ປິດໂຄງການສ້າງຄວາມເຂັ້ມແຂງໃຫ້ແກ່ການຄຸ້ມຄອງການຊ່ວຍເຫຼືອທາງການ ໃນ ສປປ ລາວ

ກະຊວງແຜນການ ແລະ ການລົງທຶນ ຮ່ວມກັບ ສະຖານທູດແຫ່ງຣາຊະອານາຈັກລຸກຊໍາບວກ ປະຈໍາ ສປປ ລາວ ໄດ້ຈັດກອງປະຊຸມປິດໂຄງການສ້າງຄວາມເຂັ້ມແຂງໃຫ້ແກ່ການຄຸ້ມຄອງການຊ່ວຍເຫຼືອທາງການ ເພື່ອການພັດທະນາ (ຊກພ) ໃນ ສປປ ລາວ ຢ່າງເປັນທາງການ ໃນວັນທີ 3 ເມສານີ້ ທີ່ ນະຄອນຫຼວງວຽງຈັນ ພາຍໃຕ້ການເປັນປະທານຂອງ ທ່ານ ນາງ ພອນວັນ ອຸທະວົງ ຮອງລັດຖະມົນຕີ ກະຊວງແຜນການ ແລະ ການລົງທຶນ, ທ່ານ ໂທມາສ ລາມາຣ ອຸປະທູດລຸກຊໍາບວກ ປະຈໍາ ສປປ ລາວ ພ້ອມດ້ວຍແຂກຖືກເຊີນ.
ໂຄງການສ້າງຄວາມເຂັ້ມແຂງໃຫ້ແກ່ການຄຸ້ມຄອງການຊ່ວຍເຫຼືອທາງການ ເພື່ອການພັດທະນາ ໃນ ສປປ ລາວ ຫຼື ໂຄງການ ລາວ/033 ເປັນໂຄງການທີ່ໄດ້ຮັບການສະໜັບສະໜູນຈາກລັດຖະບານ ແຫ່ງຣາຊະອານາຈັກລຸກຊໍາບວກ ໂດຍຜ່ານອົງການ LuxDevແລະ ຈັດຕັ້ງປະຕິບັດຮ່ວມກັບ ກະຊວງແຜນການ ແລະ ການລົງທຶນ ແລະ ກະຊວງການຕ່າງປະເທດ. ຈຸດປະສົງຂອງໂຄງການ ແມ່ນເພື່ອສ້າງຄວາມອາດສາມາດ ໃຫ້ແກ່ອົງກອນລັດຂອງ ສປປ ລາວ ໃນການປະສານງານ ແລະ ຄຸ້ມຄອງການຊ່ວຍເຫຼືອທາງການ ເພື່ອການພັດທະນາຢ່າງມີປະສິດທິຜົນ. ໂຄງການດັ່ງກ່າວ ເປັນການສືບຕໍ່ຈາກຜົນສໍາເລັດຂອງໂຄງການ ລາວ/028.ທ່ານຮອງລັດຖະມົນຕີ ຜທ ໄດ້ກ່າວວ່າ “ໂຄງການ ລາວ/033 ໄດ້ມີບົດບາດສໍາຄັນ ໃນການເພີ່ມຄວາມອາດສາມາດຂອງ ສປປ ລາວ ໃນການຮັບປະກັນໃຫ້ທຶນຊ່ວຍເຫຼືອທາງການເພື່ອການພັດທະນາ(ຊກພ) ມີຜົນປະໂຫຍດຕໍ່ການບັນລຸເປົ້້າໝາຍບຸລິມະສິດຂອງການພັດທະນາປະເທດ ໃຫ້ຫຼາຍທີ່ສຸດ. ສະນັ້ນ,ລັດຖະບານ ສປປ ລາວ ຈຶ່ງສະເໜີໃຫ້ ລັດຖະບານລຸກຊໍາບວກພິຈາລະນາສືບຕໍ່ໃຫ້ການສະໜັບສະໜູນໃຫ້ແກ່ກະຊວງແຜນການ ແລະ ການລົງທຶນ ເນື່ອງຈາກວ່າ ທຶນ ຊກພ ຈະເປັນແຫຼ່ງທຶນສໍາຄັນຕໍ່ການພັດທະນາ ສປປ ລາວ ໃນອະນາຄົດ. ພວກເຮົາຂໍສະແດງຄວາມຮູ້ບຸນຄຸນຕໍ່ການສະໜັບສະໜູນທີ່ມີຄຸນຄ່າ ຂອງລັດຖະບານລຸກຊໍາບວກ”.ທ່ານ ໂທມາສ ລາມາຣໄດ້ກ່າວວ່າ: "ພວກເຮົາມີຄວາມພາກພູມໃຈ ທີ່ໄດ້ຮ່ວມມືກັບກະຊວງແຜນການ ແລະ ການລົງທຶນ ໃນການຈັດຕັ້ງປະຕິບັດໂຄງການດັງກ່າວ ຊຶ່ງມີຄວາມສອດຄ່ອງສູງກັບນະໂຍບາຍຂອງທັງສອງຝ່າຍ ໃນການສົ່ງເສີມການປົກຄອງແບບທົ່ວເຖິງ, ການສ້າງລັດທີ່ປົກຄອງດ້ວຍກົດໝາຍ ແລະ ການຮັບປະກັນປະສິດທິຜົນຂອງການຊ່ວຍເຫຼືອ.ໂຄງການໄດ້ປະກອບສ່ວນເຂົ້າໃນການຮັບປະກັນ ການນໍາໃຊ້ທຶນຊ່ວຍເຫຼືອຢ່າງມີປະສິດທິຜົນ ເພື່ອບັນລຸເປົ້າໝາຍການພັດທະນາແບບຍືນຍົງ ແລະ ເປົ້້າໝາຍພາຍໃຕ້ແຜນພັດທະນາເສດຖະກິດ-ສັງຄົມແຫ່ງຊາດ."ໜຶ່ງໃນຜົນສໍາເລັດຂອງໂຄງການ ຄືການປະກາດນໍາໃຊ້ລະບົບຖານຂໍ້ມູນ ຊກພ (ODAMIS)ຊຶ່ງເຮັດໃຫ້ອົງການລັດ ສາມາດຕິຕາມ ບັນທຶກ ແລະ ຄຸ້ມຄອງໂຄງການ ຊກພ ພ້ອມທັງສາມາດເຂົ້າເຖິງຂໍ້ມູນ ແລະ ແບ່ງປັນຂໍ້ມູນຢ່າງສະດວກ ແລະ ງ່າຍດາຍ. ນອກຈາກນີ້,ໂຄງການຍັງໄດ້ສະໜັບສະໜູນການຝຶກອົບຮົມ,ການສ້າງຍຸດທະສາດການລະດົມທຶນຊກພ,ບົດແນະນໍາສໍາລັບກະຊວງ, ຂະແໜງການ, ບົດແນະນໍາການຄຸ້ມຄອງ ແລະ ນໍາໃຊ້ທຶນສົມທົບຂອງລັດຖະບານ ປະກອບເຂົ້າໃນການຈັດຕັ້ງປະຕິບັດໂຄງການ ຊກພ ແລະ ນິຕິກໍາອື່ນໆຕິດພັນກັບການຄຸ້ມຄອງ ໂຄງການ ຊກພ.
ການປິດໂຄງການ ເປັນນິມິດໝາຍໜຶ່ງທີ່ສໍາຄັນ ສໍາລັບລັດຖະບານ ສປປ ລາວ ໃນການຄຸ້ມຄອງ ຊກພ ແລະ ກ້າວໄປສູ່ ການຫຼຸດພົ້ນອອກຈາກ ສະຖານະປະເທດດ້ອຍພັດທະນາ. 
ກະຊວງແຜນການ ແລະ ການລົງທຶນ ໄດ້ເຊື້ອເຊີນໃຫ້ທຸກພາກສ່ວນກ່ຽວຂ້ອງ ມີສ່ວນຮ່ວມໃນການເພີ່ມຄວາມເຂັ້ມແຂງໃນການຄຸ້ມຄອງ ຊກພ ໃນ ສປປ ລາວ.
(ຂ່າວ-ພາບ: ກະຊວງແຜນການ)