ລາວ-ຫວຽດນາມ ເພີ່ມທະວີຮັດແໜ້ນການຮ່ວມມື ວຽກງານກວດສອບແຫ່ງລັດ

ສະຫາຍ ວຽງທະວີສອນ ເທບພະຈັນ ປະທານອົງການກວດສອບແຫ່ງລັດ ສປປ ລາວ ໄດ້ຕ້ອນຮັບ ສະຫາຍ ນາງ ຮ່າ ທິ ມິ ຢຸ້ງ ຮອງປະທານອົງການກວດສອບແຫ່ງລັດ ສສ ຫວຽດນາມ ພ້ອມດ້ວຍຄະນະ ໃນວັນທີ 4 ມີນາ ນີ້ ທີ່ອົງການກວດສອບແຫ່ງລັດ, ໃນໂອກາດທີ່ຄະນະຜູ້ແທນດັ່ງກ່າວ ເດີນທາງມາເຄື່ອນໄຫວ ຢ້ຽມຢາມ ແລະ ເຮັດວຽກຢູ່ ສປປ ລາວ ໃນລະຫວ່າງ ວັນທີ 4-8 ມີນາ 2024 ນີ້.

ການເດີນທາງມາຢ້ຽມຢາມໃນຄັ້ງນີ້ ແມ່ນເປັນການປະກອບສ່ວນອັນສຳຄັນ ເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືຶອັນດີງາມຂອງສອງປະເທດ ກໍຄື ສອງອົງການກວດສອບແຫ່ງລັດ ໃຫ້ນັບມື້ນັບແຕກດອກອອກຜົນ ຊຶ່ງການພົບປະສົນທະນາຄັ້ງນີ້ ໄດ້ດຳເນີນໄປດ້ວຍທ່າມກາງບັນຍາກາດແຫ່ງຄວາມສາມັກຄີມິດຕະພາບ, ຄວາມເຂົ້າອົກເຂົ້າໃຈ, ຄວາມຈິງໃຈ ແລະ ຄວາມຮັບຜິດຊອບສູງ ຊຶ່ງສະແດງໃຫ້ເຫັນເຖິງຄວາມມຸ່ງຫວັງຂອງທັງສອງຝ່າຍ ທີ່ຈະເສີມຂະຫຍາຍສາຍພົວພັນຮ່ວມມືແບບພິເສດ ແລະ ຮອບດ້ານ ທີ່ເປັນມູນເຊື້ອ ເພື່ອຜົນປະໂຫຍດຂອງປະຊາຊົນສອງຊາດ ລາວ-ຫວຽດນາມ, ເວົ້າລວມ ກໍຄືການຮ່ວມມືຊຸກຍູ້ຊ່ວຍເຫຼືອ ແລະ ສະໜັບສະໜູນ ຊຶ່ງກັນ ແລະ ກັນ ເພື່ອພັດທະນາຂະແໜງການກວດສອບແຫ່ງລັດ ຂອງສອງປະເທດ ໃຫ້ກ້າວໜ້າຢ່າງບໍ່ຢຸດຢັ້ງ.

ໃນການຢ້ຽມຢາມ ພົບປະຄັ້ງນີ້ ທັງສອງຝ່າຍໄດ້ແຈ້ງກ່ຽວກັບສະພາບການເຄື່ອນໄຫວທີ່ພົ້ນເດັ່ນຂອງວຽກງານການກວດສອບ ພ້ອມທັງທົບທວນຜົນສໍາເລັດ ແລະ ທິດທາງການຮ່ວມມືໃນຕໍ່ໜ້າ.  ສະຫາຍ ວຽງທະວີສອນ ເທບພະຈັນ ໄດ້ສະແເດງຄວາມຂອບໃຈ, ຍ້ອງຍໍຊົມເຊີຍ ແລະ ຕີລາຄາສູງ ຕໍ່ໝາກຜົນຂອງການຮ່ວມມື ລະຫວ່າງອົງການກວດສອບແຫ່ງລັດຂອງສອງປະເທດ ໃນໄລຍະປີຜານມາ ພ້ອມທັງມີຄໍາເຫັນສະເໜີທິດທາງແຜນການຮ່ວມມືໃນຕໍ່ໜ້າ ເປັນຕົ້ນ: ສືບຕໍ່ແລກປ່ຽນຢ້ຽມຢາມພົບປະລະດັບການນໍາຂັ້ນສູງ ຂອງສອງອົງການກວດສອບແຫ່ງລັດ ຢ່າງເປັນປົກກະຕິ; ສືບຕໍ່ຈັດຕັ້ງປະຕິບັດແຜນກິດຈະກໍາຂອງສອງອົງການກວດສອບແຫ່ງລັດ ທີ່ໄດ້ຖືກຮັບຮອງຕາມຂໍ້ຕົກລົງຂອງສອງລັດຖະບານ ແລະ ແຜນກິດຈະກໍາຮ່ວມມືສອງຝ່າຍ ລະຫວ່າງ ສອງອົງການກວດສອບແຫ່ງລັດ ເປັນຕົ້ນ: ການຝຶກອົບຮົມ, ການແລກປ່ຽນບົດຮຽນ ດ້ານວິຊາສະເພາະກວດສອບ ແລະ ການເຂົ້າຮ່ວມກອງປະຊຸມສໍາຄັນຕ່າງໆ ແລະ ສະເໜີໃຫ້ສືບຕໍ່ສະໜັບສະໜູນສ້າງຄວາມເຂັ້ມແຂງໃຫ້ແກ່ພະນັກງານອົງການກວດສອບແຫ່ງລັດ ສປປ ລາວ ເພື່ອສ້າງໃຫ້ເປັນນັກກວດສອບມືອາຊິບເທື່ອລະກ້າວ.

ໃນໂອກາດດັ່ງກ່າວ, ສະຫາຍ ວຽງທະວີສອນ ເທບພະຈັນ ໄດ້ສະແດງຄວາມຂອບໃຈຢ່າງຈິງໃຈຕໍ່ອົງການກວດສອບແຫ່ງລັດ ສສ ຫວຽດນນາມ ທີ່ຍາມໃດກໍໄດ້ເອົາໃຈໃສ່ໃຫ້ການສະໜັບສະໜູນແກ່ອົງການກວດສອບແຫ່ງລັດ ສປປ ລາວ ຕະຫຼອດມາ.
ພາຍຫຼັງສໍາເລັດການຢ້ຽມຢາມ ພົບປະແລ້ວ, ໄດ້ມີພິທີ ມອບ-ຮັບ ໂຄງການປັບປຸງການບໍລິຫານຫ້ອງການອົງການກວດສອບແຫ່ງລັດ ຫັນໄປສູ່ທັນສະໄໝ (E-Office) ໃຫ້ແກ່ອົງການກວດສອບແຫ່ງລັດ ສປປ ລາວ ຊຶ່ງໂຄງການດັ່ງກ່າວ ເປັນການຊ່ວຍເຫຼືອຈາກອົງການກວດສອບແຫ່ງລັດ ສສ ຫວຽດນາມ ໃນການສ້າງຄວາມເຂັ້ມແຂງໃນການຫັນເປັນທັນສະໄໝ ເປັນຕົ້ນ: ລະບົບຈັດເກັບເອກະສານເອເລັກໂຕຼນິກ; ຈົດໝາຍທາງເອເລັກໂຕຣນິກ ແລະ ລະບົບຄຸ້ມຄອງເອກະສານຫ້ອງການ ຊຶ່ງມີເປົ້າໝາຍເພື່ອປັບປຸງ, ເຊື່ອມໂຍງ ແລະ ພັດທະນາ ພື້ນຖານໂຄງລ່າງດ້ານ ໄອຊີທີ ແລະ ລະບົບໄອຊີທີ ເປັນເຄື່ອງມືຮັບໃຊ້ວຽກງານບໍລິຫານ ແລະ ວຽກງານການກວດສອບຂອງອົງການກວດສອບແຫ່ງລັດໃຫ້ມີຄວາມທັນສະໄໝ. 

ໃນການຢ້ຽມຢາມ ສປປ ລາວຄັ້ງນີ້, ສະຫາຍ ນາງ ຮ່າ ທິ ມິ ຢຸ້ງ ພ້ອມດ້ວຍຄະນະ ຈະສືບຕໍ່ ເຂົ້າຮ່ວມພິທີເປິດຝຶກອົບຮົມວຽກງານກວດສອບ ໃຫ້ແກ່ອົງການກວດສອບແຫ່ງລັດ ສປປ ລາວ ໃນ 3 ຫົວຂໍ້ຄື: 1). ທັກສະຂອງການເປັນຫົວໜ້າຄະນະກວດສອບ; 2). ທັກສະການສຳພາດເປົ້າໝາຍຖືກກວດສອບ ແລະ 3). ວິທີການຄັດເລືອກເປົ້າໝາຍຖືກກວດສອບ ເຂົ້າໃນແຜນການກວດສອບປະຈໍາປີ ຊຶ່ງການຝຶກອົບຮົມດັ່ງກ່າວ ຄະນະຄູ່ຝືກຈາກອົງການກວດສອບແຫ່ງລັດ ສສ ຫວຽດນາມ ຈະສືບຕໍ່ຝຶກອົບຮົມ ເປັນເວລາ 3 ວັນ ນັບແຕ່ວັນທີ່ 5-7 ມີນາ 2024.
ນອກຈາກນີ້ ສະຫາຍ ນາງ ຮ່າ ທິ ມີ ຢຸ້ງ ພ້ອມຄະນະ ຈະສືືບຕໍ່ເຄື່ອນໄຫວຢ້ຽມຢາມອົງການກວດສອບແຫ່ງລັດ ປະຈໍາພາກເໜືອ 1 ທີ່ແຂວງ ຫຼວງພະບາງ ເພື່ອພົບປະ ແລະ ເຮັດວຽກ ກັບຄະນະນໍາ ຂອງອົງການກວດສອບແຫ່ງລັດ ປະຈໍາພາກເໜືອ 1 ແລະ ແລກປ່ຽນບົດຮຽນທາງດ້ານວິຊາການກວດສອບ ແລະ ປຶກສາຫາລືທິດທາງແຜນການຮ່ວມມືໃນຕໍ່ໜ້າ. 
ຂ່າວ: ອົງການກວດສອບແຫ່ງລັດ