ມອບລາງວັນກິດຈະກໍາຜົນງານຮູບແຕ້ມ, ຮູບຖ່າຍແລະວີດີໂອສັ້ນພາຍໃຕ້ຫົວຂໍ້ສາຍຕາລາວ-ຈີນແບ່ງປັນຄວາມສວຍງາມຮ່ວມກັນ

ເພື່ອສະເຫຼີມສະຫຼອງວັນສ້າງຕັ້ງສາຍພົວພັນການທູດລາວ-ຈີນຄົບຮອບ 65 ປີແລະປີມິດຕະພາບລາວ-ຈີນ, ຈີນ-ລາວສອງຝ່າຍໄດ້ຮ່ວມກັນຈັດກິດຈະກໍາສະເຫຼີມສະຫຼອງຫຼາກຫຼາຍກິດຈະກໍາ. ໃນນັ້ນ, ກິດຈະກໍາປະກວດຜົນງານຮູບຖ່າຍ, ຮູບແຕ້ມແລະວີດີໂອສັ້ນພາຍໃຕ້ຫົວຂໍ້ສາຍຕາລາວ-ຈີນແບ່ງປັນຄວາມສວຍງາມຮ່ວມກັນຊຶ່ງໄດ້ເປີດຮັບສະໝັກຜົນງານຕັ້ງແຕ່ວັນທີ 1 ມັງກອນ 2026, ກິດຈະກໍາດັ່ງກ່າວໄດ້ຮັບຄວາມສົນໃຈຢ່າງກວ້າງຂວາງແລະໄດ້ຮັບການມີສ່ວນຮ່ວມຢ່າງຕັ້ງໜ້າຈາກຫຼາຍຂະແໜງການຂອງລາວແລະຈີນຊຶ່ງໄດ້ຮັບຜົນງານເຂົ້າຮ່ວມທັງໝົດ 1,121 ຜົນງານ. ຜ່ານການຄັດເລືອກຂອງຜູ້ຊ່ຽວຊານລາວແລະຈີນ, ໄດ້ຄັດເລືອກເອົາ 15 ຜົນງານຈາກຜົນງານ 3 ປະເພດຄື: ປະເພດຮູບຖ່າຍ, ຮູບແຕ້ມ ແລະ ວີດີໂອສັ້ນໂດຍໄດ້ປະກາດຜົນງານຜູ້ທີ່ໄດ້ຮັບລາງວັນເມື່ອບໍ່ດົນມານີ້.

ທ່ານຫຼົວເວີ້ນຈ້ຽນໄດ້ກ່າວວ່າ: ສໍາລັບຜົນງານທີ່ໄດ້ຮັບລາງວັນທີ່ນໍາມາສະແດງ, ບໍ່ພຽງແຕ່ເປັນຜົນສໍາເລັດທາງສິລະປະເທົ່ານັ້ນ, ແຕ່ຍັງເປັນຂົວຕໍ່ແຫ່ງຄວາມຮູ້ສຶກ. ໂດຍຜ່ານເລນກ້ອງ ແລະ ພູ່ກັນ ແລະໄດ້ເຫັນພາບທີ່ມີຊີວິດຊີວາຂອງລົດໄຟທີ່ແລ່ນດ້ວຍຄວາມໄວສູງຕາມທາງລົດໄຟລາວ-ຈີນ, ການແລກປ່ຽນຄວາມຄິດທີ່ກົມກຽວກັນ, ໄດ້ເຫັນຜືນແຜ່ນດິນລາວທີ່ຈະເລີນຮຸ່ງເຮືອງ ແລະ ການພັດທະນາຢ່າງວ່ອງໄວຂອງຈີນ. ການຊື່ນຊົມຊຶ່ງກັນ ແລະ ກັນເຮັດໃຫ້ໝູ່ເພື່ອນຄົນລາວເຂົ້າໃຈເຖິງຄວາມງົດງາມຂອງຈີນ, ໃນຂະນະດຽວກັນ ກໍໄດ້ເຮັດໃຫ້ປະຊາຊົນຈີນໄດ້ສໍາຜັດເຖິງຄວາມສະຫງົບສຸກຂອງລາວ. ນີ້ແມ່ນການສະທ້ອນໄດ້ຢ່າງດີທີ່ສຸດຂອງແນວຄິດ ແຕ່ລະຄົນລ້ວນມີຄວາມງາມໃນແບບຂອງຕົນ, ຊື່ນຊົມຄວາມງາມຂອງຜູ້ອື່ນ, ຢູ່ຮ່ວມກັນຢ່າງກົມກຽວ ເພື່ອນໍາໄປສູ່ຄວາມສັນຕິຂອງໂລກ ກິດຈະກໍານີ້ໄດ້ຮັບການຕອບຮັບເປັນຢ່າງດີ ໂດຍມີຍອດເບິ່ງຫຼາຍກວ່າ 3,200,000 ຄັ້ງ, ນີ້ບໍ່ພຽງແຕ່ສະແດງໃຫ້ເຫັນເຖິງການໄດ້ຮັບຄວາມນິຍົມຂອງກິດຈະກໍາເທົ່ານັ້ນ, ແຕ່ຍັງສະທ້ອນໃຫ້ເຫັນເຖິງມິດຕະພາບອັນອົບອຸ່ນລະຫວ່າງລາວ-ຈີນ ຊຶ່ງຮູ້ສຶກຍິນດີເປັນຢ່າງຍິ່ງທີ່ໄດ້ເຫັນວ່າ ກິດຈະກໍາຄັ້ງນີ້ມີຂອບເຂດການເຂົ້າເຖິງທີ່ກວ້າງຂວາງ, ຊ່ອງທາງການເຜີຍແຜ່ມີຄວາມຫຼາກຫຼາຍ, ເນື້ອໃນມີຄວາມເຂັ້ມຂຸ້ນຂຶ້ນໃນແຕ່ລະໄລຍະ ແລະ ຜູ້ຊົມໃຫ້ການມີສ່ວນຮ່ວມຢ່າງຄຶກຄື້ນ, ໂດຍສະເພາະ ໃນຖານະທີ່ເປັນປ່ອງຢ້ຽມແຫ່ງການແລກປ່ຽນວັດທະນະທໍາ ຍັງເປັນການສ້າງການຮັບຮູ້ຂອງແບຣນກິດຈະກໍາ ແລະ ເພີ່ມລະດັບຄວາມນິຍົມຂອງສູນວັດທະນະທໍາຈີນ ໃຫ້ສາມາດຂະຫຍາຍ, ເບັ່ງບານ ແລະ ເກີດດອກອອກຜົນໃນປະເທດລາວ.

ສໍາລັບປະເພດຮູບຖ່າຍລາງວັນການສະແດງອອກຮ່ວມສະໄໝ ຊະນະເລີດ ໄດ້ແກ່ ທ້າວ ຫຼີ ຫ່ວນ; ລາງວັນສະແດງອອກດີເດັ່ນ ໄດ້ແກ່ ທ້າວ ນັດທະນົນ ຈັນທະກຸມມານ ແລະ ທ້າວ ເຊ້ຍໜິງຊິນ, ລາງວັນດີເດັ່ນ ທ້າວ ພູນຊັບ ເທບວົງສາ ແລະ ທ້າວ ສົມຫວັງ ນໍາລິນທາ; ປະເພດຮູບແຕ້ມ ລາງວັນຊະນະເລີດໄດ້ແກ່ ທ້າວ ຈິງຫລົງ ບຸນລຽງ, ລາງວັນສະແດງອອກດີເດັ່ນ ໄດ້ແກ່ ທ້າວ ເມກ ສາຍລົມ ແລະ ທ້າວ ນົບພະລັດ ຈັນທະວົງ, ລາງວັນດີເດັ່ນ ໄດ້ແກ່ ທ້າວ ເມກ ສາຍລົມ ແລະ ທ້າວ ເຄືອຄໍາ ວົງປະທຸມ; ປະເພດວີດີໂອສັ້ນ ຊະນະເລີດໄດ້ແກ່ ທ້າວ ພຸດທະພອນ ສີລິວົງ, ລາງວັນສະແດງອອກດີເດັ່ນ ໄດ້ແກ່ ທ້າວ ກາວີ ພິມມະສອນ ແລະ ທ້າວ ອາລຸນ ວົງຄໍາ; ລາງວັນດີເດັ່ນ ໄດ້ແກ່ ທ້າວ ພົມພິທັກ ທອງພັນ ແລະ ນາງ ໄກ່ແກ້ວ ໄຊຍະສານ.

ຂ່າວ: ຍຸພິນທອງ