 |
ໂອກາດນີ້, ທ່ານ ອາລຸນໄຊ ສູນນະລາດ ໄດ້ກ່າວສະແດງຄວາມຂອບໃຈຕໍ່ທ່ານທູດ ທີ່ໃຫ້ການຕ້ອນຮັບຢ່າງອົບອຸ່ນ. ພ້ອມນີ້ ກໍໄດ້ແຈ້ງຈຸດປະສົງຂອງການມາເຄື່ອນໄຫວຢ້ຽມຢາມປະເທດຮົງກາຣີ ກໍເພື່ອສືບຕໍ່ຜັນຂະຫຍາຍການພົວພັນ ແລະ ຍົກລະດັບການຮ່ວມມື ກັບເມືອງມິດຕະພາບ ແລະ ການຮ່ວມມືດ້ານການທ່ອງທ່ຽວ ເພາະວ່າ ຄະນະພັກ - ຄະນະກໍາມະການປົກຄອງແຂວງຈຳປາສັກ ໄດ້ກໍານົດທິດທາງສ້າງແຂວງ ເປັນສູນກາງການພັດທະນາດ້ານກະສິກຳ, ສຸມໃສ່ການປູກພືດລາຄາແພງ ຕິດພັນກັບການປຸງແຕ່ງ ເພື່ອສ້າງມູນຄ່າໃນການສົ່ງອອກ; ດ້ານການທ່ອງທ່ຽວ, ເນັ້ນແລກປ່ຽນກ່ຽວກັບກິດຈະກຳການທ່ອງທ່ຽວເປັນມືອາຊີບ ເຊິ່ງແຂວງຈຳປາສັກມີທ່າແຮງຫຼາຍດ້ານ; ດ້ານໂລຈີສຕິກ ແຂວງຈໍາປາສັກ ຈະກາຍເປັນສູນກາງ ໂດຍສະເພາະດ່ານໜອງນົກຂຽນ ເຊິ່ງຈະມີການເປີດສາງຄ່ຽນຖ່າຍສິນຄ້າໃນມໍ່ໆນີ້. ນອກນີ້ ຍັງເອົາໃຈໃສ່ສົ່ງເສີມດ້ານການຄ້າ, ພະລັງງານສະອາດ. ຍ້ອນແນວນັ້ນ, ຈິ່ງຂໍຄວາມຊ່ວຍເຫຼືອນໍາທ່ານທູດລາວ ປະຈໍາຮົງກາຣີ ຊ່ວຍຊຸກຍູ້ກ່ຽວກັບການຮ່ວມມື ລະຫວ່າງ ນະຄອນປາກເຊ ກັບ ເມືອງຢີແຮລາຊໍ.
ທ່ານ ຄຳພອນ ວົງສັນຕິ ໄດ້ສະເໜີສະພາບລວມການຮ່ວມມື ລາວ - ຮົງກາຣີ ໃນໄລຍະຜ່ານມາ ເຊິ່ງໄດ້ຍົກລະດັບຂຶ້ນໄປແຕ່ລະຂັ້ນ, ຍ້ອນ ສປປ ລາວ ມີບົດບາດໃນປະຊາຄົມອາຊຽນ. ສໍາລັບທິດທາງການພົວພັນຮ່ວມມື ທີ່ທ່ານເລຂາຄະນະບໍລິຫານງານພັກແຂວງຈຳປາສັກ ສະເໜີ ໃຫ້ທ່ານທູດຈະໄປພົບລັດຖະມົນຕີກະຊວງການຕ່າງປະເທດ ຮົງກາຣີ ໂດຍເຕົ້າໂຮມບັນດາທູດໃນອາຊຽນ, ພ້ອມນັ້ນຈະໄດ້ເອົາການພົບປະກັບລັດຖະສະພາ ແລະ ການເຄື່ອນໄຫວຢ້ຽມຢາມຂອງຄະນະຜູ້ແທນແຂວງຈໍາປາສັກ ລາຍງານ ລັດຖະມົນຕີກະຊວງການຕ່າງປະເທດ.
ທ່ານ ທູດລາວ ປະຈຳ ຮົງກາຣີ ມີຄໍາເຫັນຕື່ມວ່າ: ຈຸດປະສົງການມາເຄື່ອນໄຫວຢ້ຽມຢາມຂອງແຂວງຈໍາປາສັກ ແມ່ນສອດຄ່ອງກັບນະໂຍບາຍສົ່ງເສີມກະສິກຳ 3 ດ້ານ, ປັດຈຸບັນແມ່ນແຂ່ງຂັນກັນດ້ວຍເຕັກໂນໂລຊີ ເພາະຈະໄດ້ສົ່ງເສີມດ້ານປະສິດທິພາບ, ເນັ້ນເຖິງການຄົ້ວຄວ້າຂໍ້ມູນຂ່າວສານ ການວິໄຈ, ການທົດລອງ; ການທ່ອງທ່ຽວ ແມ່ນເນັ້ນໃສ່ສົ່ງເສີມການທ່ອງທ່ຽວ ອາຊຽນແບບປະສົມປະສານ, ທາງສະຖານທູດຈະອຳນວຍຄວາມສະດວກໃຫ້ເຕັມທີ່. ພ້ອມນີ້, ກໍຂໍໃຫ້ຊຸກຍູ້ ບັນດາຂະແຫນງການອື່ນ ຫຼື ແຂວງອື່ນທີ່ມີທ່າແຮງໃນການຮ່ວມມື ແບບແຂວງຈຳປາສັກ ໃຫ້ມາຮ່ວມມືກັບ ເມືອງຢີແຮລາຊໍ ໃນອານາຄົດ.
* ຂ່າວ: ທູນທອງໃຈ *
ຄໍາເຫັນ