ການຢຽມຢາມ ແລະ ເຮັດວຽກ ຄັ້ງນີ້, ທັງສອງຝ່າຍໄດ້ຈັດກອງປະຊຸມພົບປະແລກປ່ຽນບົດຮຽນເຊິ່ງ ແລະ ກັນ ໂດຍສະເພາະ ແມ່ນການແລກປ່ຽນຄວາມຮູ້, ປະສົບການ, ການປະສານສົມທົບກັນໃນວຽກງານຕ້ານອາດຊະຍາກໍາຂ້າມຊາດ. ພ້ອມນັ້ນ, ໄດ້ລົງນາມເຊັນບົດບັນທຶກຊ່ວຍຈຳໃນການເຮັດວຽກ, ຊຶ່ງທັງສອງຝ່າຍເຫັນດີ ເພີ່ມທະວີການສົມທົບກັນປະຕິບັດບັນດາເອກະສານຮ່ວມມື ທີ່ໄດ້ລົງນາມປະຕິບັດສັນຍາ ວ່າດ້ວຍການຊ່ວຍເຫຼືອທາງດ້ານກົດໝາຍ ລະຫວ່າງ ສສ ຫວຽດນາມ ແລະ ສປປ ລາວ ຢ່າງມີປະສິດທິຜົນ; ອໍານວຍຄວາມສະດວກ ແລະ ປະສານງານ ໃນການປະຕິບັດນະໂຍບາຍການຕ່າງປະເທດຂອງສອງພັກ ແລະ ສອງລັດຢ່າງຖືກຕ້ອງ; ເພີ່ມທະວີວຽກງານແນະນຳໃຫ້ຄະນະພັກ ແລະ ອົງການປົກຄອງທ້ອງຖິ່ນ ໃນການແກ້ໄຂບັນຫາ ຄວາມປອດໄພຊາຍແດນຢ່າງຖືກຕ້ອງ ແລະ ມີປະສິດທິຜົນ; ພ້ອມນັ້ນ ໄດ້ແລກປ່ຽນປະສົບການ, ຂໍ້ມູນຂ່າວສານ ກ່ຽວກັບວຽກງານສະກັດກັ້ນ ແລະ ຕ້ານອາດຊະຍາກຳຂ້າມຊາດ, ເພີ່ມທະວີການແລກປ່ຽນຂໍ້ມູນຂ່າວສານ ກ່ຽວກັບບັນດາບັນຫາ ທີ່ເກີດຂຶ້ນຢູ່ເຂດຊາຍແດນ ຂອງສອງປະເທດ ເພື່ອສົມທົບກັນແກ້ໄຂບັນຫາຄວາມຫຍຸ້ງຍາກ, ຂໍ້ຄົງຄ້າງຢ່າງທັນການ, ຍົກສູງປະສິດທິຜົນ ວຽກງານຕ້ານອາດຊະຍາກໍາຂ້າມຊາດ. ເພື່ອເພີ່ມທະວີຄວາມສາມັກຄີແບບພິເສດ ລະຫວ່າງ ອົງການໄອຍະການປະຊາຊົນສອງແຂວງ, ຍົກສູງປະສິດທິຜົນ ໃນການແກ້ໄຂຄຳຮຽກຮ້ອງ ການຊ່ວຍເຫຼືອດ້ານຍຸດຕິທຳ, ຄະດີປ້ອງກັນ ແລະ ຕ້ານອາດຊະຍາກຳຂ້າມຊາດ. ທັງສອງອົງການໄອຍະການປະຊາຊົນແຂວງ ໄດ້ເຫັນດີເປັນເອກະສັນກັນ ໃຫ້ອົງການໄອຍະການປະຊາຊົນແຂວງຫຼວງພະບາງ ຈະເປັນເຈົ້າພາບຈັດກອງປະຊຸມໃນປີ 2027. ໃຫ້ກຽດລົງນາມບົດບັນທຶກໃນຄັ້ງນີ້ ຝ່າຍແຂວງຫຼວງພະບາງແມ່ນ ທ່ານ ຄໍາປະສົງ ດິດຍະວົງ ແລະ ຝ່າຍແຂວງເຊີນລາ ແມ່ນ ທ່ານ ຟຸງ ແມງ ຮຸງ ໂດຍມີຄະນະຜູ້ແທນທັງສອງຝ່າຍເປັນສັກຂີພິຍານ.
(ພາບ-ຂ່າວ: ອົງການໄອຍະການປະຊາຊົນແຂວງ)
ຄໍາເຫັນ