ການພົບປະຄັ້ງນີ້, ຄະນະຜູ້ແທນເມືອງປາກກະດິງ ນຳພາໂດຍທ່ານ ດາວ ດວງພະຈັນ ຮັກສາການຮອງເຈົ້າເມືອງປາກກະດິງ, ຄະນະຜູ້ແທນອຳເພີບຶງໂຂງຫຼົງ ນຳພາໂດຍທ່ານ ທະວີ ຊີນນະຣົງ ນາຍອຳເພີ ພ້ອມດ້ວຍຄະນະ. ໃນການພົບປະ ທັງສອງຝ່າຍໄດ້ມີການປຶກສາຫາລືການຮ່ວມມືວຽກງານຊາຍແດນ ລາວ-ໄທ ລະຫວ່າງ ເມືອງປາກກະດິງ ແລະ ອຳເພີ ບຶງໂຂງຫຼົງ. ຊຶ່ງຕາງໜ້າຜູ້ແທນທັງສອງຝ່າຍໄດ້ລາຍງານສະພາບລວມໂດຍຫຍໍ້ ແລະ ສະເໜີບາງຫົວຂໍ້ເພື່ອປຶກສາຫາລືແລກປ່ຽນບົດຮຽນຮ່ວມກັນ ເປັນຕົ້ນແມ່ນ: ປຶກສາຫາລືການຮັກສາຄວາມສະຫງົບ, ຄວາມເປັນລະບຽບຮຽບຮ້ອຍຕາມແລວຊາຍແດນ ແລະ ບັນຫາຄ້າຂາຍເຖື່ອນ, ປຶກສາຄວາມເປັນໄປໄດ້ໃນການສ້າງດ່ານປະເພນີ ລະຫວ່າງ ບ້ານຂອນ ຂວ້າງ ເມືອງປາກກະດິງ ແລະ ບ້ານທ່າດອກຄໍາ ອຳເພີບຶງໂຂງຫຼົງ, ປຶກສາຫາລື ແລກປ່ຽນຂໍ້ມູນເລື່ອງຊ້າງປ່າ ທີ່ມັກຂ້າມແມ່ນ້ຳຂອງ ໄປ-ມາ ລະຫວ່າງເມືອງປາກກດິງ ແລະ ອຳເພີບຶງໂຂງຫຼົງ ເພື່ອປ້ອງກັນໃຫ້ມີຄວາມປອດໄພຕໍ່ພໍ່ແມ່ປະຊາຊົນທັງສອງເມືອງ. ປຶກສາຫາລື ການອໍານວຍຄວາມສະດວກ ແລະ ຄວາມປອດໄພໃນການເຂົ້າ-ອອກເມືອງໃນກໍລະນີສຸກເສີນ.
(ຂ່າວ: ແສງທອງ)
ຄໍາເຫັນ