ກອງທຶນເພື່ອພັດທະນາຊົນນະບົດ ສປ ຈີນ ຊ່ວຍເຫຼືອດ້ານອຸປະກອນການສຶກສາຢູ່ ສປປ ລາວ

ໃນວັນທີ 19 ຕຸລາ ນີ້ ຢູ່ໂຮງຮຽນປະຖົມທົ່ງມັງ ເມືອງໄຊທານີ ນະຄອນຫຼວງວຽງຈັນ ໄດ້ມີພິທີມອບ-ຮັບອຸປະກອນການສຶກສາ (ຖົງປຶ້ມ, ບິກ, ສໍ, ບິກສີ, ສໍສີ, ແລະ ອື່ນໆລວມທັງໝົດ 30 ລາຍການ) ໃຫ້ແກ່ນັກຮຽນປະຖົມ ໂດຍໄດ້ຮັບການຊ່ວຍເຫຼືອ ຈາກກອງທຶນເພື່ອພັດທະນາຊົນນະບົດ ສປ ຈີນ, ໃຫ້ກຽດເຂົ້າຮ່ວມມີຕາງໜ້າຫ້ອງການ ຄະນະສັນຕິພາບ ແລະ ສາມັກຄີຂອງລາວ, ຕາງໜ້າສະຖານເອກອັກຄະລັດຖະທູດ ແຫ່ງ ສປ ຈີນ ປະຈຳ ສປປ ລາວ, ຕາງໜ້າກອງທຶນເພື່ອພັດທະນາຊົນນະບົດ ສປ ຈີນ ຕາງໜ້າ ກະຊວງສຶກສາທິການ ແລະ ກິລາ, ຕາງໜ້າພະແນກສຶກສາທິການ ແລະ ກິລານະຄອນຫຼວງວຽງຈັນ, ຕາງໜ້າຫ້ອງການສຶກສາທິການ ແລະ ກິລາ ເມືອງໄຊທານີ, ມີຜູ້ອຳນວຍການໂຮງຮຽນທົ່ງມັງ, ນອກນັ້ນຍັງມີຄະນະກົມ, ພະແນກຈາກພາກສ່ວນທີ່ກ່ຽວຂ້ອງຂອງລາວ ແລະ ຈີນ ພ້ອມດ້ວຍຄູ ແລະ ນັກຮຽນໃນໂຮງຮຽນປະຖົມທົ່ງມັງເຂົ້າຮ່ວມ

ໃນພິທີດັ່ງກ່າວ ຕາງໜ້າຫ້ອງການຄະນະສັນຕິພາບ ແລະ ສາມັກຄີຂອງລາວ ໄດ້ສະແດງຄວາມຂອບໃຈຕໍ່ ກອງທຶນເພື່ອພັດທະນາຊົນນະບົດ ສປ ຈີນ ກໍຄືປະຊາຊົນຈີນອ້າຍນ້ອງ ທີ່ໄດ້ໃຫ້ການຊ່ວຍເຫຼືອດ້ານອຸປະກອນການສຶກສາໃຫ້ແກ່ນັກຮຽນລາວ ຊຶ່ງໃນເທື່ອນີ້ ໄດ້ນຳເອົາອຸປະກອນການສຶກສາ ຈຳນວນ 18.536 ຊຸດ ລວມມູນຄ່າ 264.952,81 ໂດລາ ເພື່ອມາມອບໃຫ້ແກ່ນັກຮຽນຈຳນວນ 18.536 ຄົນ ໃນນີ້ມີໂຮງຮຽນປະຖົມທົ່ງມັງ ເມືອງໄຊທານີ ນະຄອນຫຼວງວຽງຈັນ, ບັນດາໂຮງຮຽນປະຖົມແຂວງສະຫວັນນະເຂດ ແລະ ໂຮງຮຽນປະຖົມແຂວງສາລະວັນ ຈຳນວນ 251 ໂຮງຮຽນ ຊຶ່ງເປັນການປະກອບສ່ວນສຳຄັນເຂົ້າໃນການພັດທະນາຊັບພະຍາກອນມະນຸດ ຂອງລາວໃຫ້ນັບມື້ມີບາດກ້າວໃໝ່.

ທ່ານ ວິລະພົງ ສີຫາລາດ ຜູ້ອຳນວຍການໂຮງຮຽນປະຖົມທົ່ງມັງ ເມືອງໄຊທານີ ນະຄອນຫຼວງວຽງຈັນ ຕາງ               ໜ້າບັນດາຄູ-ອາຈານ ແລະ ນັກຮຽນສະແດງຄວາມຂອບໃຈຢ່າງຈິງໃຈຕໍ່ ກອງທຶນເພື່ອພັດທະນາຊົນນະບົດ ສປ ຈີນ ທີ່ໄດ້ໃຫ້ການຊ່ວຍເຫຼືອອຸປະກອນການສຶກສາໃນຄັ້ງນີ້ ແລະ ຈະນຳເອົາເຄື່ອງຊ່ວຍເຫຼືອດັ່ງກ່າວໄປນຳໃຊ້ໃຫ້ເກີດປະໂຫຍດສູງສຸດ, ປະກອບສ່ວນປັບປຸງຄຸນນະພາບການສຶກສາ ຂອງນັກຮຽນໃຫ້ດີຂຶ້ນເລື້ອຍໆ.
                                               ຂ່າວ-ພາບ: ດາລາທິບ