ກອງປະຊຸມກາງສະໄໝ ຂອງຄະນະບໍລິຫານງານສະຫະພັນກຳມະບານແຂວງອຸດົມໄຊ ສະໄໝທີ IX ໄດ້ເປີດຂຶ້ນເມື່ອບໍ່ດົນມານີ້ ທີ່ຫ້ອງປະຊຸມພະແນກແຜນການ ແລະ ການລົງທຶນ ແຂວງອຸດົມໄຊ ໂດຍການເປັນປະທານຂອງ ສະຫາຍນາງ ທຸມມາ ປັນຍາສິດ ປະທານສະຫະພັນກຳມະບານແຂວງອຸດົມໄຊ, ເປັນກຽດເຂົ້າຮ່ວມມີ ສະຫາຍ ຄຳພຽງ ຢາຈົງວາ ຮອງເລຂາພັກແຂວງ, ມີຄະນະບໍລິຫານງານຂັ້ນແຂວງ, ເມືອງ ແລະ ບັນດາຮາກຖານໜ່ວຍອ້ອມຂ້າງແຂວງເຂົ້າຮ່ວມ.
ກອງປະຊຸມຄັ້ງນີ້ ຈັດຂຶ້ນເພື່ອເປັນການສະຫຼຸບຕີລາຄາການເຄື່ອນໄຫວຈັດຕັ້ງປະຕິບັດວຽກງານຮອບດ້ານຂອງສະຫະພັນກຳມະບານແຂວງກາງສະໄໝ 2020-2023 ແລະ ທິດທາງແຜນການ 2023-2025 ພ້ອມດຽວກັນນີ້ຍັງໄດ້ຜ່ານມາດຖານ, ເງື່ອນໄຂ, ສິດ, ໜ້າທີ່ ແລະ ຂໍ້ຫ້າມຂອງຄະນະບໍລິຫານງານ, ທາບທາມຄວາມໄວ້ວາງໃຈຕໍ່ການນຳພາລວມ ແລະ ບຸກຄົນ, ຄະນະບໍລິຫານງານກຳມະບານແຂວງສະໄໝທີ IX ດ້ວຍການລົງຄະແນນສຽງໃສ່ຮ່າງທາບທາມ, ຮັບຟັງການຜ່ານຮ່າງບົດສະຫຼຸບການເຄື່ອນໄຫວຮອບດ້ານ, ຮ່າງບົດລາຍງານການຈັດຕັ້ງປະຕິບັດ 2 ວາລະແຫ່ງຊາດຂົງເຂດກຳມະບານປີ 2020-2023 ແລະ ທິດທາງແຜນການປີ 2023-2025, ຂໍ້ຕົກລົງຮັບ ຮອງເອົາຄໍາຂວັນຂອງສູນກາງສະຫະພັນກຳມະບານລາວ. ພ້ອມນີ້ຍັງໄດ້ຜ່ານຂໍ້ຕົກລົງແຕ່ງຕັ້ງຄະນະບໍລິຫານງານສະຫະພັນກຳມະບານແຂວງ, ມອບໃບຢັ້ງຢືນ 5 ເປັນເຈົ້າຂອງສູນກາງສະຫະພັນກຳມະບານລາວ ປະຈຳປີ 2022 ໃຫ້ແກ່ສະຫະພັນກຳມະບານແຂວງອຸດົມໄຊ.
ກອງປະຊຸມໄດ້ມີການປະກອບຄວາມຄິດເຫັນເຂົ້າໃນວຽກງານຕ່າງໆ ໂດຍສະເພາະແມ່ນຄຳຖາມເຈາະຈີ້ມຂອງຂັ້ນເທິງຕໍ່ຮ່າງບົດສຳຫຼວດການນຳພາລວມ ຂອງຄະນະບໍລິຫານງານສະຫະພັນກຳມະບານແຂວງ ແລະ ບົດສຳຫຼວດບຸກຄົນຕື່ມອີກ.
ຂ່າວ: ແສງອາທິດ
ຄໍາເຫັນ