 |
ໂອກາດນີ້, ທ່ານ ທອງສະລິດ ມັງໜໍ່ເມກ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ທ່ານທູດ ແລະ ອຸປະທູດ ທັງສອງທ່ານພ້ອມຄະນະທີ່ເດີນທາງມາຢ້ຽມຢາມ ແລະ ພົບປະໃນຄັ້ງນີ້, ເພື່ອປຶກສາຫາລື ແລະ ທົບທວນຄືນການຮ່ວມມື ແລະ ຊຸກຍູ້ສົ່ງເສີມດ້ານການສຶກສາຢູ່ ສປປ ລາວ ເປັນການປະກອບສ່ວນຮັດແໜ້ນການພົວພັນຮ່ວມມືດ້ານຕ່າງໆ ໂດຍສະເພາະດ້ານການສຶກສາລະຫວ່າງສອງປະເທດລາວ-ອົສຕຣາລີ ແລະ ລາວ-ລຸກຊຳບວກ ໃຫ້ໄດ້ຮັບການພັດທະນາ ແລະ ແຕກດອກອອກຜົນຂຶ້ນໄປເລື້ອຍໆ. ພ້ອມນີ້, ທ່ານ ທອງສະລິດ ມັງໜໍ່ເມກ ຍັງໄດ້ລາຍງານສະພາບການຈັດຕັ້ງປະຕິບັດວຽກງານດ້ານການສຶກສາ ກໍຄືວຽກງານການພັດທະນາຊັບພະຍາກອນມະນຸດຢູ່ ສປປ ລາວ ໃນໄລຍະຜ່ານມາ ໂດຍສະເພາະການຮ່ວມມືດ້ານການສຶກສາຂອງສອງປະເທດ, ພ້ອມທັງສະແດງຄວາມຂອບໃຈຕໍ່ລັດຖະບານອົສຕຣາລີ ແລະ ລຸກຊຳບວກ ທີ່ໄດ້ໃຫ້ການສະໜັບສະໜູນ, ຊຸກຍູ້ສົ່ງເສີມຊ່ວຍເຫຼືອດ້ານການສຶກສາແກ່ ສປປ ລາວ ມາໂດຍຕະຫຼອດ ເຮັດໃຫ້ລະບົບການສຶກສາ ກໍຄືວຽກງານການສຶກສາຢູ່ ສປປ ລາວ ໄດ້ຮັບການພັດທະນາຂຶ້ນຢ່າງບໍ່ຢຸດຢັ້ງ.
ທ່ານທູດອົສຕຣາລີ ແລະ ອຸປະທູດລຸກຊຳບວກປະຈຳລາວ ຕ່າງກໍໄດ້ສະແດງຄວາມຂອບໃຈຕໍ່ທ່ານ ທອງສະລິດ ມັງໝໍ່ເມກ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ພ້ອມທັງສະແດງຄວາມຊົມເຊີຍ ແລະ ຕີລາຄາສູງຕໍ່ທ່ານ ທອງສະລິດ ມັງໜໍ່ເມກ ທີ່ໄດ້ຖືກແຕ່ງຕັ້ງໃຫ້ມາດຳລົງຕຳແໜ່ງເປັນລັດຖະມົນຕີກະຊວງ ສສກ ຄົນໃໝ່. ພ້ອມທັງຢືນຢັນວ່າ ຈະສືບຕໍ່ໃຫ້ການຮ່ວມມື, ສະໜັບສະໜູນ, ຊ່ວຍເຫຼືອດ້ານການສຶກສາແກ່ ສປປ ລາວ ກໍຄືຮ່ວມມືກັບກະຊວງ ສສກ ເພື່ອພັດທະນາວຽກງານການສຶກສາຢູ່ ສປປ ລາວ ໃຫ້ມີປະສິດທິພາບ, ປະສິດທິຜົນ ແລະ ພັດທະນາຂຶ້ນໄປເລື້ອຍໆ.
ຂ່າວ: ທະນູທອງ, ພາບ: ເກດສະໜາ
ຄໍາເຫັນ