 |
ຈຸດປະສົງຂອງໂຄງການແມ່ນເລັ່ງໃສ່ເພື່ອສ້າງຄວາມເຂັ້ມແຂງໃຫ້ລະບົບການກວດວິເຄາະ ແລະ ປິ່ນປົວພະ ຍາດຂອງໂຮງໝໍແຂວງຈຳປາສັກ ຊຶ່ງເປັນໂຮງໝໍຫຼັກໃນ 4 ແຂວງພາກໃຕ້ຂອງ ສປປ ລາວ (ແຂວງຈຳປາສັກ, ອັດ ຕະປື, ສາລະວັນ ແລະ ແຂວງເຊກອງ) ແລະ ປັບປຸງລະບົບການສົ່ງຕໍ່ຄົນເຈັບໃນພາກພື້ນໂດຍສະເພາະຈາກແຂວງໃກ້ຄຽງ ໂດຍການຍົກລະດັບສິ່ງອຳນວຍຄວາມສະດວກ ແລະ ອຸປະກອນທີ່ຈຳເປັນເພື່ອສະໜອງການບໍລິການ ການແພດໃຫ້ມີປະສິດທິພາບ ແລະ ປະສິດທິຜົນໃຫ້ຄົນເຈັບທີ່ມີອາການປ່ວຍຮຸນແຮງ ປະກອບສ່ວນເຂົ້າໃນການເພີ່ມທະວີການບໍລິການດ້ານສາທາລະນະສຸກ ແລະ ການແພດຢູ່ ສປປ ລາວ ໃຫ້ມີຄວາມເຂັ້ມແຂງ ແລະ ມີປະສິດທິພາບ ໂດຍສະເພາະໃນລະບົບທາງການແພດໃນ 4 ແຂວງພາກໃຕ້ ໂດຍປະຕິບັດຕາມການອະນຸມັດຂອງລັດຖະບານ (Full Powers) ຈຶ່ງໄດ້ຈັດພິທີລົງນາມຮ່ວມກັນສອງຝ່າຍ. ຕາງໜ້າລັດຖະບານ ສປປ ລາວ ຮ່ວມລົງນາມໂດຍທ່ານ ວົງຄຳແຫງ ວົງທະຈັກ ຫົວໜ້າກົມຮ່ວມມື ແລະ ການເງິນສາກົນ ກະຊວງການເງິນ ແລະ ຕາງໜ້າໃຫ້ລັດຖະບານຍີ່ປຸ່ນ ໂດຍທ່ານ ນາງ ມິຢາໂກະ ໂຄບາຢາຊິ ຫົວໜ້າອົງການຮ່ວມມືສາກົນຍີ່ປຸ່ນ (JICA) ປະຈໍາ ສປປ ລາວ, ມີຕາງໜ້າຈາກກົມປິ່ນປົວ ແລະ ຟື້ນຟູໜ້າທີ່ການ, ຫ້ອງການກະຊວງສາທາລະນະສຸກ, ກົມອາຊີ-ປາຊີຟິກ ແລະ ອາຟຣິກາ ກະຊວງການຕ່າງປະເທດເຂົ້າຮ່ວມ. ໂຄງການດັ່ງກ່າວຈະຈັດຕັ້ງປະຕິບັດຕົວຈິງພາຍຫຼັງທີ່ໄດ້ເຊັນສັນຍານີ້ ຊຶ່ງຈະຈັດຕັ້ງປະຕິບັດໂດຍອົງການຮ່ວມມືສາກົນຍີ່ປຸ່ນ (JICA) ແລະ ກະຊວງສາທາລະນະສຸກ ແນໃສ່ການຍົກລະດັບພື້ນຖານໂຄງລ່າງສິ່ງອຳນວຍຄວາມສະດວກ ແລະ ອຸປະກອນທີ່ຈຳເປັນເພື່ອສະໜອງການບໍລິການ ການແພດ ໂດຍສະເພາະໃນລະບົບທາງການແພດໃນ 4 ແຂວງພາກໃຕ້ຂອງ ສປປ ລາວ ເພື່ອຊ່ວຍໃຫ້ຜູ້ທີ່ຕ້ອງການ ການບໍລິການທາງການແພດ ສາມາດເຂົ້າເຖິງການບໍລິການດ້ານສາທາລະນະສຸກທີ່ມີຄຸນນະພາບ ສາມາດໄດ້ຮັບການຮັກສາທ່ວງທັນກັບເວລາ ແລະ ຫຼຸດຜ່ອນຄວາມຈຳເປັນໃນການເດີນທາງໄກເພື່ອຮັບການປິ່ນປົວທີ່ສຳຄັນ.
ຂ່າວ: ຊີລິການດາ
ຄໍາເຫັນ