ນັກຮຽນລາວ ມີຄວາມປະທັບໃຈຫຼາຍຢ່າງຕໍ່ກິດຈະກໍາແລກປ່ຽນມິດຕະພາບຊາວໜຸ່ມລາວ-ຈີນ ທີ່ມີສະເໜ່ ແຂວງຢຸນນານ

ໂອກາດນີ້, ນາງ ສາຍຟ້າ ລາດຕະກຸນສັກ ນັກຮຽນຊັ້ນ ມ7 ໂຮງຮຽນ ມສ ສັນຕິພາບຫຼວງພະບາງ ໄດ້ໃຫ້ສໍາດພາດຕໍ່ນັກຂ່າວໜັງສືພິມປະຊາຊົນວ່າ: ການໄປທັດສະນະສຶກສາ ແລະ ເຂົ້າຮ່ວມກິດຈະກໍາໃນຄັ້ງນີ້, ແມ່ນປະສົບການທີ່ລ້ຳຄ່າ ແລະ ໜ້າຈົດຈຳທີ່ສຸດ ນ້ອງຮູ້ສຶກປະທັບໃຈຫຼາຍກັບການຕ້ອນຮັບທີ່ອົບອຸ່ນ ແລະ ມິດຕະພາບທີ່ດີ ທຸກຄົນໜ້າຮັກ ແລະ ເປັນກັນເອງຫຼາຍ ພວກເຮົາໄດ້ມີໂອກາດແລກປ່ຽນວັດທະນະທຳຜ່ານການຮ້ອງເພງ ແລະ ການຟ້ອນທີ່ເປັນເອກະລັກ ສິ່ງທີ່ພິເສດກວ່ານັ້ນແມ່ນການໄດ້ຮູ້ຈັກແລະ ສ້າງມິດຕະພາບໃໝ່ກັບໝູ່ເພື່ອນຈາກອີກ 2 ໂຮງຮຽນທີ່ໄດ້ຮ່ວມເດີນທາງນຳກັນເຮັດໃຫ້ເຕັມໄປດ້ວຍຮອຍຍິ້ມ ແລະ ຄວາມມ່ວນຊື່ນ.

ນາງ ທິບນະຄອນ ເມືອງຈັນ ນັກຮຽນຊັ້ນ ມ6 ໂຮງຮຽນຫລຽວໂຕ ກໍໄດ້ສະແດງຮູ້ສຶກປະທັບໃຈຫຼາຍທີ່ໄດ້ເຮັດກິດຈະກຳຕ່າງໆຮ່ວມກັບໝູ່ເພື່ອນທີ່ຢູ່ຕ່າງໂຮງຮຽນ, ຕ່າງແຂວງ ແລະ ໝູ່ເພື່ອນທີ່ໄດ້ພົບຢູ່ ສປ ຈີນ. ພ້ອມນັ້ນ, ນ້ອງໄດ້ຮຽນຮູ້ຫຼາຍໆຢ່າງບໍ່ວ່າຈະເປັນປະຫວັດສາດ, ວັດທະນະທໍາ ຂອງແຂວງຢຸນນານ ນະຄອນຄຸນໝິງ ໂດຍສະເພາະໄດ້ໄປທັດສະນະສຶກສາຫໍພິພິທະພັນທາງລົດໄຟ ຊຶ່ງໄດ້ເຮັດໃຫ້ນ້ອງໄດ້ຮຽນຮູ້ຫຼາຍຢ່າງກ່ຽວກັບປະຫວັດຄວາມເປັນມາການສ້າງເສັ້ນທາງລົດໄຟ. ໃນນັ້ນ, ຍັງໄດ້ຮຽນຮູ້ກ່ຽວກັບທາງລົດໄຟລາວ-ຈີນ ຕື່ມອີກ. ໃນນັ້ນ, ຢູ່ນະຄອນຕ້າລີ ແລະ ລີ້ຈຽງ ກໍໄດ້ໄປທັດສະນະສຶກສາຢູ່ໂຮງຮຽນມັດທະຍົມຊົນເຜົ່ານະຄອນຕ້າລີ ແລະ ໂຮງຮຽນມັດທະຍົມເລກ 1 ນະຄອນລີ້ຈຽງ ແລະ ສະຖານທີ່ທ່ອງທ່ຽວທາງທໍາມະຊາດ, ວັດທະນະທໍາ ທີ່ມີຊື່ສຽງຂອງສອງນະຄອນດັ່ງກ່າວເຊັ່ນ: ຂີ່ເຮືອຊົມໜອງເອີຫາຍ, ທັດສະນະສຶກສາເມືອງເກົ່າແຫ່ງຕ່າງໆ ແລະ ອື່ນໆ ຢ່າງໜ້າປະທັບໃຈທີ່ສຸດ. ຢ່າງໃດກໍຕາມການທີ່ໄດ້ຮູ້, ໄດ້ເຫັນ, ໄດ້ສໍາຜັດໃນກິດຈະກໍາຄັ້ງນີ້, ຈະນຳເອົາໄປເຜີຍແຜ່, ແບ່ງປັນປະສົບການ ໃຫ້ໝູ່ເພື່ອນ ແລະ ລຸ້ນນ້ອງໄດ້ຮັບຮູ້.

ທ້າວ ສິດທິເດດ ຈັນທະນຸວົງ ນັກຮຽນຊັ້ນ ມ4 ໂຮງຮຽນ ມສ ວຽງຈັນ ຍັງກ່າວຕື່ມວ່າ: ກິດຈະກໍາໃນຄັ້ງນີ້, ມີຫຼາຍຢ່າງທີ່ປະທັບໃຈ ແລະ ໜ້າຕື່ນເຕັ້ນ. ສິ່ງທີ່ໜ້າປະທັບໃຈທີ່ສຸດຄືໄດ້ໄປທັດສະນະພິພິທະພັນທີ່ແຂວງຢຸນນານ, ໄດ້ຮຽນຮູ້ປະຫວັດສາດ, ໄດ້ເຫັນວັດຖຸບູຮານໃນສະໄໝກ່ອນ, ໄດ້ຮູ້ປະຫວັດສາດແຕ່ລະໂຮງຮຽນ, ໄດ້ຮ່ວມກິດຈະກໍາຂຽນອັກສອນຈີນໃສ່ເຈ້ຍ ແລະ ຢາກແນະນໍາໃຫ້ນັກຮຽນທີ່ມີຄວາມສົນໃຈ, ມີພອນສະຫວັນ, ກ້າສະແດງອອກ, ມີສ່ວນຮ່ວມກິດຈະກຳຕ່າງໆທີ່ຈັດຂຶ້ນພາຍໃນໂຮງຮຽນ ແລະ ຮູ້ສື່ສານດ້ານພາສາຈີນ ຫຼື ອັງກິດເລັກນ້ອຍ ກໍສາມາດເຂົ້າຮ່ວມກິດຈະກຳດັ່ງກ່າວໄດ້. ຖ້າມີກິດຈະກໍາດີໆແບບນີ້ໃນຕໍ່ໜ້າກໍຢາກມາເຂົ້າຮ່ວມອີກ.