ລາວ-ອົສຕຣາລີ ຮັດແໜ້ນການຮ່ວມມືສ້າງຄວາມເຂັ້ມແຂງດ້ານເສດຖະກິດ ແລະ ການພັດທະນາແບບຍືນຍົງ

ທ່ານທູດມີຄວາມຍິນດີຕໍ່ການໃຫ້ຂໍ້ມູນຂອງທ່ານຮອງນາຍົກລັດຖະມົນຕີ ກ່ຽວກັບທ່າອ່ຽງດ້ານເສດຖະກິດ ແລະ ແຜນການປະຕິຮູບເສດຖະກິດຂອງ ສປປ ລາວ, ລວມທັງຄວາມມຸ່ງໝັ້ນຂອງລັດຖະ ບານລາວທີ່ຈະຍົກລະດັບການພັດທະນາຊົນນະບົດ ແລະ ລຶບລ້າງຄວາມທຸກຍາກ ຂຶ້ນເປັນວາລະແຫ່ງຊາດ. ທ່ານທູດກ່າວວ່າ ການຮ່ວມມືເພື່ອການພັດທະນາຂອງອົສຕຣາລີ ແມ່ນສອດຄ່ອງກັບເປົ້າໝາຍເຫຼົ່ານີ້ຂອງລັດຖະບານ ໂດຍຜ່ານການສະໜັບສະໜູນເພື່ອປັບປຸງການດຳລົງຊີວິດຂອງປະຊາຊົນໃຫ້ດີຂຶ້ນ, ການສ້າງຄວາມເຂັ້ມແຂງໃຫ້ສະຖາບັນຕ່າງໆ ແລະ ການຂະຫຍາຍຕົວດ້ານເສດຖະກິດແບບມີສ່ວນຮ່ວມ ແລະ ຍືນຍົງ.

ທ່ານທູດໄດ້ຢັ້ງຢືນຄືນກ່ຽວກັບການເປັນຄູ່ຮ່ວມມືອັນຍາວນານຂອງອົສຕຣາລີກັບ ສປປ ລາວ ແລະ ຢັ້ງຢືນວ່າໂຄງການຊ່ວຍເຫຼືອເພື່ອການພັດທະນາ (ODA) ຂອງອົສຕຣາລີໃຫ້ແກ່ ສປປ ລາວ ສຳລັບສົກປີ 2026-27 ແມ່ນມີມູນຄ່າປະມານ 64.4 ລ້ານໂດລາອົສຕາຣລີ ຊຶ່ງປະກອບມີການຊ່ວຍເຫຼືອໂດຍຜ່ານໂຄງການຮ່ວມມືແບບສອງຝ່າຍ, ລະດັບພາກພື້ນ ແລະ ສາກົນ. ການສະໜັບສະໜູນຂອງອົສຕຣາລີແມ່ນກວມເອົາຫຼາຍຂະແໜງທີ່ສຳຄັນ ເປັນຕົ້ນແມ່ນການຄຸ້ມຄອງການເງິນພາກລັດ, ກະສິ ກຳ, ການສຶກສາ, ສາທາລະນະສຸກ, ພະລັງງານ, ການສ້າງຄວາມເຂັ້ມແຂງໃນການຮັບມືກັບການປ່ຽນ ແປງສະພາບອາກາດ ແລະ ການປົກຄອງ ເພື່ອສ້າງເງື່ອນໄຂໃຫ້ແກ່ການພັດທະນາແບບຍືນຍົງ ແລະ ດຶງດູດການລົງທຶນພາກເອກະຊົນທີ່ມີຄຸນນະພາບສູງ.

ທ່ານທູດໄດ້ເນັ້ນເຖິງການຮ່ວມມືອັນຍາວນານຂອງ ອົສຕຣາລີ ກັບກະຊວງການເງິນ ເພື່ອປັບປຸງການຄຸ້ມຄອງການເງິນພາກລັດ ເປັນຕົ້ນແມ່ນການສະໜັບສະໜູນການປະຕິຮູບດ້ານການເງິນ ແລະ ງົບ ປະມານ, ການປະສານງານກ່ຽວກັບການຊ່ວຍເຫຼືອເພື່ອການພັດທະນາ ແລະ ການສ້າງຂີດຄວາມສາມາດຂອງສະຖາບັນ. ຄວາມພະຍາຍາມເຫຼົ່ານີ້ແມ່ນປະກອບສ່ວນໃນການປັບປຸງການຄຸ້ມຄອງເສດຖະກິດ, ຊ່ວຍປັບປຸງການບໍລິການພາກລັດ ແລະ ສ້າງຄວາມເຊື່ອໝັ້ນໃຫ້ແກ່ນັກລົງທຶນ.

ທ່ານທູດຍັງສະແດງຄວາມຂອບໃຈຕໍ່ທ່ານຮອງນາຍົກລັດຖະມົນຕີ ແລະ ກະຊວງການເງິນ ທີ່ໃຫ້ການສະໜັບສະໜູນຕະຫຼອດມາຕໍ່ໂຄງການຮ່ວມມືເພື່ອການພັດທະນາຂອງອົສຕຣາລີ ແລະ ໂຄງການລົງທຶນຂອງອົສຕຣາລີຢູ່ ສປປ ລາວ ຊຶ່ງທ່ານໄດ້ຮັບຮູ້ບົດບາດອັນສຳຄັນຂອງການລົງທຶນທີ່ມີຄວາມຮັບຜິດຊອບ ໃນການສະໜັບສະໜູນການເຕີບໂຕເສດຖະກິດແບບຍືນຍົງ ແລະ ການສ້າງວຽກເຮັດງານທຳໃຫ້ແກ່ປະຊາ ຊົນ.

ການພົບປະດັ່ງກ່າວຍັງໄດ້ຍົກໃຫ້ເຫັນການຮ່ວມມືຂອງອົສຕຣາລີໃນພາກພື້ນ ໂດຍຜ່ານຂອບການຮ່ວມມືແມ່ນໍ້າຂອງ-ອົສຕຣາລີ ແລະ ຍຸດທະສາດເສດຖະກິດຂອງອົສຕຣາລີ ໃນພາກພື້ນອາຊີຕາເວັນ ອອກສ່ຽງໃຕ້ຮອດປີ 2040 ຊຶ່ງໄດ້ປະກອບສ່ວນເຮັດໃຫ້ການຮ່ວມມືດ້ານເສດຖະກິດກ້າວສູ່ລວງເລິກ, ສ້າງຄວາມເຂັ້ມແຂງໃນພາກພື້ນ ແລະ ສະໜັບສະໜູນການຂະຫຍາຍຕົວແບບຍືນຍົງໃນອາຊີຕາເວັນ ອອກສ່ຽງໃຕ້.

ທ່ານຮອງນາຍົກລັດຖະມົນຕີ ໄດ້ສະແດງຄວາມຂອບໃຈຕໍ່ລັດຖະບານ ແລະ ປະຊາຊົນອົສຕຣາລີ ທີ່ໃຫ້ການຮ່ວມມື ແລະ ການສະໜັບສະໜູນບຸລິມະສິດການພັດທະນາຂອງ ສປປ ລາວ ຕະຫຼອດມາ.

ສອງຝ່າຍໃຫ້ຄຳໝັ້ນສັນຍາວ່າຈະສືບຕໍ່ການຮ່ວມມື ເພື່ອສະໜັບສະໜູນການສ້າງອະນາຄົດຂອງ ສປປ ລາວ ໃຫ້ມີຄວາມເຂັ້ມແຂງ, ແບບມີສ່ວນຮ່ວມ ແລະ ມີຄວາມຈະເລີນຮຸ່ງເຮືອງຫຼາຍຂຶ້ນ.

(ແຫຼ່ງຂ່າວ: ສະຖານທູດອົສຕຣາລີປະຈຳລາວ)