ການພົບປະກັນຄັ້ງນີ້, ເພື່ອປຶກສາຫາລືການຮ່ວມມືຮັກສາຄວາມສະຫງົບຕາມແນວຊາຍແດນ ລະຫວ່າງ ເມືອງປາກກະດິງ ແຂວງບໍລິຄຳໄຊ ສປປ ລາວ ແລະ ອຳເພີບຸ່ງຄ້າ ຈັດຫວັດບຶງການ ຣາຊະອານາຈັກໄທ. ໃນການພົບປະ, ຕາງໜ້າຜູ້ແທນທັງສອງຝ່າຍໄດ້ລາຍງານສະພາບລວມໂດຍຫຍໍ້ ແລະ ສະເໜີບາງຫົວຂໍ້ເພື່ອປຶກສາຫາລືແລກປ່ຽນບົດຮຽນຮ່ວມກັນ ເປັນຕົ້ນແມ່ນ: ວຽກງານຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍຕາມແນວຊາຍແດນ, ການກວດກາຄົນ ເຂົ້າ-ອອກ ເມືອງ, ຫາລືປັບປຸງການຂົນສົ່ງໂດຍສານທາງນ້ຳໃຫ້ມີຄວາມປອດໄພ, ຫາລືຄວາມເປັນໄປໄດ້ໃນການທ່ອງທ່ຽວທາງນ້ຳ ແລະ ປຶກສາຫາລືຫາເງື່ອນໄຂໃຫ້ມີການຈັດສັນຕະຫຼາດ ຊື້-ຂາຍ ແລກປ່ຽນສິນຄ້າຮ່ວມກັນ ລະຫວ່າງເມືອງປາກກະດິງ ແລະ ອຳເພີບຸ່ງຄ້າ.
ໃນໂອກາດນີ້, ທັງສອງຝ່າຍຍັງໄດ້ມອບຂອງທີລະນຶກໃຫ້ເຊີ່ງກັນ ແລະ ກັນ ແລະ ແຂ່ງຂັນກິລາບານເຕະ ແລະ ກິລາເປຕັ່ງ ມິດຕະພາບ ເພື່ອຫັດແໜ້ນຄວາມສາມັກຄີ ລະຫວ່າງ ປະຊາຊົນສອງຊາດ ລາວ-ໄທ ທີ່ເປັນປະເທດບ້ານໃກ້ເຮືອນຄຽງ ເວົ້າລວມ, ເວົ້າສະເພາະແມ່ນ: ເມືອງປາກກະດິງ ແລະ ອຳເພີບຸ່ງຄ້າ ໃຫ້ມີຄວາມສຳພັນກັນຍິ່ງໆຂຶ້ນ.
(ຂ່າວ: ແສງທອງ)
ຄໍາເຫັນ