ແລະ ສື່ສານ ສະຖາບັນສື່ມວນຊົນ ແລະ ໂຄສະນາ ຫວຽດນາມ ໄດ້ນໍາພາຄະນະຝຶກອົບຮົມສື່ມວນຊົນລາວ ຢ້ຽມຢາມ ແລະ ແລກປ່ຽນບົດຮຽນ ຢູ່ໜັງສືພິມກອງທັບ ປະຊາຊົນ ຫວຽດນາມ ກ່ຽວກັບຫົວຂໍ້; “ການກໍ່ສ້າງ ແລະ ພັດທະນາບຸກຄະລາກອນ ຂອງໜັງສືພິມກອງທັບ ປະຊາຊົນ ຫວຽດນາມ” ໃນວັນທີ 29 ຕຸລາ 2024 ທີ່ນະຄອນຫຼວງຮ່າໂນ້ຍ ໂດຍການຕ້ອນຮັບຂອງທ່ານ ຫງວຽນ ຮົ່ງ ຫ້າຍ ຮອງບັນນາທິການໃຫຍ່ ໜັງສືພິມ ກອງທັບປະຊາຊົນຫວຽດນາມ ພ້ອມດ້ວຍຄະນະ.
ໂອກາດດັ່ງກ່າວ, ບັນດາຜູ້ເຂົ້າຮ່ວມ ໄດ້ຮັບຟັງການລາຍງານສະພາບການກຳເນີດ ແລະ ການເຕີບໃຫຍ່ຂະຫຍາຍຕົວຂອງໜັງສືພິມກອງທັບ ປະຊາຊົນ ຫວຽດນາມ ຕະຫຼອດໄລຍະ 70 ປີຜ່ານມາ. ຊໜັງສືພິມກອງທັບປະຊາຊົນຫວຽດນາມ ໄດ້ຮັບການສ້າງຕັ້ງຂຶ້ນໃນປີ 1950 ເປັນອົງການຂອງຄະນະພັກການທະຫານສູນກາງ ກະຊວງປ້ອງກັນປະເທດ, ເປັນກະບອກສຽງໃຫ້ກຳລັງປະກອບອາວຸດ ແລະ ປະຊາຊົນຫວຽດນາມ ຊຶ່ງເປັນໜຶ່ງໃນສື່ຫຼັກຂອງຫວຽດນາມ ທີ່ໄດ້ໂຄສະນາເຜີຍແຜ່ບັນດາເນື້ອໃນ, ສ່ອງແສງດ້ານຕ່າງໆຂອງຊີວິດສັງຄົມ, ການເຄື່ອນໄຫວວຽກງານການທະຫານ, ການປ້ອງກັນຊາດ-ປ້ອງກັນຄວາມສະຫງົບຢ່າງທັນການ ພ້ອມທັງຕອບໂຕ້ຂ່າວບິດເບືອນ ບໍ່ມີມູນຄວາມຈິງຢ່າງເລິກເຊິ່ງ ແລະ ກວ້າງຂວາງ ດ້ວຍຫຼາຍຮູບແບບ ແລະ ຫຼາຍຮູບການ ເປັນຕົ້ນບັນດາສື່ສິ່ງພິມ ແລະ ສື່ເອເລັກໂຕຣນິກ ຄື: ໜັງສືພິມລາຍວັນ, ລາຍອາທິດ ແລະ ລາຍເດືອນ. ສຳລັບໜັງສືພິມເອເລັກໂຕຣນິກ ມີ 5 ພາສາເຊັ່ນ: ພາສາຫວຽດນາມ, ອັງກິດ, ຈີນ, ລາວ ແລະ ພາສາກຳປູເຈຍ.
ສະພາບປັດຈຸບັນ, ການພັດທະນາຢ່າງແຮງຂອງສື່ມວນຊົນ ໃນການຫັນເປັນທັນສະໄໝ ຕາມແຜນກຳນົດຂອງລັດຖະບານ, ໜັງສືພິມ ກອງທັບປະຊາຊົນ ຫວຽດນາມ ກໍໄດ້ຫັນຕາມຮູບການສື່ມວນຊົນຫຼາກຫຼາຍຮູບແບບ ແລະ ກຳນົດທິດທາງຫາງສຽງຂອງສັງຄົມ ໂດຍໄດ້ເປັນເຈົ້າການໃນການຫັນປ່ຽນເນື້ອໃນຜ່ານລະບົບດີຈີຕອນ, ສ້າງເວັບໄຊ, ສື່ສັງຄົມອອນລາຍຄື: ເຟສບຸກ, ຢູທູບ, ຊາໂລ, ຕິກຕອກ ຊຶ່ງສາມາດດຶງດູດຜູ້ອ່ານຜູ້ຊົມຕິດຕາມຫຼາຍລ້ານຄົນ ເຮັດໃຫ້ໜັງສືພິມເລັກໂຕຣນິກ ຂອງກອງທັບປະຊາຊົນຫວຽດນາມ ໄດ້ຕິດອັນດັບ 30 ໃນຈໍານວນ 1,558 ເວັບໄຊ ໜັງສືພິມເອເລັກໂຕຣນິກທັງໝົດ ໃນທົ່ວປະເທດ.
ໃນໄລຍະຜ່ານມາ, ໜັງສືພິມ ກອງທັບປະຊາຊົນ ຫວຽດນາມ ຍາມໃດກໍໄດ້ຕິດແທດກັບການເຄື່ອນໄຫວຂອງການນຳພັກ-ລັດ, ກົມໃຫຍ່ການເມືອງ, ກົມໃຫຍ່ເສນາທິການ ແລະ ບັນດາກົມກອງອ້ອມຂ້າງໃນທົ່ວກອງທັບ ຈັດຕັ້ງການໂຄສະນາເຜີຍແຜ່ ຢ່າງທັນການ, ພົ້ນເດັ່ນ ແລະ ມີຄຸນນະພາບສູງ ຖືກຕາມກຳນົດທິດ ແລະ ຈຸດປະສົງ, ເປົ້າໝາຍ ໃນບັນດາສື່ສິ່ງພິມ ຂອງກອງທັບປະຊາຊົນຫວຽດນາມ. ການໄຈ້ແຍກບັນຫາຂ່າວສະຖານະການ, ການເມືອງ, ຕ່າງປະເທດ, ພາຍໃນກຳລັງປະກອບອາວຸດ ແລະ ມີນັກຂ່າວຫຼາຍຄົນ ໄດ້ລົງເກັບກຳຂ່າວຢູ່ພື້ນທີ່ທຸລະກັນດານ, ບ່ອນພະຍາດແຜ່ລະບາດ, ໄພພິບັດທຳມະຊາດ, ພາຍຸ, ນ້ຳຖ້ວມ ພ້ອມກັບເພື່ອນຮ່ວມງານທີ່ປະຈຳຢູ່ທົ່ວທຸກບ່ອນ. ໄປຄຽງຄູ່ກັນນັ້ນ, ໜັງສືພິມກອງທັບປະຊາຊົນ ຫວຽດນາມ ໄດ້ຕັ້ງໜ້າຈັດຕັ້ງບັນດາກອງປະຊຸມ, ສຳມະນາ, ການໂອ້ລົມ, ສົນທະນາ ການແຂ່ງຂັນການຂຽນບົດ-ຂ່າວ ທີ່ມີລັກສະນະກຳນົດທິດຫາງສຽງສັງຄົມ ແລະ ອື່ນໆ ເນື່ອງໃນໂອກາດເຫດການໃຫຍ່ ແລະ ສຳຄັນຂອງປະເທດ ປະກອບສ່ວນຢັ້ງຢືນ, ຮັກສາ, ສ້າງຄວາມເຊື່ອໝັ້ນ ເຮັດໃຫ້ຮູບພາບການເຄື່ອນໄຫວຂອງກຳລັງທະຫານ ໃສແຈ້ງໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ.
ໃນໂອກາດນີ້, ທ່ານ ໂອລໍາ ຈັນທະວິໄລ ຕາງໜ້າໃຫ້ຄະນະຝຶກອົບຮົມສື່ມວນຊົນລາວ ໄດ້ກ່າວສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນຈາກຄະນະນໍາໜັງສືພິມກອງທັບປະຊາຊົນຫວຽດນາມ ໃນຄັ້ງນີ້, ພ້ອມທັງມີຄໍາເຫັນແລຫປ່ຽນກັບໜັງສືພິມ ກອງທັບປະຊາຊົນ ຫວຽດນາມ ແລະ ບັນດາອົງການສື່ມວນຊົນລາວ ສືບຕໍ່ເພີ່ມທະວີການຮ່ວມມືໃນການບໍາລຸງສ້າງ, ຝຶກອົບຮົມບັນດານັກຂ່າວ, ບັນນາທິການ, ແບ່ງປັນຂໍ້ມູນຂ່າວສານ ແລະ ແລກປ່ຽນບົດຮຽນດ້ານວິຊາສະເພາະ ເພື່ອປະຕິບັດໜ້າທີ່ໂຄສະນາຂອງອົງການສື່ມວນຊົນສອງປະເທດ ໃຫ້ນັບມື້ດີຂຶ້ນ, ປະກອບສ່ວນເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລາວ-ຫວຽດນາມ, ຫວຽດນາມ-ລາວ ໃຫ້ຂຽວສົດງົດງາມ, ໝັ້ນຄົງຂະນົງແກ່ນໄປຊົ່ວກາລະນານ.
ໂດຍ: ຕຽງຄໍາ ສີປະເສີດ
ຄໍາເຫັນ