ໂຄງການ ປິ່ນປົວຫົວໃຈເດັກນ້ອຍ ຂ້າມຂອງ

ທ່ານ ເຕດ ບຸນນາດ ເລຂາທິການສະພາກາຊາດໄທ ແລະ ທ່ານ ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ ສປປ ລາວ ຮ່ວມເປັນປະທານເປີດໂຄງການ “ປິ່ນປົວຫົວໃຈເດັກນ້ອຍຂ້າມຂອງ” ຂຶ້ນ ໃນວັນທີ 13 ຕຸລາ ຜ່ານມາ ທີ່ຫ້ອງປະຊຸມໃຫຍ່ໂຮງໝໍມະໂຫສົດ ນະຄອນຫຼວງວຽງຈັນ. ໂດຍມີ ທ່ານນາງ ມໍຣະກົດ ສີສະຫວັດ ເອກອັກຄະຣາຊະທູດໄທ ປະຈຳ ສປປ ລາວ, ທ່ານ ພູທອນ ເມືອງປາກ ປະທານອົງການກາແດງແຫ່ງຊາດລາວ, ພ້ອມດ້ວຍຜູ້ອຳນວຍການໂຮງໝໍມະໂຫສົດ, ຜູ້ອຳນວຍການໂຮງໝໍຈຸລາລົງ ສະພາກາຊາດໄທ, ຄະນະຜູ້ບໍລິຫານຈາກຄະນະແພດສາດ ຈຸລາລົງກອນມະຫາວິທະຍາໄລ, ມູນນິທິເພື່ອສະໜັບສະໜູນການຜ່າຕັດຫົວໃຈເດັກ ແລະ ມູນນິທິເກື້ອຝັນເດັກ ເຂົ້າຮ່ວມດ້ວຍ.
ໂຄງການ “ປິ່ນປົວຫົວໃຈເດັກນ້ອຍ ຂ້າມຂອງ” ເປັນການຮ່ວມມືລະຫວ່າງສະຖານເອກອັກຄະຣາຊະທູດໄທ ປະຈຳ ສປປ ລາວ, ສະພາກາຊາດໄທ, ໂຮງໝໍຈຸລາລົງ ສະພາກາຊາດໄທ, ຄະນະແພດສາດ ຈຸລາລົງກອນມະຫາວິທະຍາໄລ, ມູນນິທິເພື່ອສະໜັບສະໜູນການຜ່າຕັດຫົວໃຈເດັກ ແລະ ມູນນິທິເກື້ອຝັນເດັກ ກັບກະຊວງສາທາລະນະສຸກ ສປປ ລາວ ແລະ ໂຮງໝໍມະໂຫສົດ ມີວັດຖຸປະສົງ ເພື່ອໃຫ້ທີມແພດ ຮ່ວມກວດຄັດກອງເພື່ອນຳຜູ້ປ່ວຍພະຍາດຫົວໃຈເດັກຈາກ ສປປ ລາວ ໄປຜ່າຕັດຮັກສາທີ່ປະເທດໄທ ແລະ ເພື່ອພັດທະນາສັກກະຍະພາບບຸກຄະລາກອນທາງການແພດດ້ານການຜ່າຕັດຫົວໃຈເດັກໃນ ສປປ ລາວ ໂດຍເນັ້ນສົ່ງເສີມໃຫ້ເກີດການຮ່ວມມືໃນການຮັກສາພະຍາດຫົວໃຈເດັກໃນ ສປປ ລາວ ຢ່າງຍືນຍົງ ໂດຍທີມແພດຈາກປະເທດໄທ ແລະ ສປປ ລາວ ໄດ້ອອກໜ່ວຍຄັດກອງຮ່ວມກັນເປັນຄັ້ງທຳອິດ ທີ່ໂຮງໝໍມະໂຫສົດ ມີຜູ້ປ່ວຍພະຍາດຫົວໃຈເດັກຈາກທົ່ວປະເທດ ສປປ ລາວ ລວມ 92 ຄົນ ເຂົ້າຮ່ວມຮັບການກວດຄັດກອງ. ພາຍຫຼັງການຄັດກອງ ທີມແພດມີແຜນຈະເລີ່ມນຳຄົນປ່ວຍຈຳນວນ 37 ລາຍ ນຳຕົວໄປຜ່າຕັດຮັກສາທີ່ປະເທດໄທ ໂດຍບໍ່ມີຄ່າໃຊ້ຈ່າຍຕໍ່ໄປ.
ຂ່າວ: ຈາກສະຖານທູດໄທປະຈຳລາວ