ລາວ-ມົງໂກລີ ສືບຕໍ່ຮັດແໜ້ນການຮ່ວມມືຂອງສອງອົງການນິຕິບັນຍັດ

ໃນວັນທີ 7 ພະຈິກ ນີ້ ທີ່ສະພາແຫ່ງຊາດລາວ, ໄດ້ມີພິທີພົບປະສອງຝ່າຍ ລະຫວ່າງ ທ່ານ ສິງຄຳ ວົງພະຈັນຮອງເລຂາທິການສະພາແຫ່ງຊາດ ພ້ອມຄະນະ ແລະ ທ່ານ ຊ. ບັດບາທາຣຮອງເລຂາທິການໃຫຍ່ ສະພາຄູຣານໃຫຍ່ ແຫ່ງ ມົງໂກລີ ພ້ອມດ້ວຍຄະນະ ໃນໂອກາດທີ່ຄະນະຜູ້ແທນຂັ້ນສູງນີ້ ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນລະຫວ່າງວັນທີ 6-14 ພະຈິກ 2023.
    ການພົບປະຄັ້ງນີ້, ສອງຝ່າຍ ໄດ້ພ້ອມກັນປຶກສາຫາລືກ່ຽວກັບສາຍພົວພັນມິດຕະພາບ ແລະ ການຮ່ວມມື ອັນເປັນມູນເຊື້ອທີ່ດີລະຫວ່າງລາວ-ມົງໂກລີ, ມົງໂກລີ-ລາວ, ກໍຄືການພົວພັນຮ່ວມມື ລະຫວ່າງ ສອງອົງການນິຕິບັນຍັດ ແລະ ການພົວພັນຮ່ວມມື ລະຫວ່າງ ຄະນະເລຂາທິການສະພາແຫ່ງຊາດລາວ ແລະ ຫ້ອງວ່າການສະພາຄູຣານໃຫຍ່ມົງໂກລີ ໃນໄລຍະຜ່ານມາ,ໂດຍສະເພາະແມ່ນການສືບຕໍ່ການຈັດຕັ້ງປະຕິບັດເນື້ອໃນຂອງບົດບັນທຶກຄວາມເຂົ້າໃຈວ່າດ້ວຍການຮ່ວມມື ລະຫວ່າງ ສະພາແຫ່ງຊາດລາວ ແລະ ສະພາຄູຣານໃຫຍ່ມົງໂກລີ ກໍຄືບົດບັນທຶກຊ່ວຍຈຳວ່າດ້ວຍການຮ່ວມມື ລະຫວ່າງ ສອງຄະນະເລຂາທິການສະພາແຫ່ງຊາດລາວ ແລະ ສະພາຄູຣານໃຫຍ່ມົງໂກລີ, ທັງເປັນການປະກອບສ່ວນອັນສໍາຄັນ ໃນການເສີມສ້າງສາຍພົວພັນມິດຕະພາບ ແລະ ການຮ່ວມມືອັນເປັນມູນເຊື້ອທີ່ດີ ລະຫວ່າງ ລາວ-ມົງໂກລີ ກໍຄື ການພົວພັນຮ່ວມມື ລະຫວ່າງ ສອງອົງການນິຕິບັນຍັດ ເວົ້າລວມ, ເວົ້າສະເພາະ ການພົວພັນຮ່ວມມື ລະຫວ່າງ ຄະນະເລຂາທິການສະພາແຫ່ງຊາດລາວ ແລະ ຫ້ອງວ່າການສະພາຄູຣານໃຫຍ່ມົງໂກລີ ໃຫ້ນັບມື້ນັບຂະຫຍາຍຕົວຍິ່ງໆຂຶ້ນ.
    ຝ່າຍລາວ, ໄດ້ຕີລາຄາສູງຕໍ່ການມາຢ້ຽມຢາມ ແລະ ເຮັດວຽກ ຢູ່ ສປປ ລາວ ຂອງຄະນະຜູ້ແທນຂັ້ນສູງດັ່ງກ່າວ ຊຶ່ງແມ່ນການສືບຕໍ່ການຈັດຕັ້ງປະຕິບັດຜົນສຳເລັດຂອງການຢ້ຽມຢາມ ແລະ ເຮັດວຽກ ຂອງປະທານສະພາແຫ່ງຊາດລາວ ແລະ ຄະນະ ຢູ່ປະເທດມົງໂກລີ ໃນເດືອນກັນຍາ ຜ່ານມາ. ນອກຈາກນີ້, ຍັງໄດ້ນຳເອົາຜ້າພົມ ຂອງມົງໂກລີ ມາມອບເປັນຂອງຂວັນໃຫ້ແກ່ສະພາແຫ່ງຊາດລາວ, ທັງເປັນສັນຍາລັກແຫ່ງການພົວພັນຮ່ວມມື ລະຫວ່າງ ສອງປະເທດ ກໍຄືສອງອົງການນິຕິບັນຍັດ.ກ່ອນຈະໄດ້ອອກມາເປັນຜ້າພົມໃນຄັ້ງນີ້, ສອງຝ່າຍໄດ້ມີການຮ່ວມມື ແລະ ປະສານງານກັນຢ່າງໃກ້ຊິດ ໃນການອອກແບບ, ກວດກາທາງດ້ານເຕັກນິກວິຊາການໂດຍສະເພາະໄດ້ຮັບການຮ່ວມມືນຳກັນຢ່າງໃກ້ຊິດ ຂອງທ່ານຮອງເລຂາທິການໃຫຍ່ ສະພາຄູຣານໃຫຍ່ມົງໂກລີ ຈຶ່ງເຮັດໃຫ້ວຽກນີ້ໄດ້ສຳເລັດຢ່າງຈົບງາມ. ພ້ອມກັນນີ້, ຝ່າຍລາວ ຍັງສະເໜີປຶກສາຫາລືກັນລະອຽດ ກ່ຽວກັບພິທີມອບ-ຮັບຜ້າພົມ ໃນວັນທີ 13 ພະຈິກ 2023 ນີ້.
    ນອກນີ້, ຝ່າຍລາວຍັງໄດ້ແຈ້ງໃຫ້ຊາບວ່າ: ໂຕະຕັ່ງ ຈຳນວນ 50 ຊຸດ ທີ່ ສປປ ລາວ ໄດ້ມອບໃຫ້ເປັນຂອງຂວັນ ໃຫ້ແກ່ສະພາຄູຣານໃຫຍ່ ຂອງປະເທດມົງໂກລີນັ້ນ, ປັດຈຸບັນ ໄດ້ຜະລິດສຳເລັດແລ້ວ ພ້ອມທັງໄດ້ຝາກຕັ່ງໄປນຳຍົນພິເສດ ຂອງພະນະທ່ານປະທານາທິບໍດີມົງໂກລີ ແລະ ອີກໂຕະຈຳນວນໜຶ່ງຈະໄດ້ສົ່ງໄປມົງໂກລີ ໃນໄວໆນີ້, ສ່ວນຂັ້ນຕອນການຂົນສົ່ງ, ວິທີການ ແລະ ກົນໄກຕ່າງໆນັ້ນ, ຈະໄດ້ມີການປຶກສາຫາລືກັນໃນລາຍລະອຽດ ເພື່ອໃຫ້ໄດ້ໄປຮອດມົງໂກລີໄດ້ໄວ ແລະ ຮັບປະກັນທີ່ສຸດ.
    ເພື່ອສືບຕໍ່ໃນການຈັດຕັ້ງປະຕິບັດຕາມເນື້ອໃນຂອງບົດບັນທຶກຄວາມເຂົ້າໃຈ ວ່າດ້ວຍການຮ່ວມມື ລະຫວ່າງ ຄະນະເລຂາທິການ ສະພາແຫ່ງຊາດລາວ ແລະ ຫ້ອງວ່າການ ສະພາຄູຣານໃຫຍ່ມົງໂກລີ,ທ່ານ ສິງຄຳ ວົງພະຈັນຍັງໄດ້ສະເໜີທິດທາງການພົວພັນຮ່ວມມື ໂດຍສະເໜີໃຫ້ສອງຄະນະເລຂາທິການພວກເຮົາ ສືບຕໍ່ເອົາໃຈໃສ່ຈັດຕັ້ງປະຕິບັດ ບົດບັນທຶກຊ່ວຍຈໍາວ່າດ້ວຍການຮ່ວມມື ລະຫວ່າງ ຄະນະເລຂາທິການສະພາແຫ່ງຊາດລາວ ແລະ ຫ້ອງວ່າການສະພາຄູຣານໃຫຍ່ມົງໂກລີ ໃຫ້ມີປະສິທິຜົນ, ເປັນຕົ້ນແມ່ນການສືບຕໍ່ການແລກປ່ຽນຄະນະຜູ້ແທນນຳກັນ, ແລກປ່ຽນບົດຮຽນ-ປະສົບການ, ຂໍ້ມູນຂ່າວສານກ່ຽວກັບການຈັດຕັ້ງປະຕິບັດພາລະບົດບາດດ້ານນິຕິບັນຍັດ, ການຊ່ວຍເຫຼືອເຊິ່ງກັນ ແລະ ກັນ ໃນການສ້າງຄວາມເຂັ້ມແຂງໃຫ້ແກ່ພະນັກງານ ຂອງຄະນະເລຂາທິການ, ຮ່ວມມື ແລະ ສະໜັບສະໜູນຊຶ່ງກັນ ແລະ ກັນ ໃນເວທີລັດຖະສະພາພາກພື້ນ ແລະ ສາກົນ. ພ້ອມກັນນີ້, ກໍສືບຕໍ່ພົວພັນປະສານງານ ແລະ ຮ່ວມມື ຢ່າງໃກ້ຊິດ ເພື່ອເຮັດໃຫ້ການຂົນສົ່ງ ແລະ ຕິດຕັ້ງໂຕະຕັ່ງ ຈຳນວນ 50 ຊຸດ ເພື່ອປະກອບໃສ່ຫ້ອງປະຊຸມສະພາຄູຣານໃຫຍ່ມົງໂກລີ ໃຫ້ສໍາເລັດໂດຍສົມບູນ ແລະ ທັນກັບກຳນົດເວລາ.
(ຂ່າວ: ສຸກສະຫວັນ, ພາບ: ສະພາແຫ່ງຊາດ)