 |
ກອງປະຊຸມຄັ້ງນີ້, ໄດ້ເນັ້ນໜັກໃສ່ການພັດທະນາລະບົບການພັດທະນາວິຊາຊີບຄູແບບຕໍ່ເນື່ອງ (CPD) ໃນລະດັບໂຮງຮຽນ ໂດຍຜູ້ເຂົ້າຮ່ວມໄດ້ແລກປ່ຽນບົດຮຽນ ຈາກການດຳເນີນງານໃນໄລຍະຜ່ານມາ ພ້ອມກັບການວາງແຜນລະອຽດສຳລັບ 2 ປີເຄິ່ງຂ້າງໜ້າ ໃນການຂະຫຍາຍໄລຍະທີ 2 ຂອງແຜນງານ.
ທ່ານ ເພັດມະນີ ສີລັດມີນາ ໄດ້ກ່າວວ່າ: ລະບົບ CPD ທີ່ຖືກພັດທະນາ ໄດ້ສອດຄ່ອງກັບຄວາມຕ້ອງການຂອງຄູ ໂດຍເນັ້ນໃສ່ການມີສ່ວນຮ່ວມໃນທຸກລະດັບ ພາຍໃຕ້ການນຳພາຂອງກົມສ້າງຄູ ແລະ ການສະໜັບສະໜູນຈາກພາກສ່ວນຕ່າງໆ ລະບົບນີ້ໄດ້ຖືກນຳໃຊ້ໃນ 30 ເມືອງເປົ້າໝາຍ ໃນ 7 ແຂວງ ເພື່ອຊ່ວຍເຫຼືອຄູຢ່າງຕໍ່ເນື່ອງ.
 |
ທ່ານ ນາງ ເຮເບັກກ້າ ແມັກຮິວ ກ່າວວ່າ: ການພັດທະນາຄູແບບຕໍ່ເນື່ອງ ແມ່ນກຸນແຈສຳຄັນໃນການແກ້ໄຂບັນຫາຂາດແຄນຄູ ແລະ ຍົກລະດັບທັກສະການສອນລະບົບ CPD ຊ່ວຍໃຫ້ຄູໃນເຂດຫ່າງໄກ ໄດ້ຮັບການນຳພາ ແລະ ຄຳແນະນຳຢ່າງສະໝໍ່າສະເໝີ.
ຜົນການດຳເນີນງານໄດ້ສະທ້ອນໃຫ້ເຫັນຢ່າງຊັດເຈນ ໂດຍໃນພາກຮຽນທຳອິດປີ 2025–2026 ໄດ້ມີການຈັດກິດຈະກຳ CPD ກວ່າ 33,609 ຄັ້ງ, ສະໜັບສະໜູນຄູປະຖົມ 6,930 ຄົນ ແລະ ມີການຕິດຕາມປະເມີນຜົນຫຼາຍພັນຄັ້ງ ຄູມີຄວາມໝັ້ນໃຈສູງຂຶ້ນ ແລະ ນັກຮຽນ ກໍມີສ່ວນຮ່ວມໃນການຮຽນຫຼາຍຂຶ້ນ ພ້ອມທັງພັດທະນາດ້ານສັງຄົມ ອາລົມດີຂຶ້ນ. ນອກນັ້ນ, ກອງປະຊຸມຍັງໄດ້ຫາລືເຖິງທິດທາງຂອງໄລຍະທີ 2 ໂດຍເນັ້ນໃສ່ການຄົ້ນຄວ້າ ຄວາມສະເໝີພາບຍິງ-ຊາຍ ແລະ ການສ້າງໂອກາດໃຫ້ແມ່ຍິງ ພ້ອມທັງຮັບຮອງແຜນວຽກປີ 2026–2027 ແລະ ແຜນລະອຽດໄລຍະເດືອນເມສາ ຫາກັນຍາ 2026 ຊຶ່ງໃນຂັ້ນຕໍ່ໄປບັນດາ ວຄ ແລະ ສກຂ ຈະນຳໃຊ້ແຜນທີ່ໄດ້ຮັບຮອງ ເພື່ອຂະຫຍາຍການນຳໃຊ້ CPD ໃນໂຮງຮຽນໃຫ້ກວ້າງຂວາງຂຶ້ນ. ໃນຂະນະທີ່ ສສກ ແລະ ຄູ່ຮ່ວມພັດທະນາ ຈະສືບຕໍ່ປະສານງານ ເພື່ອສ້າງລະບົບທີ່ຍືນຍົງ ແລະ ຄອບຄຸມທົ່ວປະເທດ. ການຮ່ວມມືຄັ້ງນີ້, ສະທ້ອນໃຫ້ເຫັນເຖິງພະລັງການຮ່ວມແຮງຮ່ວມໃຈ ລະຫວ່າງ ສປປ ລາວ ແລະ ອົສຕຣາລີ ໃນການຍົກຄຸນນະພາບການສຶກສາ ແລະ ສ້າງອະນາຄົດທີ່ດີໃຫ້ເດັກນ້ອຍລາວ.
ຂ່າວ: ແຜນງານບີຄວາ
ຄໍາເຫັນ