ທີ່ສຳນັກງານໜັງສືພິມປະຊາຊົນໄດ້ຈັດກອງປະຊຸມພົບປະ 2 ຝ່າຍລະຫວ່າງ ໜັງສືພິມປະຊາຊົນ ສຽງຂອງສູນກາງພັກ ກັບ ສະມາຄົມນັກຂ່າວ ສສ ຫວຽດນາມ ຊຶ່ງຝ່າຍລາວນຳໂດຍສະຫາຍວັນໄຊ ຕະວິນຍານ ຮອງຫົວໜ້າຄະນະໂຄສະນາອົບຮົມສູນກາງພັກ ຫົວໜ້າບັນນາທິການໃຫຍ່ໜັງສືພິມປະຊາຊົນ, ຝ່າຍຫວຽດນາມນໍາໂດຍ ສະຫາຍ ຫງວຽນດຶກ ເລີ້ຍ ຮອງປະທານສະມາຄົມນັກຂ່າວ ສສ ຫວຽດນາມ ພ້ອມດ້ວຍຄະນະ, ມີຄະນະບັນນາທິການ, ຫົວໜ້າພະແນກຂອງໜັງສືພິມປະຊາຊົນເຂົ້າຮ່ວມ.
ການພົບປະຄັ້ງນີ້, ສະແດງໃຫ້ເຫັນເຖິງຄວາມສາມັກຄີຮັກແພງອັນສະໜິດສະສົມ, ເປັນການເສີມຂະຫຍາຍມູນເຊື້ອຄວາມສາມັກຄີແບບພິເສດ,ການພົວພັນຮ່ວມມືຮອບດ້ານລະຫວ່າງສອງພັກ-ສອງລັດ ແລະ ປະຊາຊົນສອງຊາດລາວ-ຫວຽດນາມທີ່ມີມາແຕ່ດົນນານແລ້ວນັ້ນໃຫ້ໝັ້ນຄົງຂະໜົງແກ່ນຕະຫຼອດໄປ.ເວົ້າລວມ,ເວົ້າສະເພາະລະຫວ່າງໜັງສືພິມປະຊາຊົນ ແລະ ສະມາຄົມນັກຂ່າວ ສສ ຫວຽດນາມໃຫ້ມີການພົວພັນຮ່ວມມືອັນດີງາມຂຶ້ນໄປເລື້ອຍໆ.
ໂອກາດນີ້, ສະຫາຍວັນໄຊ ຕະວິນຍານ ຍັງໄດ້ລາຍງານຫຍໍ້ການເຄື່ອນໄຫວຂອງໜັງພິມປະຊາຊົນ ໃນເມື່ອກ່ອນ ກໍຄືໃນໄລຍະຕໍ່ສູ້ກູ້ຊາດຈົນເຖິງປັດຈຸບັນຄື: ໄລຍະທີ 1 ໃນປີ 1950-1956 ມີຊື່ວ່າ ລາວອິດສະຫຼະ; ໄລຍະທີ 2 ໃນປີ 1956-1975 ລາວຮັກຊາດ; ໄລຍະທີ 3 ໃນປີ 1975-1983 ສຽງປະຊາຊົນ; ໄລຍະທີ 4 ໃນປີ 1983 ຮອດປັດຈຸບັນມີຊື່ວ່າ ໜັງສືພິມປະຊາຊົນ. ມາຮອດວັນທີ 25 ສິງຫາ 2022 ໜັງສືພິມປະຊາຊົນໄດ້ໂອນມາຂຶ້ນກັບຄະນະໂຄສະນາອົບຮົມສູນກາງພັກ. ປັດຈຸບັນໜັງສືພິມປະຊາຊົນພິມມື້ໜຶ່ງ 1.300 ສະບັບແຈກຢາຍທົ່ວປະເທດມີລະບົບເວັບໄຊ ແລະ ເຟດບຸກ. ສໍາລັບປີ 2023 ມີຄົນເຂົ້າເບິ່ງເວັບໄຊເກືອບ 18 ພັນຄົນ, ເຟດສບຸກ 835.900 ກວ່າຄົນ.ສະເລ່ຍເກືອບ 3.000 ຄົນຕໍ່ມື້. ໃນນັ້ນ, ຍັງໃຫ້ຮູ້ຂໍ້ສະດວກ ແລະ ຂໍ້ຫຍຸ້ງຍາກຫຼາຍດ້ານແລະສິ່ງທ້າທາຍໃນໄລຍະຜ່ານມາ. ໜັງສືພິມເຢິນເຢີນ ສສ ຫວຽດນາມໄດ້ໃຫ້ການຊ່ວຍເຫຼືອໜັງສືພິມປະຊາຊົນຕະຫຼອດມາ. ນັບແຕ່ການຝຶກອົບຮົມຍົກລະດັບດ້ານວິຊາການ, ການຕອບສະໜອງດ້ານພື້ນຖານວັດຖຸເຕັກນິກ. ເມື່ອບໍ່ດົນມານີ້, ໜັງສືພິມເຢິນເຢີນ ສສ ຫວຽດນາມຍັງໄດ້ສົ່ງວິຊາການມາຊ່ວຍປັບປຸງລະບົບເວັບໄຊໃຫ້ກັບໜັງສືພິມປະຊາຊົນ ແລະ ໄດ້ສົ່ງນັກຂ່າວຈໍານວນໜຶ່ງໄປຝຶກອົບຮົມການນໍາໃຊ້ເວັບໄຊຢູ່ຮ່າໂນ້ຍ.
ສະຫາຍວັນໄຊ ຕະວິນຍານ ໄດ້ສະເໜີມາຍັງສະມາຄົມນັກຂ່າວ ສສ ຫວຽດນາມ ຖ້າມີການຈັດຝຶກອົບຮົມໃຫ້ຊ່ວຍຍົກລະດັບທາງດ້ານວິຊາສະເພາະໃນການວິເຄາະຂ່າວ, ການຂຽນບົດປະເພດຕ່າງໆ ແລະ ຍົກລະດັບໄອທີໃຫ້ກັບນັກຂ່າວ ແລະ ອວຍພອນໃຫ້ສະຫາຍ ຫງວຽນດຶກ ເລີ້ຍ ພ້ອມຄະນະຈົ່ງປະສົບຜົນສໍາເລັດໃນການເຮັດວຽກ ແລະ ຢ້ຽມຢາມລາວໃນຄັ້ງນີ້.
ໂອກາດນີ້, ສະຫາຍ ຫງວຽນດຶກ ເລີ້ຍ ໄດ້ສະແດງຄວາມຂອບໃຈທີ່ໃຫ້ການຕ້ອນຮັບຢ່າງອົບອຸ່ນ, ພ້ອມລາຍງານໃຫ້ຊາບໃນການມາເຄື່ອນໄຫວເຮັດວຽກແລະ ຢ້ຽມຢາມ ສປປ ລາວໃນຄັ້ງນີ້ພ້ອມຢືນຢັນວ່າ ຈະສືບຕໍ່ໃຫ້ການຊ່ວຍເຫຼືອ-ຮ່ວມມືດ້ານຕ່າງໆໂດຍສະເພາະຊ່ວຍເຫຼືອດ້ານອຸປະກອນ, ການຝຶກອົບຮົມນັກຂ່າວ ແລະ ອື່ນໆໃນຕໍ່ໜ້າ.
ຂ່າວ-ພາບ: ວັນເພັງ
ຄໍາເຫັນ