 |
ໃນພິທີ, ທ່ານ ຫຸມພັນ ແກ້ວອຸ່ນຄໍາ ຮອງຫົວໜ້າກົມສາມັນສຶກສາ ກະຊວງ ສສກ ໄດ້ກ່າວສະແດງຄວາມຂອບໃຈຕໍ່ຄະນະຮັບຜິດຊອບຝ່າຍຈີນ ທີ່ໃຫ້ການຕ້ອນຮັບຄະນະຜູ້ແທນລາວຄັ້ງນີ້ຢ່າງອົບອຸ່ນ, ກິດຈະກຳຄັ້ງນີ້ຈັດຂຶ້ນໃນທາມກາງທີ່ສອງພັກ, ສອງລັດ ລາວ-ຈີນ, ຈີນ-ລາວ ກໍາລັງສະເຫຼີມສະຫຼອງວັນຄົບຮອບ 65 ປີ (25 ເມສາ 1961) ແຫ່ງການສ້າງຕັ້ງສາຍພົວພັນທາງການທູດ ລະຫວ່າງລາວ-ຈີນ ແລະ ປີມິດຕະພາບລາວ-ຈີນ ຊຶ່ງເປັນການສືບຕໍ່ປະກອບສ່ວນເສີມຂະຫຍາຍສາຍພົວພັນການຮ່ວມມື ແລະ ການຊ່ວຍເຫຼືອ ຊຶ່ງກັນ ແລະ ກັນ ລະຫວ່າງ ສປປ ລາວ - ສປ ຈີນ. ເວົ້າລວມ, ເວົ້າສະເພາະເປັນການສືບຕໍ່ເສີມຂະຫຍາຍສາຍພົວພັນຮ່ວມມືດ້ານການສຶກສາວິທະຍາສາດ ແລະ ກິລາ ກັບແຂວງ ຢຸນນານ ໃຫ້ນັບມື້ນັບເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງ.
 |
ການຈັດກິດຈະກຳໃນຄັ້ງນີ້ຂຶ້ນບໍ່ພຽງແຕ່ເປັນການສ້າງໂອກາດໃຫ້ບັນດານັກຮຽນຂອງສອງປະເທດໄດ້ຮຽນຮູ້ພາສາ, ວັດທະນະທຳ, ປະເພນີພື້ນເມືອງບັນດາເຜົ່າ ແລະ ການພັດທະນາເສດຖະກິດ-ສັງຄົມ ຂອງແຂວງຢຸນນານ ເທົ່ານັ້ນ, ແຕ່ຍັງເປັນການສົ່ງເສີມໃຫ້ຊາວໜຸ່ມຈີນ-ລາວ ມີຄວາມເຂົ້າອົກເຂົ້າໃຈ ຊຶ່ງກັນ ແລະ ກັນ, ຮູ້ຈັກຮັກແພງສາມັກຄີກັນ ແລະ ຊ່ວຍເຫຼືອຊຶ່ງກັນ ແລະ ກັນ ອີກດ້ວຍ ແລະ ເຊື່ອໝັ້ນວ່າບັນດານັກຮຽນທີ່ໄດ້ເຂົ້າຮ່ວມກິດຈະກຳຈະກາຍເປັນຜູ້ສືບທອດພາລະກິດ ແລະ ມິດຕະພາບຂອງສອງປະເທດໃຫ້ໝັ້ນຄົງຂະໜົງແກ່ນຕະຫຼອດກາລະນານ.
ທ່ານ ອຸ່ນ ຈືສົງ ກ່າວວ່າ: ນັກຮຽນທີ່ເຂົ້າຮ່ວມກິດຈະກຳທຸກຄົນ, ຈົ່ງພ້ອມກັນນໍາເອົາສິ່ງທີ່ໄດ້ເຫັນ, ໄດ້ຍິນ ແລະ ໄດ້ສໍາຜັດໄປແລ້ວ ແບ່ງປັນສົ່ງຕໍ່ໃຫ້ຄອບຄົວ ແລະ ໝູ່ເພື່ອນຮັບຮູ້. ພ້ອມນັ້ນ, ຈະເປັນຜູ້ສົ່ງເສີມການຖອດຖອນບົດຮຽນຊຶ່ງກັນ ແລະ ກັນທາງດ້ານອະລິຍະທໍາ ແລະ ຫວັງວ່ານັກຮຽນຈະໄດ້ຮຽນຮູ້ສິ່ງໃໝ່ໆ ເພື່ອກ້າວໄປສູ່ອະນາຄົດອັນຍາວໄກ, ຍົກສູງຂີດຄວາມສາມາດຮອບດ້ານ ແລະ ເປັນຜູ້ປະຕິບັດຕົວຈິງໃນຄູ່ຮ່ວມຊາຕາກຳລາວ-ຈີນ, ຈີນ-ລາວ; ຈະເປັນຜູ້ຊຸກຍູ້ພັດທະນາໂດຍສັນຕິ, ວັດທະນະທໍາພື້ນເມືອງລາວ-ຈີນ ແລະ ມີຄວາມສະແຫວງຫາສັນຕິພາບເປັນສິ່ງລໍ້າຄ່າ.
 |
ໃນວັນດຽວກັນນີ້, ບັນດາຄະນະຜູ້ແທນກະຊວງ ສສກ, ພ້ອມຄະນະອໍານວຍການ, ນັກຮຽນ 3 ໂຮງຮຽນດັ່ງກ່າວ, ຍັງໄດ້ໄປທັດສະນະສຶກສາຫໍພິພິທະພັນແຂວງຢຸນນານ ແລະ ໄປທັດສະນະສຶກສາຫໍພິພິຕະພັນທາງລົດໄຟແຂວງຢຸນນານ ທັງນີ້ກໍເພື່ອໃຫ້ນັກຮຽນໄດ້ສໍາຜັດ ແລະ ຮັບຮູ້-ເຂົ້າໃຈກ່ຽວກັບປະຫວັດຄວາມເປັນມາຂອງທາງລົດໄຟແຂວງຢຸນນານໃຫ້ຫຼາຍຂຶ້ນ ໂດຍສະເພາະກ່ຽວກັບເລື່ອງລາວເສັ້ນທາງລົດໄປລາວ-ຈີນໃນປັດຈຸບັນ.
ຂ່າວ-ພາບ: ວັນເພັງ
ຄໍາເຫັນ