ທີ່ເດີ່ນຜາມໄຊເທດສະບານແຂວງຜົ້ງສາລີໂດຍການເປັນປະທານຂອງທ່ານ ຄໍາຜອຍ ວັນນະສານ ກໍາມະການສູນກາງພັກ ເລຂາພັກແຂວງ ເຈົ້າແຂວງຜົ້ງສາລີ, ໃຫ້ກຽດເຂົ້າຮ່ວມຂອງທ່ານນາງ ສວນສະຫວັນ ວິຍະເກດ ກໍາມະການສູນກາງພັກ ລັດຖະມົນຕີກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ(ຖວທ), ມີທ່ານນາງ ລີ້ຫົງ ຮອງຫົວໜ້າຜູ້ປະຈຳການສະພາປະຊາຊົນນະຄອນພູເອີ ສປ ຈີນຫົວໜ້າຝ່າຍການຜະລິດອຸດສາຫະກຳກາເຟ, ທ່ານ ຕະວັນເສີນ ປະທານຄະນະກໍາມະການປະຊາຊົນເມືອງແຍ້ ແຂວງດຽນບຽນ ສສ ຫວຽດນາມ, ທ່ານ ຫວາງ ລິນ ເຊີນ ຄະນະປະຈຳພັກເມືອງ ຫົວໜ້າຄະນະແນວໂຮມເມືອງຈຽງເຊິນ ສປ ຈີນ, ມີບັນດາແຂກຖືກເຊີນທີ່ກ່ຽວຂ້ອງເຂົ້າຮ່ວມ.
ທ່ານ ຄຳເຫຼັກ ໃຈອີສານ ຮອງເຈົ້າແຂວງຜົ້ງສາລີ ຫົວໜ້າຄະນະຮັບຜິດຊອບຈັດງານຂັ້ນແຂວງ ກ່າວລາຍງານຫຍໍ້ວ່າ: ງານມະຫະກຳກິລາໂຍນໝາກຄອນ 3 ແຈປະເທດລາວ-ຫວຽດນາມ-ຈີນຊຶ່ງແມ່ນກິລາພື້ນເມືອງຂອງຊົນເຜົ່າທີ່ດໍາລົງຊີວິດຢູ່ເຂດຊາຍແດນຕິດຈອດກັນຂອງ3ປະເທດ; ການຈັດງານດັ່ງກ່າວແມ່ນສອງປີໃດຈັດຂຶ້ນເທື່ອໜຶ່ງໂດຍຜັດປ່ຽນກັນເປັນເຈົ້າພາບ,ການຈັດງານຄັ້ງນີ້ເປັນຄັ້ງທີVIIIຊຶ່ງແຂວງຜົ້ງສາລີໄດ້ຮັບກຽດເປັນເຈົ້າພາບຄັ້ງນີ້ເປັນຄັ້ງທີ II. ຈຸດປະສົງເພື່ອມິດຕະພາບ, ຜູກແໜ້ນຄວາມສາມັກຄີ ແລະ ການຮ່ວມມືເພື່ອແລກປ່ຽນວັດທະນະທໍາ, ສົ່ງເສີມການທ່ອງທ່ຽວ, ການຄ້າ, ການລົງທຶນຂອງປະຊາຊົນລະຫວ່າງແຂວງ, ນະຄອນ ແລະ ເມືອງທີ່ຢູ່ລຽບຕາມ 3 ແຈປະເທດລາວ-ຫວຽດນາມ-ຈີນໃຫ້ຂະຫຍາຍຕົວເພີ່ມຂຶ້ນຢ່າງບໍ່ຢຸດຢັ້ງ; ການຈັດງານຄັ້ງນີ້ແມ່ນໜຶ່ງໃນກິດຈະກໍາສໍາຄັນໃນການຜັນຂະຫຍາຍແຜນພັດທະນາເສດຖະກິດ-ສັງຄົມ 5 ປີຄັ້ງທີ IXຂອງແຂວງ(2021-2025)ໃຫ້ປະກົດຜົນເປັນຈິງ.
ການຫ້າງຫາກະກຽມຈັດງານດັ່ງກ່າວ ໄດ້ເລີ່ມແຕ່ທ້າຍເດືອນພະຈິກ2023 ໂດຍແຕ່ງຕັ້ງຄະນະຮັບຜິດຊອບ ແລະ 13ອະນຸກໍາມະການຊຶ່ງໄດ້ເອົາໃຈໃສ່ປະຕິບັດພາລະບົດບາດ, ສິດ ແລະ ໜ້າທີ່ຂອງຕົນຢ່າງຕັ້ງໜ້າ; ກິດຈະກຳໃນການແຂ່ງຂັນກິລາມິດຕະພາບຄັ້ງນີ້ມີ 4 ກິດຈະກໍາຄື: 1.ໂຍນໝາກຄອນ, 2. ຍິງໜ້າເກັກ, 3. ຕີໝາກຂ່າງ, 4. ເຕະກະຕໍ້ຫວາຍ.
ຈາກນັ້ນ, ທ່ານ ຄໍາຜອຍ ວັນນະສານ ໄດ້ໃຫ້ກຽດກ່າວເປີດງານຢ່າງເປັນທາງການ ແລະ ຫົວໜ້າຄະນະເມືອງແຍ້ ແຂວງດຽນບຽນ ສສ ຫວຽດນາມ, ຫົວໜ້າຄະນະເມືອງຈຽງເຊິນ ສປຈີນ ຂຶ້ນມີຄໍາເຫັນ, ໃນພິທີຫົວໜ້າຄະນະທັງ 3 ປະເທດໄດ້ຂຶ້ນຮັບຊໍ່ດອກໄມ້ຈາກທ່ານເຈົ້າແຂວງຜົ້ງສາລີ.
ຂ່າວ-ພາບ: ພູວັນ
ຄໍາເຫັນ