ນິຄອນ-ໄຈກາມອບທຶນການສຶກສາ ໃຫ້ແກ່ນັກສຶກສາ ຈໍານວນ 40ຄົນ

ມະຫາວິທະຍາໄລສະຫວັນນະເຂດ ວິທະຍາເຂດໜອງຜື, ມີພິທີມອບ-ຮັບທຶນການສຶກສາຈາກ NIKON-JICA (ນິຄອນ-ໄຈກາ) ໃຫ້ແກ່ນັກສຶກສາ ມະຫາວິທະຍາໄລສະຫວັນນະເຂດ ປະຈໍາສົກ 2023-2024ໃນວັນທີ 6 ທັນວາ ນີ້, ເຂົ້າຮ່ວມເປັນປະທານມີ ທ່ານ ທົງສະຫວັດ ລຽບວິໄຊນະວັງ ຫົວໜ້າຈັດຕັ້ງ-ກວດກາ ມະຫາວິທະຍາໄລສະຫວັນນະເຂດ ທັງເປັນປະທານຄະນະກໍາມະການຮັບຜິດຊອບກອງທຶນ, ທ່ານ ໂນລິຢູກິ ອິໂຕະ ຮອງຫົວໜ້າອົງການໄຈກາ ແລະ ທ່ານ ນາງ ຢຸກະໂກະ ຢະມະດະ ຫົວໜ້າພະແນກຝ່າຍຄວາມຍືນຍົງຂອງອົງກອນ, ພ້ອມມີບັນດາທ່ານຄະນະບໍດີ, ຄະນະກໍາມະການຮັບຜິດຊອບກອງທຶນ, ຄູ-ອາຈານ ແລະນັກສຶກສາ ເຂົ້າຮ່ວມ.
      ໂອກາດນີ້, ທ່ານ ທົງສະຫວັດ ລຽບວິໄຊນະວັງ ກ່າວຕໍ່ພິທີຄັ້ງນີ້ວ່າ: ການມອບ-ຮັບທຶນການສຶກສາຈາກ ບໍລິສັດນິຄອນຜ່ານອົງການໄຈກາປະຈໍາລາວ ໃຫ້ນັກສຶກສາ ມະຫາວິທະຍາໄລສະຫວັນນະເຂດ ແຂວງສະຫວັນນະເຂດ ເປັນການປະກອບສ່ວນທີ່ສໍາຄັນຫຼາຍໃນການພັດທະນາຊັບພະຍາກອນມະນຸດຂອງ ສປປ ລາວ ໂດຍສະເພາະແມ່ນການສະໜັບສະໜູນທຶນການສຶກສາໃຫ້ນັກສຶກສາຂອງ ມະຫາວິທະຍາໄລສະຫວັນນະເຂດ ຈໍານວນ 40 ຄົນ, ນັກສຶກສາຈໍານວນດັ່ງກ່າວ ລ້ວນແຕ່ເປັນຜູ້ທີ່ມີຄວາມຕັ້ງໃຈສູງ ມີຄະແນນດີ, ດ້ອຍໂອກາດ ຄອບຄົວຂາດເຂີນ, ມີຄຸນສົມບັດດີເຊັ່ນ: ຢຶດຖື 3 ລັກສະນະ ແລະ 5 ຫຼັກມູນຂອງການສຶກສາແຫ່ງຊາດ ເປັນພື້ນຖານໃນການຄັດເລືອກ. ເຖິງຢ່າງໃດກໍຕາມການສະ
ໜັບສະໜູນທຶນຄັ້ງນີ້ ຈະໄດ້ມີການຕິດຕາມກວດກາຜົນຄວາມຄືບໜ້າ ຂອງການຮຽນຂອງນັກສຶກສາກຸ່ມນີ້ຢ່າງໃກ້ຊິດ ເພື່ອໃຫ້ທຶນດັ່ງກ່າວໄດ້ປະໂຫຍດສູງສຸດ, ໃນອະນາຄົດຄະນະນໍາຂອງມະຫາວິທະຍາໄລສະຫວັນນະເຂດ ຈະໄດ້ເອົາໃຈໃສ່ສືບຕໍ່ຮ່ວມມືໃນດ້ານອື່ນໆ ກັບບໍລິສັດໂດຍຜ່ານຊ່ຽວຊານໄຈກາ ທີ່ເຮັດວຽກປະຈໍາຢູ່ ມະຫາວິທະຍາໄລສະຫວັນນະເຂດ.
        ໃນນີ້ NIKON-JICA (ນິຄອນ-ໄຈກາ) ໃຫ້ທຶນການສຶກສາ ແກ່ນັກສຶກສາມະຫາວິທະຍາໄລສະຫວັນນະເຂດ ເລີ່ມແຕ່ສົກຮຽນ 2015-2016 ເປັນຕົ້ນມາ, ສົກຮຽນລະ 40 ທຶນ 40 ຄົນ, ທັງນີ້ ກໍເພື່ອເປັນການກະຕຸ້ນໃຫ້ນັກສຶກສາໄດ້ແຂ່ງຂັນກັນສຶກສາຮໍ່າຮຽນ, ແຂ່ງຂັນກັນເຄື່ອນໄຫວວຽກງານນອກຫຼັກສູດເພື່ອຫວັງຊີງເອົາທຶນການສຶກສາ, ເປັນການປະກອບສ່ວນອັນໃຫຍ່ຫຼວງ ໃນການສ້າງຊັບພະຍາກອນມະນຸດໄປພັດທະນາປະເທດຊາດ, ເປັນການແບ່ງເບົາຄ່າໃຊ້ຈ່າຍໃນການຮໍ່າຮຽນຂອງຜູ້ປົກຄອງນັກສຶກສາ, ເປັນການຊ່ວຍເຫຼືອ ແລະໃຫ້ໂອກາດແດ່ຜູ້ທີ່ດ້ອຍໂອກາດຄອບຄົວທຸກຍາກ, ຊົນເຜົ່າ ແຕ່ເປັນຜູ້ທີ່ຮຽນດີ-ຮຽນເກັ່ງ.
(ຂ່າວ-ພາບ:ແຂວງສະຫວັນນະເຂດ)