ນັກຮຽນລາວ ທັດສະນະສຶກສາຢູ່ໂຮງຮຽນມັດທະຍົມຊົນເຜົ່ານະຄອນຕ້າລີ

ການທັດສະນະສຶກສາຄັ້ງນີ້, ບັນດານັກຮຽນລາວ-ຈີນ ໄດ້ພົບປະ, ແລກປ່ຽນຄວາມຮູ້ ທາງດ້ານວັດທະນະທຳ, ປະເພນີ ຂອງສອງປະເທດ. ພ້ອມນີ້, ຍັງມີການສະແດງສີລະປະຈາກນັກຮຽນລາວ-ຈີນ ຊຶ່ງໄດ້ສ້າງຄວາມປະທັບໃຈໃຫ້ກັບຜູ້ຊົມກໍຄືຄູ-ອາຈານ, ນັກຮຽນເປັນຢ່າງດີ. ສິ່ງທີ່ໜ້າປະທັບໃຈນັກຮຽນຈາກ ສປປ ລາວ ຍັງໄດ້ສອນກ່ຽວກັບການຟ້ອນລຳວົງລາວ ໃຫ້ກັບນັກຮຽນມັດທະຍົມຊົນເຜົ່າ ນະຄອນຕ້າລີ. ພ້ອມນີ້, ນັກຮຽນຈາກ ສປປ ລາວ ກໍໄດ້ຮຽນຮູ້ກ່ຽວກັບວິທີຂຽນຕົວອັກສອນພາສາຈີນຕື່ມອີກ.

ກິດຈະກໍາໃນຄັ້ງນີ້, ບໍ່ພຽງແຕ່ເປັນການສ້າງໂອກາດ ໃຫ້ບັນດານັກຮຽນຂອງສອງປະເທດ ໄດ້ຮຽນຮູ້ພາສາ, ວັດທະນະທຳ, ຮີດຄອງປະເພນີພື້ນເມືອງບັນດາເຜົ່າ ແລະ ການພັດທະນາເສດຖະກິດ-ສັງຄົມ ຂອງນະຄອນຕ້າລີ ເທົ່ານັ້ນ, ແຕ່ຍັງເປັນການສົ່ງເສີມໃຫ້ຊາວໜຸ່ມລາວ-ຈີນ ມີຄວາມເຂົ້າອົກເຂົ້າໃຈຊຶ່ງກັນ ແລະ ກັນ, ຮູ້ຈັກຮັກແພງສາມັກຄີກັນ ແລະ ຊ່ວຍເຫຼືອຊຶ່ງກັນ ແລະ ກັນ. ບັນດານັກຮຽນທີ່ໄດ້ຮ່ວມກິດຈະກຳໃນຄັ້ງນີ້, ຈະກາຍເປັນຜູ້ສືບທອດພາລະກິດ ແລະ ມິດຕະພາບຂອງສອງປະເທດ ໃຫ້ໝັ້ນຄົງຂະໜົງແກ່ນຕະຫຼອດກາລະນານ.

ຂ່າວ-ພາບ: ວັນເພັງ