ກອງປະຊຸມເຈົ້າໜ້າທີ່ອາວຸໂສເຂດສາມຫຼ່ຽມພັດທະນາ ກຳປູເຈຍ-ລາວ-ຫວຽດນາມ

ໃນວັນທີ 29 ກຸມພາ ນີ້, ແຂວງອັດຕະປື ໄດ້ເປັນເຈົ້າພາບຈັດກອງປະຊຸມເຈົ້າໜ້າທີ່ອາວຸໂສ ເຂດສາມ ຫຼ່ຽມພັດທະນາ ກຳປູເຈຍ-ລາວ-ຫວຽດນາມ, ໂດຍການເປັນປະທານ ຂອງ ທ່ານ ທອງຜ່ານ ສະຫວັນເພັດ ຮອງລັດຖະມົນຕີກະຊວງການຕ່າງປະເທດ ຫົວໜ້າເຈົ້າໜ້າທີ່ອາວຸໂສເຂດສາມຫຼ່ຽມພັດ ທະນາ ກຳປູເຈຍ-ລາວ-ຫວຽດນາມ ຂອງ ສປປ ລາວ ຊຶ່ງມີຄະນະຜູ້ແທນຈາກປະເທດສະມາຊິກ ເຂົ້າຮ່ວມ ຈາກສູນກາງ ແລະ ທ້ອງຖິ່ນ, ພ້ອມທັງບັນດາການນຳ ແລະ ພາກສ່ວນກ່ຽວຂ້ອງ ຈາກ 4 ແຂວງພາກໃຕ້ ຈຳປາສັກ, ສາລະວັນ, ອັດຕະປື ແລະ ເຊກອງ ໃນເຂດສາມຫຼ່ຽມພັດທະນາ ຂອງ ສປປ ລາວ. 
ກອງປະຊຸມ ໄດ້ຕີລາຄາຄືນຄວາມຄືບໜ້າ ກ່ຽວກັບການຈັດຕັ້ງປະຕິບັດແຜນແມ່ບົດວ່າດ້ວຍການພັດທະນາເສດຖະກິດ-ສັງຄົມ ໃນເຂດສາມຫຼ່ຽມພັດທະນາ ຮອດປີ 2020 ແລະ ສະບັບປັບປຸງໃໝ່ ຮອດປີ 2030, ແຜນປະຕິບັດງານ ວ່າດ້ວຍການເຊື່ອມຈອດດ້ານເສດຖະກິດ ຮອດປີ 2030, ແຜນພັດທະນາການທ່ອງທ່ຽວ ເຂດສາມຫຼ່ຽມພັດທະນາ. ພ້ອມດຽວກັນນີ້, ຍັງໄດ້ຮັບຟັງການລາຍງານຜົນຂອງ 4 ກອງປະຊຸມອະນຸກໍາມະການ: ກອງປະຊຸມອະນຸກຳມະການດ້ານຄວາມໝັ້ນຄົງ ແລະ ວຽກງານການຕ່າງປະເທດ, ກອງປະຊຸມອະນຸກຳມະການດ້ານເສດຖະກິດ, ກອງປະຊຸມອະນຸກໍາມະການດ້ານສັງຄົມ ແລະ ສິ່ງແວດ ລ້ອມ  ແລະ ກອງປະຊຸມອະນຸກຳມະການປະສານງານ ລະດັບແຂວງ ແລະ 3 ກິດຈະກໍາປີ່ນອ້ອມ, ເພື່ອທົບທວນຄືນຄວາມຄືບໜ້າ ແລະ ກໍານົດທິດທາງການຮ່ວມມື ໃນແຕ່ລະດ້ານຂອງຂອບການຮ່ວມມືດັ່ງກ່າວ ຊຶ່ງໄດ້ເນັ້ນໃສ່ການສົ່ງເສີມການຄ້າ ແລະ ການລົງທຶນ, ການແລກປ່ຽນວັດທະນະທໍາ ໂດຍຜ່ານກິດຈະກໍາຊາວໜຸ່ມຂອງປະເທດ CLV.
ກອງປະຊຸມໄດ້ຮັບຮອງເອົາບົດບັນທຶກກອງປະຊຸມເຈົ້າໜ້າທີ່ອາວຸໂສ ເຂດສາມຫຼ່ຽມພັດທະນາ ກຳປູເຈຍ-ລາວ-ຫວຽດນາມ ເພື່ອລາຍງານຕໍ່ ຄະນະກຳມະການປະສານງານຮ່ວມ ເຂດສາມຫຼ່ຽມພັດທະນາ ໃນວັນທີ 1 ມີນາ  2024.  
ກອງປະຊຸມເຈົ້າໜ້າທີ່ອາວຸໂສ ເຂດສາມຫຼ່ຽມພັດທະນາ ກຳປູເຈຍ-ລາວ-ຫວຽດນາມ ຄັ້ງຕໍ່ໄປ ຈະຈັດຂຶ້ນ ໃນປີ 2026 ທີ່ ສສ ຫວຽດນາມ. 
(ຂ່າວ: ກຕທ)