 |
ສອງຝ່າຍ ໄດ້ແລກປ່ຽນ ແລະ ຕີລາຄາສູງ ກ່ຽວກັບການຮ່ວມມືດ້ານການຄ້າ ໃນໄລຍະຜ່ານມາ ມີການຂະຫຍາຍຕົວຢ່າງຕໍ່ເນື່ອງ ຊຶ່ງສະແດງອອກມູນຄ່າການຄ້າສອງຝ່າຍ ເພີ່ມຂຶ້ນຈາກ 4.34 ຕື້ໂດລາ ໃນປີ 2021 ມາເປັນ 8.80 ຕື້ໂດລາ ໃນປີ 2025. ໃນນີ້, ສິນຄ້າສົ່ງອອກຫຼັກ ປະກອບມີ: ຄໍາປະສົມ (ຄໍາແທ່ງ), ເກືອກາລີ, ເຈ້ຍ, ແຮ່ເຫຼັກ, ຢາງພາລາ, ແປ້ງມັນຕົ້ນ, ແລະ ໝາກໄມ້. ສິນຄ້ານໍາເຂົ້າຫຼັກປະກອບມີ: ອຸປະກອນກົນຈັກ, ຜະລິດຕະພັນເຄມີ, ພາຫະນະທາງບົກ, ເຫຼັກກ້າ, ເຄື່ອງໄຟຟ້າ, ແລະ ຝຸ່ນ (ປຸຍ).
ບົນພື້ນຖານການຮ່ວມມືທີ່ຂະຫຍາຍຕົວດັ່ງກ່າວ ສອງຝ່າຍໄດ້ປຶກສາຫາລື ແລະ ຕົກລົງ ໃນ 3 ບັນຫາ ທີ່ມີລັກສະນະຍຸດທະສາດ ເພື່ອປົດລັອກການຄ້າ-ການລົງທຶນຍຸກໃໝ່ ດັ່ງນີ້: ສອງຝ່າຍເຫັນດີໃຫ້ເລັ່ງທົບທວນ ແລະ ຍົກລະດັບສັນຍາການຄ້າ ລາວ-ຈີນ ທີ່ໄດ້ລົງນາມໄວ້ ຕັ້ງແຕ່ປີ 1998 ເພື່ອໃຫ້ສອດຄ່ອງກັບສະພາບເສດຖະກິດປັດຈຸບັນ ແລະ ມອບໝາຍໃຫ້ໜ່ວຍງານທີ່ກ່ຽວຂ້ອງລົງເລິກປຶກສາຫາລື ປັບປຸງເນື້ອໃນສັນຍາການຄ້າດັ່ງກ່າວ ໃຫ້ແທດເໝາະກັບເງື່ອນໄຂໃໝ່ ໂດຍສະເພາະການເຂົ້າເຖິງຕະຫຼາດ, ການຄ້າທາງເອເລັກໂຕຣນິກ, ການອຳນວຍຄວາມສະດວກດ້ານການຄ້າ ແລະ ການຊໍາລະສະສາງ ໃນການຊື້-ຂາຍ ສິນຄ້າ.
ສອງຝ່າຍໄດ້ເປັນເອກະພາບຈະລົງເລິກຄົ້ນຄວ້າ ໃນການເພີ່ມການສະໜອງນ້ຳມັນເຊື້ອໄຟຈາກຈີນໄປລາວໃຫ້ຫຼາຍຂຶ້ນ ເພື່ອສ້າງຄວາມໝັ້ນຄົງດ້ານພະລັງງານໃຫ້ແກ່ ສປປ ລາວ ໄປຄຽງຄູ່ກັບການສົ່ງເສີມການຫັນປ່ຽນໄປສູ່ພະລັງງານໃໝ່ ແລະ ການນຳໃຊ້ຍານພາຫະນະໄຟຟ້າ (EV) ທີ່ ສປ ຈີນ ມີທ່າແຮງ ແລະ ມີຄວາມກ້າວໜ້າ ໃນລະດັບໂລກ. ນອກຈາກນີ້ ຍັງໄດ້ແລກປ່ຽນກ່ຽວກັບການນຳໃຊ້ເສັ້ນ ທາງລົດໄຟ ລາວ-ຈີນ ເພື່ອຫຼຸດຕົ້ນທຶນດ້ານໂລຈິສຕິກ ແລະ ການຂົນສົ່ງ; ສອງຝ່າຍເຫັນດີຊຸກຍູ້ການຮ່ວມມືດ້ານການຂຸດຄົ້ນ ແລະ ປຸງແຕ່ງຊັບພະຍາກອນແຮ່ທາດ ຢູ່ ສປປ ລາວ ແລະ ຍິນດີລົງເລິກຄົ້ນຄວ້າກົນໄກ ການສະໜັບສະໜູນອຸດສາຫະກຳປຸງແຕ່ງຝຸ່ນປະສົມ NPK ຂອງລາວ ໂດຍສະເພາະແມ່ນການນຳໃຊ້ທ່າແຮງດ້ານແຮ່ທາດທີ່ລາວມີເຊັ່ນ: ເກືອກາລີ/ໂປຕັສ ທີ່ສົ່ງອອກໄປຈີນ ແລະ ການນຳເຂົ້າທາດປະສົມຟົດສຟໍຣາດຊ ແລະ ໄນໂຕຣເຈັນ ທີ່ລາວຂາດແຄນ ຈາກ ສປ ຈີນ ເພື່ອເລັ່ງສ້າງໂຮງງານຜະລິດຝຸ່ນປະສົມ NPK ຢູ່ ສປປ ລາວ ໃຫ້ເກີດຂຶ້ນຈິງ ແນໃສ່ຮັບປະກັນການສະໜອງໃຫ້ແກ່ການຜະລິດກະສິກຳ ແລະ ສ້າງຄວາມໝັ້ນຄົງດ້ານສະບຽງອາຫານ.
ສອງຝ່າຍຍັງເຫັນດີຊຸກຍູ້ການຮ່ວມມື ແລະ ພັດທະນາບໍ່ແຮ່ ທີ່ ສປປ ລາວ ໂດຍສະເພາະການຂຸດຄົ້ນ, ປຸງແຕ່ງແຮ່ທາດ ເພື່ອສ້າງມູນຄ່າເພີ່ມ, ສ້າງວຽກເຮັດງານທໍາ ແລະ ຊ່ວຍສ້າງພະນັກງານ-ວິຊາການດ້ານເຕັກນິກ, ການສໍາຫຼວດ, ການຂຸດຄົ້ນ ແລະ ການປຸງແຕ່ງແຮ່ທາດ; ນອກນັ້ນ, ສອງຝ່າຍຍັງໄດ້ແລກປ່ຽນ ແລະ ເຫັນດີເປັນເອກະພາບຄົ້ນຄວ້າກົນໄກການຮ່ວມສອງຝ່າຍໃນຕໍ່ໜ້າ ເປັນຕົ້ນການເພີ່ມທະວີການຮ່ວມມືເສດຖະກິດຕ່ອງໂສ້ການຜະລິດ ແລະ ການສະໜອງ; ຮ່ວມມືດ້ານແຮ່ທາດສີຂຽວ ແລະ ການຈັດຕັ້ງປະຕິບັດພັນທະສາກົນທີ່ທັງສອງຝ່າຍເປັນພາຄີ.
ການພົບປະລະຫວ່າງ ລັດຖະມົນຕີການຄ້າ ລາວ-ຈີນ ຄັ້ງນີ້ ຖືເປັນການຜັນຂະຫຍາຍທິດການຮ່ວມມືບົນພື້ນຖານແຫ່ງຄວາມໄວ້ເນື້ອເຊື່ອໃຈທາງການເມືອງອັນໜັກແໜ້ນ ພາຍໃຕ້ທິດທາງການເປັນຄູ່ຮ່ວມຍຸດທະສາດຮອບດ້ານ ໝັ້ນຄົງຍາວນານຕາມທິດ 4 ດີ ແລະ ການຮ່ວມມືສ້າງຄູ່ຮ່ວມຊາຕາກຳ ລາວ-ຈີນ ໃຫ້ເກີດດອກອອກຜົນ ເປັນຮູບປະທຳ ນັບມື້ນັບເພີ່ມທະວີຫຼາຍຂຶ້ນ.
(ແຫຼ່ງຂ່າວ: ອຄ)
ຄໍາເຫັນ