ຮອງຫົວໜ້າຄະນະໂຄສະນາອົບຮົມສູນກາງພັກ, ທ່ານ ກ້າວ ອັ່ນມິງ ບັນນາທິການໃຫຍ່ອົງການພາສາຕ່າງປະເທດແຫ່ງຊາດຈີນ, ທ່ານນາງ ຟາງຫົງ ເອກອັກຄະລັດຖະທູດ ສປ ຈີນ ປະຈໍາລາວ, ທ່ານ ສະຫວັນຄອນ ຣາຊມົນຕຣີປະທານສະມາຄົມນັກຂ່າວແຫ່ງປະເທດລາວ ແລະ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ທ່ານ ວັນໄຊ ຕະວິນຍານ ຮອງຫົວໜ້າຄະນະໂຄສະນາອົບຮົມສູນກາງພັກ ຫົວໜ້າບັນນາທິການໃຫຍ່ໜັງສືພິມປະຊາຊົນ ກ່າວວ່າ: ຈຸດປະສົງເປີດກິດຈະກຳດັ່ງກ່າວ ກໍເພື່ອຊຸກຍູ້ການເຊື່ອມໂຍງສື່ມວນຊົນ, ແບ່ງປັນຄວາມຮູ້, ປະສົບການ ແລະ ການຮ່ວມມືດ້ານວິຊາຊີບ, ການແລກປ່ຽນຂໍ້ມູນຂ່າວສານ, ແລກປ່ຽນວັດທະນະທຳ ແລະ ການສຶກສາ ກໍຄືການຈັດງານວັດທະນະທໍາບຸນກຸດຈີນກ້າວເຂົ້າສູ່ປະເທດລາວ ພາຍໃຕ້ຫົວຂໍ້: ດື່ມນໍ້າສາຍດຽວ ກົມກຽວດັ່ງຄອບຄົວດຽວກັນ ປີ 2025ໃນຄັ້ງນີ້, ເປັນຮູບການໜຶ່ງເພື່ອເຜີຍແຜ່, ສ້າງຄວາມຮັບຮູ້, ຄວາມເຂົ້າໃຈກ່ຽວກັບບຸນປີໃໝ່ປະຈໍາຊາດຂອງປະເທດຈີນທີ່ເປັນມູນເຊື້ອວັດທະນະທໍາອັນດີງາມມາແຕ່ດຶກດໍາບັນໃຫ້ກັບຄົນລາວ.
ສໍາລັບໜັງສືພິມປະຊາຊົນ ແລະ ໜັງສືພິມລາຍວັນຢຸນນານໃນໄລຍະຜ່ານມາໄດ້ມີການພົວພັນຮ່ວມມືກັນຢ່າງແໜ້ນແຟ້ນໃນການແລກປ່ຽນຂໍ້ມູນຂ່າວສານປະຈໍາອາທິດ ໂດຍສະເພາະດ້ານວັດທະນະທໍາ ການສຶກສາ ແລະ ການທ່ອງທ່ຽວສ່ອງແສງຄວາມເປັນຈິງຕໍ່ການສ້າງສາພັດທະນາຂອງແຕ່ລະປະເທດ ໝາກຜົນຂອງໂຄງການຮ່ວມມືລະຫວ່າງລາວ-ຈີນ ຜ່ານການຮ່ວມມືໄດ້ເຮັດໃຫ້ປະຊາຊົນທັງສອງປະເທດໄດ້ຮັບຮູ້ຂໍ້ມູນຂ່າວສານທີ່ຖືກຕ້ອງຕາມຄວາມເປັນຈິງ ໄດ້ສ້າງຄວາມເຂົ້າອົກເຂົ້າໃຈ ຊຶ່ງກັນ ແລະ ກັນ, ປະຊາຊົນທຽວໄປມາຫາສູ່ກັນນັບມື້ນັບຫຼາຍຂຶ້ນໃນແຕ່ລະປີ. ໜັງສືພິມປະຊາຊົນໄດ້ເຂົ້າຮ່ວມກອງປະຊຸມ ຈັດໂດຍສູນການສື່ສານສາກົນອາຊີໃຕ້ ແລະ ອາຊີຕາເວັນອອກສ່ຽງໃຕ້ແຂວງຢຸນນານ ໃນຫຼາຍຫົວຂໍ້ ເພື່ອແລກປ່ຽນບົດຮຽນ, ປະສົບການແນໃສ່ການພັດທະນາສື່ມວນຊົນກ້າວໜ້າໄປພ້ອມກັນ. ທັງໝົດນີ້ເປັນການສືບຕໍ່ເສີມຂະຫຍາຍແນວທາງຄູ່ຮ່ວມຊາຕາກໍາລາວ-ຈີນ, ຈີນ-ລາວ ທີ່ທ່ານ ສີຈິ້ນຜິງ ກໍານົດອອກໃຫ້ແຕກດອກອອກຜົນເປັນກ້າວໆ. ພ້ອມກັນນັ້ນ, ສື່ມວນຊົນກໍມີບົດບາດສໍາຄັນເປັນຢ່າງຍິ່ງໃນການຄົ້ນຄວ້າ ເກັບກໍາຂໍ້ມູນ, ວິເຄາະວິໄຈບັນຫາຕ່າງໆເພື່ອໂຄສະນາເຜີຍແຜ່ສະພາບການຂອງໂລກໃຫ້ສັງຄົມໄດ້ຮັບຮູ້ ມີຄວາມເຂົ້າໃຈຕໍ່ເຫດການຕ່າງໆຢ່າງຖືກຕ້ອງເພື່ອສ້າງຄວາມເຂົ້າໃຈ ຊຶ່ງກັນ ແລະ ກັນ ໃນຍຸກປັດຈຸບັນສື່ມວນຊົນຍິ່ງມີການຂະຫຍາຍຕົວຢ່າງວ່ອງໄວ ໂດຍສະເພາະສື່ສັງຄົມອອນລາຍການນໍາໃຊ້ລະບົບເອໄອ ເຂົ້າມາມີບົດບາດໃນສັງຄົມເຮັດໃຫ້ມີຄວາມຫຍຸ້ງຍາກໃນການໄຈ້ແຍກຂໍ້ມູນ ແລະ ເຫດການຕ່າງໆວ່າແມ່ນເຫດການຕົວຈິງ ຫຼື ການປັ້ນແຕ່ງເລື່ອງຂຶ້ນມາເພື່ອຫຼອກລວງສັງຄົມ,ເຮັດໃຫ້ກຸ່ມຄົນບໍ່ດີນໍາໃຊ້ສື່ສັງຄົມອອນລາຍໃນທາງທີ່ບໍ່ຖືກຕ້ອງ, ໃສ່ຮ້າຍປ້າຍສີ, ບິດເບືອນຄວາມເປັນຈິງເຮັດໃຫ້ປະຊາຊົນຈໍານວນໜຶ່ງຫຼົງເຊື່ອ, ສ້າງຄວາມແຕກແຍກພາຍໃນ ຊຶ່ງເປັນໄພອັນຕະລາຍຕໍ່ຄວາມໝັ້ນຄົງໃນໄລຍະຍາວ, ຕໍ່ໜ້າສະພາບການດັ່ງກ່າວຈຶ່ງເປັນໜ້າທີ່ອັນໜັກໜ່ວງຂອງສື່ມວນຊົນທີ່ຈະຕ້ອງໄດ້ຮ່ວມກັນຄົ້ນຄວ້າຫາວິທີການແກ້ໄຂຢ່າງສົມເຫດສົມຜົນ ແລະ ທັນການ.
ໜັງສືພິມປະຊາຊົນຍິນດີຮ່ວມມື ແລະ ສົ່ງເສີມສູນການສື່ສານສາກົນພາກພື້ນອາຊີໃຕ້ ແລະ ອາຊີຕາເວັນອອກສ່ຽງໃຕ້ ແຂວງຢຸນນານ ສປ ຈີນ ທີ່ຍາມໃດກໍມີຄວາມມຸ້ງໝາຍສ້າງສາຍພົວພັນອັນດີງາມໃນເຄືອຂ່າຍສື່ມວນຊົນ ເຮັດໃຫ້ສື່ມວນຊົນແຕ່ລະປະເທດເຜີຍແຜ່ການສ້າງສາພັດທະນາປະເທດຊາດຂອງຕົນໃຫ້ຊາວໂລກຮັບຮູ້, ປົກປ້ອງຄວາມເປັນຈິງ, ສ້າງຄວາມເຂົ້າອົກເຂົ້າໃຈຢູ່ຮ່ວມກັນແບບສັນຕິຮ່ວມກັນເຜີຍແຜ່ສົ່ງເສີມດ້ານວັດທະນະທຳອັນດີງາມ ແລະ ສະເໜີສະເໜ່ຂອງຄວາມຫຼາກຫຼາຍ ຂອງປະເທດອາຊີໃຕ້ ແລະ ອາຊີຕາເວັນອອກສ່ຽງໃຕ້ໃຫ້ບັນລຸການພັດທະນາຮ່ວມກັນ.
ໃນໂອກາດປີໃໝ່ກຸດຈີນໃກ້ຈະມາເຖິງນີ້, ທ່ານ ວັນໄຊ ຕະວິນຍານ ຍັງກ່າວອວຍພອນໄຊອັນປະເສີດ ໃຫ້ເປັນປີແຫ່ງຄວາມສຸກສົມຫວັງຂອງທຸກຄົນ, ທຸກຄອບຄົວຂອງປະຊາຊົນຈີນ ເປັນປີແຫ່ງຄວາມເບັ່ງບານຂອງການຮ່ວມມືຕາມຄູ່ຮ່ວມຊາຕາກໍາລາວ-ຈີນ ສະບັບທີສອງ ແລະ ເປັນປີແຫ່ງຜົນສໍາເລັດໃນການເສີມສ້າງຄວາມສາມັກຄີ ການຮ່ວມມືຂອງເຄືອຂ່າຍສື່ມວນຊົນອາຊີໃຕ້ ແລະ ອາຊີຕາເວັນອອກສ່ຽງໃຕ້ໃຫ້ຈົບງາມ.
ໃນວັນດຽວກັນນີ້, ຍັງໄດ້ຈັດກອງປະຊຸມສົນທະນາເສັ້ນທາງແຫ່ງວັດທະນະທຳລາວ-ຈີນ ແລະ ພິທີເປີດວາລະສານ China Report ASEAN ກັບ ວາລະສານຈໍາປາ ສະບັບພິເສດ ສະບັບເດືອນມັງກອນ 2025 ອີກດ້ວຍ.
(ຂ່າວ-ພາບ: ວັນເພັງ)
ຄໍາເຫັນ