 |
ການພົບປະ ແລະ ເຮັດວຽກຄັ້ງນີ້ ສອງຝ່າຍໄດ້ສະຫຼຸບຕີລາຄາຄືນບັນດາຜົນງານພົ້ນເດັ່ນໃນການຮ່ວມມື ໃນໄລຍະຜ່ານມາ ໂດຍສະເພາະການຈັດຕັ້ງປະຕິບັດບົດບັນທຶກຄວາມເຂົ້າໃຈວ່າດ້ວຍການຮ່ວມມືລະຫວ່າງຄະນະກໍາມະການປົກຄອງນະຄອນຫຼວງວຽງຈັນ ແລະ ຄະນະກຳມະການປະຊາຊົນນະຄອນໂຮ່ຈິມິນ ໄລຍະປີ 2021-2025. ນອກນີ້, ຕົວແທນບັນດາພະແນກການ ຂະແໜງການຂອງສອງຝ່າຍ ຍັງໄດ້ແບ່ງປັນຢ່າງແທດເໝາະກັບຕົວຈິງ ແລະ ລະອຽດກ່ຽວກັບສະພາບການເສດຖະກິດ-ສັງຄົມຂອງສອງນະ ຄອນ ສະເໜີເນື້ອໃນການຮ່ວມມື ແລກປ່ຽນທິດທາງການຮ່ວມມືລະຫວ່າງສອງທ້ອງຖິ່ນໃນຕໍ່ໜ້າ ພ້ອມທັງໄດ້ລົງນາມບົດບັນທຶກຊ່ວຍຈໍາການຮ່ວມມື ໄລຍະປີ 2026-2030 ຊຶ່ງເປັນເອກະສານທີ່ມີຄວາມໝາຍສຳຄັນ ເປັນພື້ນຖານດ້ານການເມືອງ-ກົດໝາຍທີ່ເປັນຫຼັກຊັບ ກຳນົດຂອບເຂດການຮ່ວມມືໃຫ້ສອງທ້ອງ ຖິ່ນ ໃນໄລຍະໃໝ່ ປະກອບສ່ວນໃນການຈັດຕັ້ງປະຕິບັດຢ່າງມີປະສິດທິຜົນບັນດາຄວາມຮັບຮູ້ລວມ ຂອງການນຳຂັ້ນສູງ ແລະ ຂໍ້ຕົກລົງຂອງການນຳສອງນະຄອນ. ໃນນີ້ບາງທິດທາງການຮ່ວມມືໃຫຍ່ໄລຍະປີ 2026-2030 ປະກອບມີການສືບຕໍ່ປະສານສົມທົບກັນຈັດຕັ້ງບັນດາກິດຈະກຳສະເຫຼີມສະຫຼອງວັນສ້າງຕັ້ງສາຍພົວພັນການທູດ ຄົບຮອບ 65 ປີ ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມື ລາວ-ຫວຽດນາມ ຄົບຮອບ 50 ປີ ໃນປີ 2027 ເພີ່ມທະວີການຮ່ວມມື ແລກປ່ຽນຫຼາຍຂົງເຂດ ບົນພື້ນຖານບົດບັນທຶກຊ່ວຍຈໍາການຮ່ວມມື ໄລຍະປີ 2026-2030.
 |
ສະຫາຍ ອາດສະພັງທອງ ສີພັນດອນ ໄດ້ສະເໜີໃຫ້ສອງຝ່າຍຊຸກຍູ້ການຈັດຕັ້ງປະຕິບັດບັນດາຂໍ້ຕົກລົງ ແລະ ເນື້ອໃນທີ່ໄດ້ລົງນາມຢ່າງມີປະສິດທິຜົນ ຖືກຕ້ອງຕາມເປົ້າໝາຍຈຸດປະສົງທີ່ວາງໄວ້ ເພືື່ອຜັນຂະຫຍາຍ ແລະ ປະຕິບັດສົນທິສັນຍາການຮ່ວມມື ແລະ ສັນຍາວ່າດ້ວຍການຮ່ວມມືທະວິພາຄີ ລະ ຫວ່າງລັດຖະບານ ສປປ ລາວ ແລະ ລັດຖະບານ ສສ ຫວຽດນາມ ໄລຍະປີ 2026-2030 ແລະ ເພືື່ອປະກອບສ່ວນເພີ່ມທະວີສາຍພົວພັນມິດຕະພາບທີ່ເປັນມູນເຊື້ອ ຄວາມສາມັກຄີແບບພິເສດ ການຮ່ວມມືຮອບດ້ານ ແລະ ຫຸ້ນສ່ວນຍຸດທະສາດ ລະຫວ່າງສອງພັກ ສອງລັດ ແລະ ປະຊາຊົນສອງຊາດ ລາວ-ຫວຽດນາມ ເວົ້າສະເພາະນະຄອນຫຼວງວຽງຈັນ ແລະ ນະຄອນໂຮ່ຈິມິນ ໃຫ້ນັບມື້ໄດ້ຮັບການພັດທະນາແຂງແຮງກວ່າເກົ່າ.
ສະຫາຍ ຫວໍ ວັນ ມິງ ໄດ້ຍົກໃຫ້ເຫັນທ່າແຮງໃນການຮ່ວມມືໃນຂົງເຂດເສດຖະກິດ ວັດທະນະ ທຳການທ່ອງທ່ຽວ ການສຶກສາ ກໍ່ສ້າງ ແລະ ຂະແໜງການອື່ນໆ ພ້ອມທັງເຫັນດີເປັນເອກະພາບຕໍ່ບັນດາຂໍ້ສະເໜີຂອງຝ່າຍລາວ ແລະ ເຊື່ອໝັ້ນວ່າດ້ວຍຄວາມຕັດສິນໃຈດ້ານການເມືອງສູງ ສາຍພົວພັນການຮ່ວມມືລະຫວ່າງນະຄອນໂຮ່ຈິມິນ-ນະຄອນຫຼວງວຽງຈັນ ຈະນັບມື້ມີໝາກຜົນຕົວຈິງ ຍືນຍົງ ແລະ ສືບຕໍ່ເປັນແບບຢ່າງທີ່ມີຊີວິດຊີວາຂອງການຮ່ວມມືຂັ້ນທ້ອງຖິ່ນລະຫວ່າງສອງປະເທດ.
 |
ຈາກນັ້ນ, ສະຫາຍ ອາດສະພັງທອງ ສີພັນດອນ ແລະ ສະຫາຍ ຫວໍ ວັນ ມິງ ກໍໄດ້ເປັນສັກຂີພິຍານໃນພິທີລົງນາມບົດບັນທຶກຊ່ວຍຈໍາການຮ່ວມມື ລະຫວ່າງ ຄະນະກໍາມະການປົກຄອງນະຄອນຫຼວງວຽງຈັນ ແລະ ຄະນະກໍາມະການປະຊາຊົນນະຄອນໂຮ່ຈິມິນ ໄລຍະປີ 2026-2030 ຊຶ່ງລົງນາມໂດຍສະ ຫາຍ ໂພຄໍາ ໄຊຍະສອນ ຮອງປະທານສະພາປະຊາຊົນນະຄອນຫຼວງວຽງວຽງຈັນ ແລະ ສະຫາຍ ຫງວຽນ ໂລ໋ກ ຮາ ຮອງປະທານຜູ້ປະຈໍາການຄະນະກໍາມະການປະຊາຊົນນະຄອນໂຮ່ຈິມິນ.
(ແຫຼ່ງຂ່າວ: ວຽງຈັນໃໝ່)
ຄໍາເຫັນ