 |
ພິທີເປີດໂຕໂຄງການຮ່ວມມືດັ່ງກ່າວ ໄດ້ຈັດຂຶ້ນໃນວັນທີ 16 ມິຖຸນາ ຜ່ານມານີ້ ທີ່ນະຄອນຫຼວງວຽງຈັນ ໂດຍການເຂົ້າຮ່ວມຂອງ ທ່ານ ສະຖາບັນດິດ ອິນຊີຊຽງໃໝ່ ຮອງລັດຖະມົນຕີກະຊວງແຜນການ ແລະ ການລົງທຶນ, ທ່ານ ວັນທະນາ ນໍລິນທາ ຫົວໜ້າກົມສົ່ງເສີມການລົງທຶນ, ທ່ານ ໂທມັດ ເຈມ ເຈຄອບ ຜູ້ຕາງໜ້າ IFC ປະຈໍາພາກພື້ນ ຫວຽດນາມ, ສປປ ລາວ ແລະ ກໍາປູເຈຍ ພ້ອມດ້ວຍທຸກພາກສ່ວນກ່ຽວຂ້ອງ.
ທ່ານ ວັນທະນາ ນໍລິນທາ ກ່າວວ່າ: ການອຳນວຍຄວາມສະດວກໃຫ້ແກ່ການລົງທຶນ ເປັນສິ່ງສຳຄັນສຳລັບການຊຸກຍູ້ການເຕີບໂຕທາງເສດຖະກິດ ແລະ ສ້າງວຽກເຮັດງານທໍາໃນປະເທດລາວ. ການຮ່ວມມືກັບ IFC ຈະຊ່ວຍພວກເຮົາປັບປຸງກອບລະບຽບກົດໝາຍສຳລັບການລົງທຶນຮ່ວມ ລະຫວ່າງ ພາກລັດ ແລະ ເອກະຊົນ (PPP) ແລະ ຕັດຮອນຂັ້ນຕອນການລົງທຶນໃຫ້ກະທັດຮັດ ເຮັດໃຫ້ການດຳເນີນທຸລະກິດໃນປະເທດງ່າຍຂຶ້ນ. ໂດຍນໍາໃຊ້ຄວາມຊ່ຽວຊານຂອງ IFC, ພວກເຮົາສາມາດແນ່ໃຈວ່າ PPP ຈະໄດ້ຮັບການພັດທະນາຕາມມາດຕະຖານສາກົນ, ສ້າງສະພາບແວດລ້ອມທີ່ດີຂຶ້ນ ເພື່ອດຶງດູດການລົງທຶນເອກະຊົນ ໂດຍສະເພາະການລົງທຶນໂດຍກົງຈາກຕ່າງປະເທດ ໃນຂະແໜງອຸດສາຫະກຳທີ່ເປັນຍຸດທະສາດ.
ທ່ານ ໂທມັດ ເຈມ ເຈຄອບ ກ່າວວ່າ: ການລົງທຶນຂອງພາກເອກະຊົນ ເປັນເຄື່ອງຈັກສຳຄັນຂອງການເຕີບໂຕທາງເສດຖະກິດ ແລະ ການສ້າງສະພາບແວດລ້ອມທີ່ໂປ່ງໃສ, ມີປະສິດທິພາບ ຊຶ່ງເປັນສິ່ງສຳຄັນໃນການດຶງດູດການລົງທຶນ. ຜ່ານການເປັນຄູ່ຮ່ວມມືນີ້, IFC ຕັ້ງໃຈທີ່ຈະສະໜັບສະໜູນແຜນການປັບປຸງຂອງ ສປປ ລາວ, ຊ່ວຍໃຫ້ສາມາດເພີ່ມຂີດຄວາມສາມາດຂອງພາກເອກະຊົນ ແລະ ຊຸກຍູ້ການສ້າງວຽກເຮັດງານທໍາໃນອຸດສາຫະກຳທີ່ສຳຄັນ.
 |
ໃນພິທີຄັ້ງນີ້, ຍັງໄດ້ມີການແລກປ່ຽນເອກະສານສັນຍາການຮ່ວມມືໂຄງການດັ່ງກ່າວ ລະຫວ່າງ ທ່ານ ວັນທະນາ ນໍລິນທາ ແລະ ທ່ານ ໂທມັດ ເຈມ ເຈຄອບ ຊຶ່ງການຮ່ວມມືໃໝ່ຄັ້ງນີ້ ກົມສົ່ງເສີມການລົງທຶນ, IFC ແລະ ທະນາຄານໂລກ ຈະນໍາເອົາການປະຕິບັດງານທີ່ດີທີ່ສຸດໃນລະດັບສາກົນ ມາປັບປຸງຂັ້ນຕອນການປະມູນ ເພີ່ມຄວາມໂປ່ງໃສ ແລະ ປະສິດທິພາບຂອງ PPP ພ້ອມທັງສະໜັບສະໜູນການລິເລີ່ມສ້າງຂີດຄວາມສາມາດໃຫ້ພະນັກງານລັດ ໂດຍນໍາໃຊ້ປະສົບການຕົວຈິງເຂົ້າໃນການພັດທະນາ PPP ຊຶ່ງຄວາມພະຍາຍາມເຫຼົ່ານີ້ ມີຈຸດປະສົງເພື່ອດຶງດູດການລົງທຶນເຂົ້າໃນຂະແໜງການສຳຄັນເຊັ້ນ: ກະສິກຳ, ການຂົນສົ່ງ ແລະ ກິດຈະກໍາທຸລະກິດສີຂຽວ (ທຸລະກິດທີ່ດຳເນີນໂດຍຄໍານຶງເຖິງຜົນກະທົບຕໍ່ສິ່ງແວດລ້ອມເປັນສໍາຄັນ) ຊຶ່ງມີຄວາມສຳຄັນຕໍ່ເປົ້າໝາຍການພັດທະນາແບບຍືນຍົງ ແລະ ຜ່ານການສົ່ງເສີມການມີສ່ວນຮ່ວມຂອງພາກເອກະຊົນ, ການເປັນຄູ່ຮ່ວມມື ກໍຈະຊ່ວຍສ້າງໂອກາດໃນການສ້າງວຽກເຮັດງານທໍາ ແລະ ເພີ່ມຄວາມເຂັ້ມແຂງໃຫ້ແກ່ກຳລັງແຮງງານຂອງປະເທດ.
(ຂ່າວ-ພາບ: ສຸກສະຫວັນ)
ຄໍາເຫັນ