 |
ຊຶ່ງຈັດຂຶ້ນພາຍໃຕ້ຫົວຂໍ້: ການຮ່ວມມືຂອງປະເທດສະມາຊິກ FEALAC ໃນຍຸກແຫ່ງປັນຍາປະດິດ” (FEALAC Cooperation in the Era of Artificial Intelligence) ໂດຍການເປັນເຈົ້າພາບຂອງກະຊວງການຕ່າງປະເທດ ສ ເກົາຫຼີ ແລະ ມີຜູ້ເຂົ້າຮ່ວມຈາກບັນດາປະເທດສະມາຊິກ FEALAC ທັງສອງພາກພື້ນຢ່າງພ້ອມພຽງ ເຊັ່ນ: ສ ເກົາຫຼີ, ມົງໂກລີ, ເມັກຊິກ, ໂກລົມບີ, ສິງກະໂປ, ສປປ ລາວ, ຟີລິບປິນ, ຈີເລ, ຍີ່ປຸ່ນ, ມາເລເຊຍ ແລະ ສປ ຈີນ. ຈຸດປະສົງຂອງກອງປະຊຸມຄັ້ງນີ້ ແມ່ນເນັ້ນໃສ່ການປຶກສາຫາລື ກ່ຽວກັບບັນຫາການເຕີບໂຕຢ່າງສຳຄັນຂອງວຽກງານປັນຍາປະດິດ ແລະ ບົດບາດຂອງປັນຍາປະດິດ ໃນການຂັບເຄື່ອນການຫັນປ່ຽນທາງດ້ານເສດຖະກິດ-ສັງຄົມ ຊຶ່ງບັນດາຜູ້ເຂົ້າຮ່ວມໄດ້ມີການແລກປ່ຽນກ່ຽວກັບຍຸດທະສາດແຫ່ງຊາດໃນການສົ່ງເສີມວຽກງານປັນຍາປະດິດ, ຊອກຫາຊ່ອງທາງໃນການຮ່ວມມືກັນ ລະຫວ່າງ ພາກພື້ນອາຊີຕາເວັນອອກ ແລະ ອາເມລິກາລາຕິນ ເພື່ອຮັບປະກັນທາງດ້ານຜົນປະໂຫຍດຂອງປັນຍາປະດິດ ຢ່າງກວ້າງຂວາງ ແລະ ສະເໝີພາບ. ໃນໂອກາດດັ່ງກ່າວ, ທ່ານ ສົມບູນ ສີຫານາດ ໄດ້ຂຶ້ນນຳສະເໜີບົດ ກ່ຽວກັບ ແຜນຍຸດທະສາດແຫ່ງຊາດ ແລະ ຂໍ້ລິເລີ່ມໃນການຮ່ວມມືວຽກງານປັນຍາປະດິດຂອງ ສປປ ລາວ, ຊຶ່ງໄດ້ຍົກໃຫ້ເຫັນຄວາມສຳຄັນຂອງວຽກງານປັນຍາປະດິດ ແລະ ວິໄສທັດຂອງລັດຖະບານ ລວມທັງການຮ່ວມມືກັບບັນດາຄູ່ຮ່ວມມືຍຸດທະສາດທີ່ສຳຄັນ ເພື່ອເປັນຂົວຕໍ່ໃນການຮ່າງແຜນຍຸດທະສາດແຫ່ງຊາດໃນການສົ່ງເສີມວຽກງານປັນຍາປະດິດ ຂອງ ສປປ ລາວ. ໃນຕອນບ່າຍຂອງວັນດຽວກັນ, ທ່ານ ສົມບູນ ສີຫານາດ ໄດ້ສືບຕໍ່ເຂົ້າຮ່ວມກອງປະຊຸມປະເທດປະສານງານພາກພື້ນ ຂອງຂອບການຮ່ວມມື FEALAC ປະຈຳປີ 2026 (FEALAC Interim Coordination Meeting)
 |
ໂດຍການເປັນປະທານຮ່ວມ ລະຫວ່າງ ມົງໂກລີ (ປະເທດປະສານງານພາກພື້ນອາຊີຕາເວັນອອກ) ແລະ ສ ໂດມິນິກັນ (ປະເທດປະສານງານພາກພື້ນອາເມລິກາລາຕິນ ແລະ ມີ 5 ປະເທດສະມາຊິກ FEALAC Troika (ມົງໂກລີ, ສ ໂດມິນິກັນ, ສປປ ລາວ, ກົວເຕມາລາ, ສ ເກົາຫຼີ) ແລະ ປະທານໜ່ວຍງານວິຊາການຈຳນວນໜຶ່ງເຂົ້າຮ່ວມ. ຈຸດປະສົງ ເພື່ອຮັບຟັງການລາຍງານຜົນຂອງກອງປະຊຸມລັດຖະມົນຕີຕ່າງປະເທດ ຄັ້ງທີ 10 ໃນປີ 2025 ຜ່ານມາ, ການລາຍງານຂອງປະທານໜ່ວຍງານວິຊາການ, ການນຳໃຊ້ກອງທຶນ FEALAC ແລະ ກິດຈະກໍາຂອງກອງເລຂາອິນເຕີເນັດ FEALAC ລວມທັງທິດທາງແຜນການຮ່ວມມືໃນຕໍ່ໜ້າ. ໂອກາດນີ້, ທ່ານ ສົມບູນ ສີຫານາດ ໄດ້ປະກອບຄຳເຫັນຕໍ່ກອງປະຊຸມ ໂດຍໄດ້ຍົກໃຫ້ເຫັນຄວາມສຳຄັນຂອງຂອບການຮ່ວມມື FEALAC ໃນຕະຫຼອດ 26 ປີຜ່ານມາ ຊຶ່ງເປັນເວທີທີ່ສໍາຄັນຕໍ່ການເຊື່ອມໂຍງສອງພາກພື້ນຕະຫຼອດມາ, ແນວໃດກໍຕາມ ສປປ ລາວ ເຫັນວ່າ FEALAC ຈະຕ້ອງທົບທວນຄືນບັນດາເອກະສານຕ່າງໆ ທີ່ໄດ້ຮັບຮອງຮ່ວມກັນເພື່ອຊຸກຍູ້ບັນດາຂໍ້ລິເລີ່ມຕ່າງໆ ໃຫ້ເປັນຮູບປະທຳຫຼາຍຂຶ້ນ.
 |
ພ້ອມດຽວກັນ, ກໍສະແດງຄວາມຂອບໃຈຕໍ່ ສ ໂດມິນິກັນ ແລະ ມົງໂກລີ ໃນການເຮັດໜ້າທີ່ປະເທດປະສານງານຢ່າງຫ້າວຫັ້ນ ແລະ ຫວັງວ່າພາກພື້ນອາເມຣິກາລາຕິນ ຈະສາມາດກຳນົດປະເທດປະສານງານໃໝ່ ເພື່ອມາຮັບໜ້າທີ່ຕໍ່ຈາກ ສ ໂດມິນິກັນ ໃນເວລາທີ່ເໝາະສົມ. ກອງປະຊຸມສຳມະນາກອງເລຂາອິນເຕີເນັດ ແມ່ນຈັດຂຶ້ນເປັນປະຈຳທຸກປີ ໂດຍການເປັນເຈົ້າພາບຂອງ ສ ເກົາຫຼີ ຊຶ່ງຖືເປັນເວທີທີ່ສຳຄັນໃນການເຕົ້າໂຮມບັນດາປະເທດສະມາຊິກ ແລະ ຂັບເຄື່ອນຂອບການຮ່ວມມື FEALAC ລວມທັງຕິດຕາມ ແລະ ຊຸກຍູ້ການຈັດຕັ້ງປະຕິິບັດຂໍ້ລິເລີ່ມ ແລະ ກິດຈະກໍາຕ່າງໆໃຫ້ມີໝາກຜົນເປັນຮູບປະທຳຫຼາຍຂຶ້ນ.
(ຂ່າວ: ກຕທ)
ຄໍາເຫັນ