 |
ສຳລັບແຜນງານ TICAF ເປັນແຜນງານໃຫຍ່ທີ່ມີຄວາມສໍາຄັນ ໃນການສົ່ງເສີມການຜະລິດກະສິ ກຳທີ່ຍືນຍົງ, ທົນທານຕໍ່ສະພາບອາກາດ ແລະ ປັບປຸງສະພາບແວດລ້ອມທາງທຸລະກິດ. ເປົ້າໝາຍຫຼັກແມ່ນແນໃສ່ການພັດທະນາຕ່ອງໂສ້ມູນຄ່າທີ່ຍືນຍົງ ສໍາລັບ ກາເຟ, ຊາ ແລະ ຜະລິດຕະພັນຈາກປ່າໄມ້. ພ້ອມກັນນັ້ນ, ຍັງມຸ່ງເນັ້ນການສົ່ງເສີມໂພຊະນາການ ແລະ ປັບປຸງຊີວິດການເປັນຢູ່ຂອງປະຊາຊົນບັນດາ ເຜົ່າ ແລະ ກຸ່ມຊາວກະສິກອນຂະໜາດນ້ອຍໃຫ້ດີຂຶ້ນ.
ໃນທີ່ປະຊຸມ ທ່ານລັດຖະມົນຕີກະຊວງກະສິກຳ ແລະ ສິ່ງແວດລ້ອມ ໄດ້ຍົກໃຫ້ເຫັນເຖິງຜົນສຳເລັດທີ່ພົ້ນເດັ່ນ ເປັນຕົ້ນແມ່ນການສ້າງຄວາມເຂັ້ມແຂງໃຫ້ແກ່ຕ່ອງໂສ້ມູນຄ່າກາເຟ ແລະ ຊາ ຢູ່ພາກເໜືອຂອງລາວ ໃຫ້ເປັນທີ່ຮູ້ຈັກໃນຕະຫຼາດສາກົນ. ອີກໜຶ່ງຜົນສໍາເລັດປະຫວັດສາດແມ່ນການປັບປຸງລະບົບການຄໍ້າປະກັນຄວາມຖືກຕ້ອງຕາມກົດໝາຍຂອງໄມ້ (TLAS) ແລະ ການຈົດທະບຽນອຸທິຍານແຫ່ງຊາດຫີນໜາມໜໍ່ເປັນມໍລະດົກໂລກ. ນອກຈາກນີ້, ຍັງມີການມອບທຶນການສຶກສາດ້ານປ່າໄມ້ໃຫ້ແກ່ນັກສຶກສາ ຈຳນວນ 100 ທ່ານ ແລະ ການເລີ່ມຕົ້ນຟື້ນຟູທາງເລກທີ 2 ເພື່ອເຊື່ອມໂຍງຜະລິດຕະພັນກະສິກຳ ໄປສູ່ຕະຫຼາດພາກພື້ນ.
ໃນທີ່ປະຊຸມຍັງໄດ້ຮັບຟັງການລາຍງານຄວາມຄືບໜ້າຈາກພາກສ່ວນຕ່າງໆ ເຊັ່ນ: ວຽກງານ Green Cup ແລະ ໂຄງການ ProFEB. ພ້ອມນັ້ນ ຍັງມີການແລກປ່ຽນບົດຮຽນຕົວຈິງຈາກຜູ້ໄດ້ຮັບຜົນປະໂຫຍດໃນທ້ອງຖິ່ນ. ພາຍໃນງານຍັງໄດ້ຈັດເວທີສົນທະນາໃນຫົວຂໍ້ກ່ຽວກັບນະໂຍບາຍ, ການປະສານງານ ແລະ ຜົນປະໂຫຍດຂອງປະຊາຊົນ ເພື່ອຖອດຖອນບົດຮຽນຮ່ວມກັນ. ໂດຍປັດຈຸບັນ ສປປ ລາວ ໄດ້ເລີ່ມຕົ້ນປຶກສາຫາລືຢ່າງເປັນທາງການກັບ ສະຫະພາບເອີຣົບ ເພື່ອສ້າງຕັ້ງຄູ່ຮ່ວມມືດ້ານປ່າໄມ້ (Forest Partnership) ແບບຮອບດ້ານ. ຂອບການຮ່ວມມືນີ້ຈະເນັ້ນການຍົກລະດັບການຄຸ້ມຄອງປ່າໄມ້ແບບຍືນຍົງ, ການແກ້ໄຂບັນຫາການທຳລາຍປ່າ ແລະ ຊຸກຍູ້ການສ້າງວຽກເຮັດງານທໍາໃຫ້ແກ່ຊຸມຊົນທ້ອງຖິ່ນ. ກອງປະຊຸມໄດ້ສະຫຼຸບພາບລວມ ແລະ ກຳນົດທິດທາງນະໂຍບາຍຮ່ວມກັນ ເພື່ອເຮັດໃຫ້ການ ຈັດຕັ້ງປະຕິບັດແຜນງານ TICAF ປະກົດຜົນເປັນຈິງຕາມວິໄສທັດ ການພັດທະນາແບບສີຂຽວ ແລະ ຍືນຍົງ.
(ຂ່າວ-ພາບ: ອະພິເດດ ແສງດາລາ)
ຄໍາເຫັນ