 |
ໄດ້ຈັດພິທີມອບ-ຮັບໃບຢັ້ງຢືນການຝຶກອົບຮົມລະບາດວິທະຍາພາກສະໜາມ ຫຼັກສູດ 1 ປີ ຮຸ່ນທີ 16 ຂຶ້ນໃນວັນທີ 21 ພຶດສະພານີ້ ທີ່ ນະຄອນຫຼວງວຽງຈັນ, ໂດຍການເປັນປະທານຮ່ວມ ແລະ ໃຫ້ກຽດມອບໃບຢັ້ງຢືນໃນຄັ້ງນີ້ຂອງ ທ່ານ ໄພວັນ ແກ້ວປະເສີດ ຮອງລັດຖະມົນຕີກະຊວງສາທາລະນະສຸກ, ທ່ານ ນາງ ມິກເຊວ ອາວລໍ (Michelle Outlaw) ອຸປະທູດ ຊົ່ວຄາວ ສະຫະລັດ ອາເມຣິກາ ປະຈຳ ສປປ ລາວ, ທ່ານ ທິໂມທີ ອາມສຕຣອງ (Dr Timothy Armstrong) ຜູ້ຕາງໜ້າອົງການອະນາໄມໂລກປະຈຳ ສປປ ລາວ ແລະ ທ່ານ ນາງ ວຽງສະຫວັນ ຄິດທິພົງ ຮອງຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ, ມີຜູ້ຕາງໜ້າຈາກສູນ USCDC, ອົງການປ້ອງກັນຫຼຸດຜ່ອນໄພຂົ່ມຂູ່ (DTRA), ຫ້ອງການ MOH-USCDC CoAg, ອົງການ WHO ແລະ DFA, ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
 |
ຊຸດອົບຮົມລະບາດວິທະຍາພາກສະໜາມເປັນຫຼັກສູດ 1 ປີ ໄດ້ສ້າງຕັ້ງຂຶ້ນໃນ ປີ 2009. ຈຸດ ປະສົງໃນການສ້າງຕັ້ງຊຸດອົບຮົມດັ່ງກ່າວຂຶ້ນ, ເພື່ອຕອບສະໜອງຕາມຄວາມຮຽກຮ້ອງຕ້ອງ ໃຫ້ພະນັກການຂອງວຽກງານສາທາລະນະສຸກໃນການພັດທະນາຄວາມອາດສາມາດທາງດ້ານລະບາດວິ ທະຍາງານຜູ້ທີ່ຮັບຜິດຊອບວຽກງານກັນ ແລະ ຄວບຄຸມພະຍາດ ຫຼື ເຫດການສຸກເສີນ ແຕ່ສູນກາງລົງຮອດທ້ອງຖິ່ນ ຊຶ່ງຫຼັກສູດດັ່ງກ່າວປະກອບມີການຮຽນທັງພາກທິດສະດີ, ການລົງພາກປະຕິບັດຕົວຈິງຢູ່ພາກສະໜາມ ຊຶ່ງລວມມີການສອບສວນການລະບາດຂອງພະຍາດຕິດຕໍ່ ຫຼື ເຫດການສຸກເສີນທາງດ້ານສາທາລະນະສຸກອື່ນໆ, ການທົບທວນຄືນສະພາບການເກີດຂອງພະຍາດ/ອາການພາຍໃຕ້ລະ ບົບເຝົ້າລະວັງ. ນອກຈາກນີ້, ຍັງມີການເຮັດບົດຄົ້ນຄວ້າວິທະຍາສາດສາທາລະນະສຸກ ທີ່ສອດຄ່ອງກັບຄວາມຕ້ອງການຕົວຈິງໃນ ສປປ ລາວ. ຊຶ່ງນັກສຶກສາຈົບໃນຊຸດນີ້ ລວມທັງໝົດມີ 8 ທ່ານ ທີ່ມາຈາກພະແນກສາທາລະນະສຸກແຂວງໄຊສົມບູນ, ເມືອງສຸຂຸມາ ແຂວງຈຳປາສັກ, ເມືອງ ຊານໄຊ ແຂວງ ອັດຕະປື, ເມືອງຂວາ ແຂວງ ຜົ້ງສາລີ, ເມືອງຊອນ ແຂວງ ຫົວພັນ, ພະແນກກະສິກຳ ແລະ ສິ່ງແວດລ້ອມ ແຂວງວຽງຈັນ, ກົມເສນາຮັກ ກະຊວງປ້ອງກັນຄວາມສະຫງົບ ແລະ ສະຖາອານາໄມກັນພະຍາດ ແລະ ສົ່ງເສີມສຸຂະພາບກອງທັບ ກະຊວງປ້ອງກັນຊາດ.
 |
ຜົນງານສໍາຄັນທີ່ຍາດມາໄດ້ຂອງຫຼັກສູດລະບາດວິທະຍາພາກສະໜາມ ນັບແຕ່ປີ 2009 ເຖິງປັດຈຸບັນສາມາດສ້າງນັກລະບາດວິທະຍາພາກສະໜາມລວມທັງຮຸ່ນທີ່ກໍາລັງຈົບໄດ້ທັງໝົດ 126 ທ່ານ. ໃນນັ້ນ, ຢູ່ຂັ້ນສູນກາງມີ 41 ທ່ານ (ຈາກຂະແໜງສາທາລະນະສຸກ 23 ທ່ານ, ສັດຕະວະແພດຈາກກະສິກຳ ແລະ ສິ່ງແວດລ້ອມ 5 ທ່ານ, ກະຊວງປ້ອງກັນຊາດ 7 ທ່ານ ແລະ ກະຊວງປ້ອງກັນຄວາມສະຫງົບ 6 ທ່ານ). ຢູ່ຂັ້ນແຂວງ 58 ທ່ານ (ຂະແໜງສາທາ 42 ທ່ານ, ສັດຕະວະແພດຈາກ ກະສິກຳ ແລະ ສິ່ງແວດລ້ອມ 14 ທ່ານ, ກະຊວງປ້ອງກັນຊາດ 1 ທ່ານ ແລະ ກະຊວງປ້ອງກັນຄວາມສະຫງົບ 1 ທ່ານ) ແລະ ຢູ່ຂັ້ນເມືອງ 27 ທ່ານ (ຂະແໜງສາທາ 26 ທ່ານ ແລະ ກະສິກໍາ ແລະ ສິ່ງແວດລ້ອມ 1 ທ່ານ). ບົດບາດສໍາຄັນຂອງນັກສຶກສາລະບາດວິທະຍາພາກສະໜາມຜູ້ທີ່ຈົບໄປແລ້ວຕໍ່ວຽກງານສາທາລະນະສຸກ ແມ່ນການປະກອບສ່ວນເຂົ້າໃນວຽກງານກັນ ແລະ ຄວບຄຸມພະຍາດຕິດຕໍ່ ເຫດການສຸກເສີນດ້ານສາທາລະນະສຸກ ເປັນຕົ້ນການປະກອບສ່ວນຢ່າງຕັ້ງໜ້າໃນວຽກງານເຝົ້າລະວັງ, ສອບສວນການລະບາດ, ວິເຄາະຂໍ້ມູນ ແລະ ຕອບໂຕ້ຕໍ່ການລະບາດ ແຕ່ສູນກາງຮອດທ້ອງຖິ່ນ. ພ້ອມດຽວກັນນີ້, ຍັງໄດ້ເຂົ້າຮ່ວມການສອບສວນການລະບາດຂອງພະຍາດຕິດຕໍ່ຢ່າງຫຼວງ ຫຼາຍ ເປັນຕົ້ນການລະບາດຂອງພະຍາດໂປລີໂອ, ພະຍາດໄອໄກ່, ໄຂ້ ແລະ ອອກຕຸ່ມຜື່ນແດງ, ເຂົ້າຮ່ວມປະເມີນຄວາມສ່ຽງເຝົ້າລະວັງສາມວັນປະຫວັດສາດ ແລະ ພະຍາດໄຂ້ທໍລະພິດ. ພ້ອມດຽວກັນນີ້ ເພື່ອຮັບປະກັນການເສີມສ້າງຄວາມອາດສາມາດໃຫ້ອະດີດນັກສຶກສາລະບາດວິທະຍາໃນຂອບເຂດທົ່ວປະເທດຈຶ່ງໄດ້ສືບຕໍ່ເສີມຄວາມເຂັ້ມແຂງໃຫ້ເຄືອຄ່າຍອະດີດນັກສຶກສາລະບາດວິທະຍາ/ນັກ ລະບາດວິທະຍາພາກສະໜາມ ໃຫ້ກາຍເປັນກ້ອນກໍາລັງທີ່ສໍາຄັນໃນການປະສອບສ່ວນໃຫ້ແກ່ວຽກງານເຝົ້າລະ ວັງ ແລະ ໂຕ້ຕອບຕໍ່ການລະບາດ/ເຫດການສຸກເສີນໃນແຕ່ລະຂັ້ນພ້ອມທັງການສຶກສາຄົ້ນຄ້ວາກ່ຽວກັບບັນຫາທາງດ້ານສາທາລະນະສຸກທີ່ມີໃນປັດຈຸບັນເພື່ອຊອກຫາສາເຫດຂອງການເຈັບເປັນທີ່ເປັນຂໍ້ມູນສໍາຄັນໃນການສະໜັບສະໜູນການວາງມາດຕະການແກ້ໄຂ ແລະ ປັບປຸງວຽກງານກັນ ແລະ ຄວບຄຸມ ພະຍາດໃຫ້ດີຂຶ້ນໃນຕໍ່ໜ້າ ກໍຄືການກັນ ແລະ ຫຼຸດຜ່ອນໄພຂົ່ມຂູ່ດ້ານສຸຂະພາບຂອງປະຊາຊົນ ແລະ ການພັດທະນາເສດຖະກິດ-ສັງຄົມ ຢ່າງຕໍ່ເນື່ອງ.
ຂ່າວ-ພາບ: ວັນເພັງ
ຄໍາເຫັນ