ກອງປະຊຸມສໍາມະນາ ຮັບຟັງຄຳຄິດ-ຄຳເຫັນບາງບັນຫາສຳຄັນຂອງນະຄອນຫຼວງວຽງຈັນຈຳນວນໜຶ່ງ

ສະພາປະຊາຊົນນະຄອນຫຼວງ ໄດ້ຈັດກອງປະຊຸມສໍາມະນາເພື່ອຮັບຟັງຄຳຄິດ-ຄຳເຫັນບາງບັນຫາສຳຄັນຂອງນະຄອນຫຼວງຈຳນວນໜຶ່ງ, ໃນລະຫວ່າງ ວັນທີ 28-29 ພະຈິກນີ້. ບັນດາຮອງປະທານສະພາປະຊາຊົນ ນະຄອນຫຼວງວຽງຈັນ ໄດ້ຜັດປ່ຽນກັນເປັນປະທານກອງປະຊຸມ, ໂດຍການເຂົ້າຮ່ວມຂອງບັນດາທ່ານສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ1, ຮອງເຈົ້າຄອງນະຄອນຫຼວງ, ສະມາຊິກສະພາປະຊາຊົນ ນະຄອນຫຼວງ, ບັນດາທ່ານຈາກພະແນກການ, ອົງການປົກຄອງເມືອງ ພ້ອມດ້ວຍແຂກທີ່ຖືກເຊີນເຂົ້າຮ່ວມ.  
ກອງປະຊຸມສຳມະນາຄັ້ງນີ້ຈຸດປະສົງເພື່ອສຳມະນາແລກປ່ຽນຄຳຄິດ-ຄຳເຫັນຈາກບັນດາທ່ານສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 1, ສະມາຊິກສະພາປະຊາຊົນ ນະຄອນຫຼວງ ແລະ ບັນດາພະແນກການ, ອົງການທຽບເທົ່າພະແນກອ້ອມຂ້າງນະຄອນຫຼວງ ຕໍ່ແນວຄວາມຄິດການລິເລີ່ມກະກຽມດຳເນີນເອກະສານ ເພື່ອສະເໜີສ້າງຕັ້ງເມືອງໃໝ່ (ເມືອງທີ10) ຂອງນະຄອນຫຼວງ ແລະ ຮ່າງນິຕິກຳຈໍານວນ 2 ສະບັບຄື: (1) ການສະເໜີຮ່າງຂໍ້ຕົກລົງວ່າດ້ວຍ ກອງທຶນພັດທະນາກິລາ-ກາຍະກຳ ນະຄອນຫຼວງ; (2)ການສະເໜີຮ່າງຂໍ້ຕົກລົງວ່າດ້ວຍການກຳນົດລາຄາຫົວໜ່ວຍທົດແທນຄ່າເສຍຫາຍຂອງໂຄງການກໍ່ສ້າງຕາຝັ່ງ ແລະ ພັດທະນາແຄມຂອງ ໄລຍະທີ II ເພື່ອເປັນການຮັບຟັງຄໍາຄິດ-ຄໍາເຫັນ ທີ່ຫຼາກຫຼາຍ ແລະ ກວ້າງຂວາງ ເພື່ອໃຫ້ພາກສ່ວນກ່ຽວຂ້ອງໄດ້ພິຈາລະນານຳໄປຄົ້ນຄວ້າພິຈາລະນາໃນຕໍ່ໜ້າ. 
(ຂ່າວ-ພາບ: ແສງຈັນ)