 |
ໃນໂອກາດດັ່ງກ່າວ, ທ່ານ ວຽງທະວີສອນ ເທບພະຈັນ ໄດ້ສະແດງຄວາມຍິນດີ ແລະ ຕ້ອນຮັບທ່ານຫົວໜ້າຫ້ອງການກວດສອບອິນເດຍປະຈຳ ຢູ່ ກົວລາລຳເປີ ປະເທດມາເລເຊຍ ທີ່ໄດ້ເດີນທາງມາຢ້ຽມຢາມ ແລະ ພົບປະຫາລືຢ່າງເປັນທາງການ. ພ້ອມດຽວກັນທ່ານກໍໄດ້ສະແດງຄວາມຊົມເຊີຍຕໍ່ຄວາມຕັ້ງໃຈ ແລະ ຄວາມກະຕືລືລົ້ນຂອງຝ່າຍອິນເດຍທີ່ໄດ້ລິເລີ່ມການພົບປະຄັ້ງນີ້ເພື່ອປຶກສາຫາລືເຖິງແຜນການຮ່ວມມືທີ່ມີທ່າອ່ຽງຄວາມເປັນໄປໄດ້ໃນຫຼາຍຂົງເຂດເຊັ່ນ: ການຈັດຝຶກອົບຮົມ, ການສ້າງຂີດຄວາມສາມາດໃຫ້ແກ່ບຸກຄະລາກອນ, ການແລກປ່ຽນຄວາມຮູ້ ແລະ ບົດຮຽນວິຊາຊີບຕະຫຼອດຮອດການຮ່ວມມືດ້ານວິຊາການດ້ານການກວດສອບ.
ການເຂົ້າຢ້ຽມຂ່ຳນັບໃນຄັ້ງນີ້ໄດ້ດຳເນີນໄປດ້ວຍບັນຍາກາດທີ່ເປັນມິດ ແລະ ມີຄວາມໝາຍສະທ້ອນໃຫ້ເຫັນເຖິງເຈດຈຳນົງໃນການພັດທະນາສາຍພົວພັນການຮ່ວມມືດ້ານການກວດສອບໃຫ້ມີຄວາມໃກ້ຊິດ ແລະ ມີປະສິດທິຜົນຫຼາຍຂຶ້ນໃນຕໍ່ໜ້າ. ທ່ານປະທານອົງການກວດສອບແຫ່ງລັດ ຍັງໄດ້ສະແດງຄວາມປິຕິຍິນດີ ແລະ ຄວາມຫວັງເປັນຢ່າງຍິ່ງວ່າທ່ານຫົວໜ້າຫ້ອງການກວດສອບອິນເດຍປະຈຳຢູ່ ກົວລາລຳເປີ ປະເທດມາເລເຊຍ ຈະນຳເອົາຜົນສຳເລັດຂອງການຢ້ຽມຢາມ ແລະ ການປຶກສາຫາລືໃນຄັ້ງນີ້ໄປລາຍງານ ແລະ ຊຸກຍູ້ຕໍ່ອົງການກວດສອບແຫ່ງລັດອິນເດຍເພື່ອພິຈາລະນາສ້າງ ແລະ ຂະຫຍາຍການຮ່ວມມືກັບອົງການກວດສອບແຫ່ງລັດ ສປປ ລາວ ໃນອະນາຄົດ.
ນອກຈາກນັ້ນ, ທ່ານປະທານອົງການກວດສອບແຫ່ງລັດ ຍັງໄດ້ສະແດງຄວາມຂອບໃຈຢ່າງສູງຕໍ່ລັດຖະບານສາທາລະນະລັດອິນເດຍ ທີ່ໄດ້ໃຫ້ການຊ່ວຍເຫຼືອ ແລະ ສະໜັບສະໜູນ ສປປ ລາວ ມາໂດຍຕະຫຼອດ ໂດຍສະເພາະການໃຫ້ທຶນການສຶກສາ, ທຶນຝຶກອົບຮົມ ແລະ ໂຄງການພັດທະນາສັກກະຍະພາບໃນດ້ານຕ່າງໆທີ່ໄດ້ປະກອບສ່ວນສຳຄັນໃນການພັດທະນາຊັບພະຍາກອນມະນຸດ ແລະ ຍົກສູງຄຸນນະພາບການປະຕິບັດວຽກງານຂອງບຸກຄະລາກອນ ສປປ ລາວ.
ໂອກາດດຽວກັນ, ທ່ານ ພີ ວີ ຮາຣິ ກຣິສນາ (Mr. P. V. Hari Krishna) ກໍໄດ້ສະແດງຄວາມຂອບໃຈຢ່າງຈິງໃຈຕໍ່ທ່ານປະທານອົງການກວດສອບແຫ່ງລັດ, ກໍຄື ລັດຖະບານລາວ ທີ່ໄດ້ໃຫ້ການຮ່ວມມື, ສະໜັບສະໜູນ ແລະ ອຳນວຍຄວາມສະດວກໃຫ້ແກ່ຕົນເອງ ໃນການປະຕິບັດໜ້າທີ່ຢູ່ ສປປ ລາວ ຈົນສາມາດສຳເລັດຜົນຢ່າງຈົບງາມ. ພ້ອມທັງຢືນຢັນວ່າຈະສະໜັບສະໜູນ ແລະ ສົ່ງເສີມສາຍພົວພັນມິດຕະພາບ ລະຫວ່າງ ສອງສະຖາບັນກວດສອບລາວ-ອິນເດຍ ໃຫ້ຈະເລີນງອກງາມຍິ່ງໆຂຶ້ນໄປ.
ໃນຕອນທ້າຍ, ທ່ານ ວຽງທະວີສອນ ເທບພະຈັນ ໄດ້ອວຍພອນໃຫ້ ຫົວໜ້າຫ້ອງການກວດສອບປະເທດອິນເດຍ ປະຈຳກົວລາລຳເປີ ປະເທດມາເລເຊຍ ຈົ່ງມີສຸຂະພາລານາໄມທີ່ສົມບູນ, ມີຄວາມສຸກ ແລະ ປະສົບຜົນສຳເລັດອັນຍິ່ງໃຫຍ່ກວ່າເກົ່າໃນການຮັບໜ້າທີ່ໃໝ່ທີ່ມີກຽດຂອງຕົນ.
(ຂ່າວ: ອົງການກວດສອບ)
ຄໍາເຫັນ