 |
ການພົບປະສອງຝ່າຍໃນຄັ້ງນີ້ ເປັນຂີດໝາຍສຳຄັນ ທີ່ສະແດງໃຫ້ເຫັນເຖິງການເພີ່ມພູນຄູນສ້າງສາຍພົວພັນມິດຕະພາບຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດເວົ້າລວມກໍຄືການຮ່ວມມືຂອງສອງອົງການດັ່ງກ່າວ ເພື່ອເສີມຂະຫຍາຍສາຍພົວພັນຮ່ວມມືແບບອ້າຍນ້ອງ ພາຍໃຕ້ບົດບັນທຶກວ່າດ້ວຍການຮ່ວມມືສອງຝ່າຍທີ່ໄດ້ລົງນາມກັນ ເພື່ອແນໃສ່ຊຸກຍູ້ຊ່ວຍເຫຼືອ ແລະ ສະໜັບສະໜູນຊຶ່ງກັນ ແລະ ກັນ ເພື່ອພັດທະນາຂະແໜງການກວດສອບແຫ່ງລັດ ຂອງສອງປະເທດ ໃຫ້ກ້າວໜ້າຢ່າງບໍ່ຢຸດຢັ້ງ, ທັງເປັນການປະກອບສ່ວນອັນສຳຄັນເຂົ້າໃນການຜັນຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີງາມຂອງສອງປະເທດ.
ການເຄື່ອນໄຫວພົບປະຢ້ຽມຢາມຄັ້ງນີ້ ແມ່ນໄດ້ມີວາລະການເຄື່ອນໄຫວຄື: ໄດ້ມີກອງປະຊຸມພົບປະສອງຝ່າຍ ລະຫວ່າງຄະນະຜູ້ແທນອົງການກວດສອບແຫ່ງລັດ ສປປ ລາວ ແລະ ຄະນະຜູ້ແທນອົງການກວດສອບແຫ່ງລັດ ສສ ຫວຽດນາມ ຊຶ່ງໃນກອງປະຊຸມໄດ້ປຶກສາຫາລືວຽກງານດ້ວຍບັນຍາກາດອົບອຸ່ນໄມຕີຈິດ ຊຶ່ງສອງຝ່າຍໄດ້ແຈ້ງກ່ຽວກັບສະພາບການພັດທະນາເສດຖະກິດ-ສັງຄົມ ແລະ ການເຄື່ອນໄຫວທີ່ພົ້ນເດັ່ນຂອງວຽກງານການກວດສອບໄລຍະຜ່ານມາ ແລະ ທິດທາງເເຜນການໃນຕໍ່ໜ້າ ຄື:
1) ສືບຕໍ່ແລກປ່ຽນການພົບປະ - ຢ້ຽມຢາມ ສອງຝ່າຍໃນລະດັບການນໍາຂັ້ນສູງ ຂອງສອງອົງການກວດສອບແຫ່ງລັດ ຢ່າງປົກກະຕິ;
2) ສືບຕໍ່ແລກປ່ຽນບົດຮຽນສ້າງຄວາມເຂັ້ມແຂງດ້ານວິຊາສະເພາະໃຫ້ນັກກວດສອບ ໃນຫົວຂໍ້ທີ່ສອງຝ່າຍມີຄວາມສົນໃຈ ເປັນຕົ້ນ: ການກວດສອບຜົນການຈັດຕັ້ງປະຕິບັດ, ການແກ້ໄຂຜົນການກວດສອບ ແລະ ການຫັນເປັນທັນສະໄໝເຂົ້າໃນວຽກງານກວດສອບແຫ່ງລັດ;
ພ້ອມດຽວກັນນັ້ນ, ຄະນະຜູ້ແທນສອງຝ່າຍຍັງໄດ້ແລກປ່ຽນບົດຮຽນທາງດ້ານວິຊາການໃນຫົວຂໍ້: 1). ປະສົບການຂອງອົງການກວດສອບແຫ່ງລັດ ໃນການອອກຄຳເຫັນ ຕໍ່ແຜນງົບປະມານແຫ່ງລັດ ແລະ 2) ພາລະບົດບາດຂອງອົງການກວດສອບແຫ່ງລັດ ສສ ຫວຽດນາມ ໃນການກວດສອບ ແລະ ການໄລ່ລຽງຄືນ ພາສີ-ອາກອນ ຕ້ອງຈ່າຍເຂົ້າງົບປະມານແຫ່ງລັດ ຂອງພາກເອກະຊົນ.
ພ້ອມນັ້ນ, ຄະນະຜູ້ແທນອົງການກວດສອບແຫ່ງລັດ ນໍາໂດຍ ທ່ານ ຕ້ອຍ ພົນທິລາດ ຮອງປະທານອົງການກວດສອບແຫ່ງລັດ ພ້ອມດ້ວຍຄະນະ ເດີນທາງໄປຢ້ຽມຢາມ ອົງການກວດສອບປະຈຳເຂດ 11 ເມືອງແທັງຮວາ ຊຶ່ງທ່ານຫົວໜ້າອົງການກວດສອບປະຈຳເຂດ 11 ກໍໄດ້ສະແດງຄວາມຊົມເຊີຍຕໍ່ການມາເຄື່ອນໄຫວຂອງຄະນະຜູ້ແທນຂອງອົງການກວດສອບແຫ່ງລັດ ສປປ ລາວ ໃນຄັ້ງນີ້.
(ແຫຼ່ງຂ່າວ: ອກລ)
ຄໍາເຫັນ