ນະຄອນຫຼວງວຽງຈັນ - ນະຄອນຫຼວງຮ່າໂນ້ຍ ສືບຕໍ່ເສີມຂະຫຍາຍການຮ່ວມມືສອງຝ່າຍ

ໂດຍຕອບສະໜອງຕາມການເຊື້ອເຊີນຂອງ ສະຫາຍ ເຈິ່ນ ສີແທ່ງ ກໍາມະການສູນກາງພັກ ຮອງເລຂາຄະນະພັກ ປະທານຄະນະກໍາມະການປະຊາຊົນນະຄອນຫຼວງຮ່າໂນ້ຍ ສສ ຫວຽດນາມ, ສະຫາຍ ອາດສະພັງທອງ ສີພັນດອນ ກໍາມະການສູນກາງພັກ ຮອງເລຂາຄະນະພັກ ເຈົ້າຄອງນະຄອນຫຼວງວຽງຈັນ (ນວ) ພ້ອມດ້ວຍຄະນະຜູ້ແທນຂັ້ນສູງ ນວ ເດີນທາງໄປຢ້ຽມຢາມ ແລະ ເຮັດວຽກຢູ່ນະຄອນຫຼວງຮ່າໂນ້ຍ ໃນວັນທີ 3 ຕຸລາ ຜ່ານມາ ໂດຍການຕ້ອນຮັບຈາກ ສະຫາຍ ເຢືອງ ດຶກ ຕ່ວນ ຮອງປະທານຄະນະກໍາມະການປະຊາຊົນນະຄອນຫຼວງຮ່າໂນ້ຍ, ສະຫາຍນາງ ລັດຕະນາ ສີຫາລາດ ທີ່ປຶກສາ ຮອງສໍານັກງານສະຖານທູດລາວ ປະຈໍາ ສສ ຫວຽດນາມ ແລະ ພາກສ່ວນກ່ຽວຂ້ອງ.
ໃນວັນທີ 4 ຕຸລາ ນີ້ ຢູ່ສໍານັກງານຄະນະກໍາມະການປະຊາຊົນນະຄອນຫຼວງຮ່າໂນ້ຍ ໄດ້ມີພິທີພົບປະສອງຝ່າຍເປັນທາງການລະຫວ່າງຄະນະຜູ້ແທນຂັ້ນສູງ ນວ ແລະ ຄະນະກໍາມະການປະຊາຊົນນະຄອນຫຼວງຮ່າໂນ້ຍ ຊຶ່ງຝ່າຍລາວນໍາໂດຍ ສະຫາຍ ອາດສະພັງທອງ ສີພັນດອນ ແລະ ຝ່າຍຫວຽດນາມ ນໍາໂດຍ ສະຫາຍ ເຈິ່ນ ສີແທ່ງ ໂອກາດນີ້ສະຫາຍປະທານຄະນະກໍາມະການປະຊາຊົນນະຄອນຫຼວງຮ່າໂນ້ຍ ກໍໄດ້ສະແດງຄວາມຕ້ອນຮັບຢ່າງອົບອຸ່ນ ແລະ ຕີລາຄາສູງຕໍ່ການມາຢ້ຽມຢາມ ແລະ ເຮັດວຽກຢູ່ນະຄອນຫຼວງຮ່າໂນ້ຍ ຂອງສະຫາຍເຈົ້າຄອງ ນວ ພ້ອມຄະນະຄັ້ງນີ້ ຊຶ່ງເປັນການປະກອບສ່ວນເພີ່ມທະວີສາຍພົວພັນມິດຕະພາບ ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງພັກ ສອງລັດ ປະຊາຊົນສອງຊາດ ລາວ-ຫວຽດນາມ ເວົ້າສະເພາະເພື່ອຜັນຂະຫຍາຍບົດບັນທຶກການຮ່ວມມືລະຫວ່າງ ນວ ແລະ ນະຄອນຫຼວງຮ່າໂນ້ຍ ໃຫ້ນັບມື້ແຕກດອກອອກຜົນ ແລະ ກ້າວສູ່ລວງເລິກຍິ່ງໆຂຶ້ນ.
ການພົບປະຄັ້ງນີ້ ສອງຝ່າຍໄດ້ລາຍງານສະພາບການພັດທະນາເສດຖະກິດ-ສັງຄົມ ກໍຄືສະພາບການທີ່ພົ້ນເດັ່ນຂອງຕົນໃຫ້ກັນຊາບ ພ້ອມທັງຕີລາຄາສູງຕໍ່ໝາກຜົນການຮ່ວມມືລະຫວ່າງສອງນະຄອນໃນໄລຍະຜ່ານມາ ຊຶ່ງມີຫຼາຍໂຄງການໄດ້ຮັບການຈັດຕັ້ງປະຕິບັດ ໂດຍສະເພາະຂົງເຂດການສຶກສາ ການຊ່ວຍເຫຼືອໂຄງການກໍ່ສ້າງອາຄານຂອງພະແນກຍຸຕິທໍາ ແລະ ອົງການໄອຍະການປະຊາຊົນ ນວ ການຮ່ວມມືຂອງພະແນກການກ່ຽວຂ້ອງສອງນະຄອນ ໄດ້ມີການແລກປ່ຽນຂໍ້ມູນຂ່າວສານ ແລະ ລົງນາມຮ່ວມກັນ ເພື່ອສ້າງໂຄງການຮ່ວມມືລະອຽດ ໂດຍສະເພາະໂຄງການຮ່ວມມືຂອງອົງການຈັດຕັ້ງການເມືອງ ແລະ ອົງການຈັດຕັ້ງມະຫາຊົນ ໄດ້ມີການແລກປ່ຽນສະໜັບສະໜູນຊ່ວຍເຫຼືອກັນດ້ານການຝຶກອົບຮົມແລກປ່ຽນຂໍ້ມູນຂ່າວສານ ເຊັ່ນ: ສະຫະພັນກໍາມະບານ, ຄະນະບໍລິຫານງານຊາວໜຸ່ມ ປປລ, ພະແນກແຮງງານ ແລະ ສະຫວັດດີການສັງຄົມ, ສະຫະພັນແມ່ຍິງ ແລະ ໂຮງຮຽນການເມືອງ-ການປົກຄອງ, ພະແນກອຸດສາຫະກຳ ແລະ ການຄ້າ, ພະແນກສຶກສາທິການ ແລະ ກິລາ ແລະ ບັນດາເມືອງ ຄື: ເມືອງຈັນທະບູລີ ແລະ ເມືອງຮ່ວນກຽມ, ເມືອງສີສັດຕະນາກ ແລະ ເມືອງເຕີຍໂຮ ຄຽງຄູ່ກັບຜົນງານທີ່ຍາດມາໄດ້ ກໍຍັງມີຫຼາຍວຽກງານທີ່ບໍ່ທັນກ້າວເຂົ້າສູ່ການຜັນຂະຫຍາຍຕາມເນື້ອໃນບົດບັນທຶກການຮ່ວມມືທີ່ສອງນະຄອນຫຼວງໄດ້ລົງນາມກັນ ເຊັ່ນ: ວຽກງານຄຸ້ມຄອງລັດ ສ້າງລັດຖະບານເອເລັກໂຕຣນິກ, ການນຳໃຊ້ເຕັກໂນໂລຊີຂໍ້ມູນຂ່າວສານໃນອົງການບໍລິຫານລັດ ໂດຍສະເພາະການນຳໃຊ້ເຕັກໂນໂລຊີຂໍ້ມູນຂ່າວສານໃນວຽກງານແກ້ໄຂຂັ້ນຕອນການບໍລິຫານ, ການເພີ່ມທະວີການຮ່ວມມືໃນຂົງເຂດສະກັດກັ້ນບັນຫາຢາເສບຕິດ, ກະສິກຳ ແລະ ປ່າໄມ້, ໂຄງການກໍ່ສ້າງສູນການຄ້າ ແລະ ການທ່ອງທ່ຽວ, ການແລກປ່ຽນບົດຮຽນຂົງເຂດງົບປະມານແຫ່ງລັດ, ຈັດເກັບລາຍຮັບ ແລະ ປະຕິບັດນະໂຍບາຍປະຢັດ, ການເຄື່ອນໄຫວກິດຈະກໍາວັດທະນະທຳ, ສີລະປະ, ກິລາ, ການປົກປັກຮັກສາອະນຸລັກ ແລະ ສົ່ງເສີມຄຸນຄ່າມໍລະດົກວັດທະນະທຳ ແລະ ພັດທະນາການທ່ອງທ່ຽວແບບຍືນຍົງ ການແບ່ງປັນບົດຮຽນວຽກງານຄຸ້ມຄອງ ແລະ ດຶງດູດການລົງທຶນພາຍໃນ ແລະ ຕ່າງປະເທດ ການພັດທະນາການທ່ອງທ່ຽວ ແລະ ການບໍລິການທີ່ກ່ຽວຂ້ອງ ລວມທັງວຽກງານກໍ່ສ້າງພັກ ແລະ ລະບົບການເມືອງ ພັດທະນາເສດຖະກິດ-ສັງຄົມ ຊຶ່ງການຜັນຂະຫຍາຍເນື້ອໃນຕ່າງໆສິ່ງສໍາຄັນແມ່ນກົນໄກຂອງການຮ່ວມມືຂອງສອງນະຄອນ ເພື່ອເຮັດໃຫ້ພະແນກການກ່ຽວຂ້ອງໄດ້ມີການແລກປ່ຽນຂໍ້ມູນຂ່າວສານຢ່າງເປັນປົກກະຕິ ແລະ ຕໍ່ເນື່ອງ ຄວນມີກົນໄກເພີ່ມໃນການຕິດຕາມກວດກາ ແລະ ຊຸກຍູ້ ເພື່ອໃຫ້ການຮ່ວມມືໄດ້ຮັບການຈັດຕັ້ງຢ່າງມີປະສິດທິຜົນສູງ ນອກນີ້ສອງຝ່າຍຍັງໄດ້ສົນທະນາກ່ຽວກັບບັນຫາຕ່າງໆທີ່ສອງຝ່າຍໃຫ້ຄວາມສົນໃຈນໍາກັບຕື່ມອີກຈໍານວນໜຶ່ງ.
ສະຫາຍ ອາດສະພັງທອງ ສີພັນດອນ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນຂອງສະຫາຍ ເຈິ່ນ ສີແທ່ງ ພ້ອມຄະນະໃນຄັ້ງນີ້ ພ້ອມທັງກ່າວວ່າ: ປັດຈຸບັນ ນວ ກຳລັງສຸມໃສ່ການຜັນຂະຫຍາຍໃນວາລະແຫ່ງຊາດ ກ່ຽວກັບບັນຫາແກ້ໄຂຢາເສບຕິດທີ່ເປັນໄພຂົມຂູ່ ແລະ ແຜ່ລະບາດໄປທົ່ວທຸກບ່ອນ, ບັນຫາການເມືອງ, ຊົນນະບົດເຂດຫ່າງໄກສອກຫຼີກ ແລະ ການແກ້ໄຂຄວາມຫຍຸ້ງຍາກສະພາບເສດຖະກິດ-ການເງິນ ທີ່ໄດ້ຮັບຜົນກະທົບຈາກການແຜ່ລະບາດຂອງພະຍາດໂຄວິດ-19 ຊຶ່ງໄດ້ສົ່ງຜົນກະທົບຕໍ່ສະພາບການອ່ອນຄ່າຂອງເງິນກີບ ນອກນີ້ຍັງໄດ້ສຸມໃສ່ກະກຽມປັບປຸງໂຄງລ່າງພື້ນຖານ ເພື່ອເປັນປະທານ ແລະ ເຈົ້າພາບກອງປະຊຸມອາຊຽນ ປີ 2024, ກອງປະຊຸມບັນດານະຄອນຫຼວງອາຊຽນ ແລະ ນະຄອນອາຊີ. ພ້ອມນີ້ໃນເດືອນພະຈິກ 2023 ນ.ວ ຈະຈັດງານບຸນນະມັດສະການພະທາດຫຼວງ ພ້ອມເປີດປີທ່ອງທ່ຽວລາວ 2024 ຊຶ່ງຈະມີງານວາງສະແດງສິນຄ້າ ແລະ ກິດຈະກຳອື່ນໆ ຈຶ່ງຂໍເຊື້ອເຊີນສະຫາຍ ເຈິ່ນ ສີ ແທ່ງ ພ້ອມຄະນະ ກໍຄືບັນດາຫົວໜ່ວຍທຸລະກິດທີ່ມີຄວາມສົນໃຈ ໄປເຂົ້າຮ່ວມງານດັ່ງກ່າວດ້ວຍ.              
ຂ່າວ: ວຽງຈັນໃໝ່