ປຶກສາຫາລື ສ້າງນະຄອນຫຼວງພະບາງໃຫ້ກາຍເປັນຕົວເມືອງສ້າງສັນຂອງອົງການອຸຍແນັສໂກ

ທ່ານ ນາງ ສຸດາພອນ ຄົມທະວົງ ກ່າວເປີດກອງປະຊຸມວ່າ: ກອງປະຊຸມຄັ້ງນີ້, ມີຄວາມໝາຍຄວາມສຳຄັນຫຼາຍ ໃນການຈັດຕັ້ງປະຕິບັດແຜນພັດທະນາ ນະຄອນ ຫຼວງພະບາງ ກໍຄືແຜນພັດທະນາການທ່ອງທ່ຽວຂອງແຂວງໃຫ້ບັນລຸຕາມແຜນທີ່ກຳນົດໄວ້ ໂດຍຈະໄດ້ຮັບຟັງການເຜີຍແຜ່ກ່ຽວກັບການສ້າງນະຄອນຫຼວງພະບາງໃຫ້ກາຍເປັນຕົວເມືອງສ້າງສັນຂອງອົງການອຸຍແນັສໂກ, ເຮັດໃຫ້ທຸກພາກສ່ວນໃນສັງຄົມໄດ້ຮັບຮູ້, ເຂົ້າໃຈເຖິງຂໍ້ມູນຄວາມເປັນມາ ຂອງແນວຄິດໃນການສ້າງຕົວເມືອງສ້າງສັນຂອງອົງການອຸຍເນັສໂກ ແລະທິດທາງ ທີ່ຈະພັດທະນາຫຼວງພະບາງໃຫ້ສອດຄ່ອງກັບເງື່ອນໄຂ, ທ່າແຮງບົ່ມຊ້ອນທີ່ມີ. ໃນນີ້, ຈະໄດ້ປຶກສາຫາລື ກ່ຽວກັບຫົວຂໍ້ ຫຼື ແນວທາງ-ຮູບແບບ ທີ່ຈະສ້າງຫຼວງພະບາງເປັນເມືອງສ້າງສັນ ເຊັ່ນ: ດ້ານການອອກແບບ, ສະຖາປັດຕະຍະກຳ, ອາຫານ, ສິລະປະທ້ອງຖິ່ນ ແລະອື່ນໆ ທີ່ອົງການອຸຍເນັສໂກ ໄດ້ກຳນົດໄວ້, ຊຶ່ງເຫັນວ່າ ມີຄວາມເປັນໄປໄດ້ສຳລັບຫຼວງພະບາງ ຍ້ອນມີຄວາມສອດຄ່ອງ ທັງທາງກົງ ແລະທາງອ້ອມ ບໍ່ວ່າຈະແມ່ນ ຄວາມເປັນເອກະລັກຂອງອາຄານບ້ານເຮືອນ, ວັດວາອາມຮາມ ຫຼື ອາຫານ, ການສະແດງ, ຫັດຖະກຳທ້ອງຖິ່ນ. ທັງໝົດນັ້ນ, ລ້ວນແລ້ວແຕ່ແມ່ນມໍລະດົກອັນລ້ຳຄ່າ ທີ່ທຸກພາກສ່ວນຕ້ອງໄດ້ຄຸ້ມຄອງປົກປັກຮັກສາ ແລະເສີມຂະຫຍາຍໃຫ້ເກີດດອກອອກຜົນຍິ່ງຂຶ້ນ.

ກອງປະຊຸມຄັ້ງນີ້,ໄດ້ນຳສະເໜີສະພາບລວມຂອງໂຄງການ ປັບປຸງສີ່ງແວດລ້ອມ ນະຄອນ ຫຼວງພະບາງ, ແນວຄວາມຄິດ ການສ້າງນະຄອນ ຫຼວງພະບາງເປັນຕົວເມືອງສ້າງສັນຂອງອົງການອຸຍເນສໂກ ແລະປຶກສາຫາລືບັນດາວຽກງານ ທີ່ຈະພ້ອມກັນສືບຕໍ່ປະຕິບັດ ແລະຊອກຫາວິທີທາງແກ້ໄຂບັນຫາຄົງຄ້າງ ເພື່ອນຳສະເໜີແຜນງານຕໍ່ພາກສ່ວນກ່ຽວຂ້ອງ ແລະຕໍ່ອົງການອຸຍເນັສໂກ ຮັບຮອງໃນຕໍ່ໜ້າ.

(ຂ່າວ-ພາບ: ອາພຸດເດດ ບຸບຜາ)