະທຳແຊຣິງ, ທ່ານ ໂກກ ວັງຈອງ ຫົວໜ້າພະແນກດັບເພີງ ແຂວງຊຸງຊອງນຳໂດ ສເກົາຫຼີ ພ້ອມດ້ວຍພາກສ່ວນກ່ຽວຂ້ອງສອງຝ່າຍເຂົ້າຮ່ວມ.    
ໂອກາດນີ້, ທ່ານ ລີປາວ ຢາງ ໄດ້ຕາງໜ້າໃຫ້ກະຊວງ ຮສສສະແດງຄວາມຍ້ອງຍໍຊົມເຊີຍ ແລະ ຕີລາຄາສູງຕໍ່ການຊ່ວຍເຫຼືອຂອງສະມາຄົມສິລະປະ ແລະ ແລກປ່ຽນວັດທະນະທຳແຊຣິງ ສເກົາຫຼີ ແລະ ສະຖານີປ້ອງກັນ ແລະ ຄວບຄຸມດັບເພີງແຂວງຊຸງຊອງນຳໂດ ສເກົາຫຼີ ທີ່ໃຫ້ການຊ່ວຍເຫຼືອໃນຄັ້ງນີ້ ກໍຄືໄລຍະຜ່ານມາ ເພື່ອປະກອບສ່ວນເຂົ້າໃນການອໍານວຍຄວາມສະດວກໃຫ້ແກ່ການບໍລິການ ແລະ ໃຫ້ການຊ່ວຍເຫຼືອປະຊາຊົນ ແລະ ສັງຄົມໃຫ້ມີປະສິດທິຜົນດີກວ່າເກົ່າ ພ້ອມທັງໃຫ້ຄໍາໝັ້ນສັນຍາວ່າຈະປົກປັກຮັກສາ, ຄຸ້ມຄອງ ແລະ ນໍາໃຊ້ພາຫະນະພ້ອມອຸປະກອນເຫຼົ່ານີ້ໃຫ້ມີປະສິດທິຜົນສູງສຸດ.
    ໃນໄລຍະຜ່ານມາ, ສະມາຄົມສິລະປະ ແລະ ແລກປ່ຽນວັດທະນະທຳແຊຣິງ ແລະ ສະຖານີປ້ອງກັນ ແລະ ຄວບຄຸມດັບເພີງແຂວງຊຸງຊອງນຳໂດສເກົາຫຼີໄດ້ໃຫ້ການຊ່ວຍເຫຼືອລົດຮັບ-ສົ່ງຄົນເຈັບຈໍານວນ 15 ຄັນໃນປີ 2023 ແລະ ອຸປະກອນເຄື່ອງໃຊ້ຫ້ອງການຄອມພິວເຕີຈໍານວນໜຶ່ງໃຫ້ແກ່ ສປປ ລາວ, ກະຊວງ ຮສສ ໄດ້ປະຕິບັດບົດບາດເປັນຈຸດປະສານງານໃນການປະສານສົມທົບກັບບັນດາຂະແໜງການຂັ້ນສູນກາງ ແລະ ອົງການປົກຄອງທ້ອງຖິ່ນເພື່ອແຈກຢາຍພາຫະນະ ແລະ ອຸປະກອນດັ່ງກ່າວໄປໃຫ້ພາກສ່ວນກ່ຽວຂ້ອງເພື່ອນໍາໃຊ້ໃຫ້ເກີດປະໂຫຍດສູງສຸດ.
ຂໍ້ມູນ: ຂ່າວສານ ຮສສ