ສະຫາຍ ສີ ຈິ້ນຜິງ ສົ່ງສານຊົມເຊີຍເຖິງ ສະຫາຍ ທອງລູນ ສີສຸລິດ

ສະຫາຍເລຂາທິການໃຫຍ່ ທີ່ນັບຖື,

ຂ້າພະເຈົ້າ ຮູ້ສຶກປິຕິຊົມຊື່ນເປັນຢ່າງຍິ່ງ ທີ່ໄດ້ຮັບຊາບວ່າ ສະຫາຍ ໄດ້ຮັບການເລືອກຕັ້ງເປັນເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນ ປະຕິວັດລາວ ອີກສະໄໝໜຶ່ງ, ຂ້າພະເຈົ້າ ຂໍຕາງໜ້າ ຄະນະກຳມະການສູນກາງພັກກອມມູນິດຈີນ ແລະ ໃນນາມສ່ວນຕົວ ສະແດງຄວາມຊົມເຊີຍຢ່າງສຸດໃຈ ແລະ ສົ່ງຄໍາຢື້ຢາມຖາມຂ່າວຢ່າງຈິງໃຈມາຍັງ ສະຫາຍ ແລະ ຄະນະບໍລິຫານງານສູນກາງພັກ ປປ ລາວ ສະໄໝທີ XII.

ນັບແຕ່ກອງປະຊຸມໃຫຍ່ ຄັ້ງທີ XI ເປັນຕົ້ນມາ, ສູນກາງພັກ ປປ ລາວ ໄດ້ສາມັກຄີ ແລະ ນໍາພາປະຊາຊົນລາວ ຕັ້ງໜ້າສະແຫວງຫາເສັ້ນທາງພັດທະນາສັງຄົມນິຍົມ ທີ່ສອດຄ່ອງກັບສະພາບຕົວຈິງຂອງປະເທດຕົນເອງ, ຜ່ານຜ່າຄວາມຫຍຸ້ງຍາກນາໆປະການ ແລະ ກ້າວໄປໜ້າຢ່າງໜັກແໜ້ນ, ຍາດໄດ້ຜົນສໍາເລັດທີ່ສໍາຄັນຢ່າງຫຼວງຫຼາຍໃນການກໍ່ສ້າງພັກ, ການພັດທະນາເສດຖະກິດ, ການປັບປຸງຊີວິດການເປັນຢູ່ຂອງປະຊາຊົນ, ການພົວພັນກັບຕ່າງປະເທດ ແລະ ອື່ນໆ. ຜົນສໍາເລັດຂອງການດໍາເນີນກອງປະຊຸມໃຫຍ່ ຄັ້ງທີ XII ຂອງ ພັກ ປປ ລາວ ຄັ້ງນີ້ ແມ່ນມີຄວາມໝາຍສໍາຄັນຕໍ່ການສືບທອດພາລະກິດຜ່ານມາ ແລະ ກ້າວສູ່ອະນາຄົດອັນໃໝ່ ໃນການພັດທະນາພາລະກິດຂອງພັກ ແລະ ພາລະກິດສັງຄົມນິຍົມຂອງປະເທດຊາດ. ຂ້າພະເຈົ້າ ເຊື່ອໝັ້ນວ່າ ພາຍໃຕ້ການນໍາພາຢ່າງເຂັ້ມແຂງຂອງ ຄະນະບໍລິຫານງານສູນກາງພັກ ປປ ລາວ ໂດຍມີ ສະຫາຍ ເລຂາທິການໃຫຍ່ ເປັນແກນກາງນັ້ນ, ພັກ ແລະ ປະຊາຊົນລາວ ຈະສາມັກຄີເປັນຈິດໜຶ່ງໃຈດຽວ ຮ່ວມກັນສູ້ຊົນ ເພື່ອບັນລຸເປົ້າໝາຍ ແລະ ໜ້າທີ່ວຽກງານຕ່າງໆ ທີ່ ກອງປະຊຸມໃຫຍ່ ຄັ້ງທີ XII ຂອງ ພັກ ປປ ລາວ ວາງອອກ, ສ້າງໂສມໜ້າໃໝ່ໃຫ້ພາລະກິດສັງຄົມນິຍົມ ຂອງ ສປປ ລາວ ຢ່າງບໍ່ຢຸດຢັ້ງ ແລະ ກ້າວໄປສູ່ເປົ້າໝາຍສູ້ຊົນ ຮອດປີ 2055 ຊຶ່ງເປັນປີທີ່ ພັກ ປປ ລາວ ໄດ້ຮັບການສ້າງຕັ້ງຂຶ້ນ ຄົບຮອບ 100 ປີ.

ປະເທດຈີນ ແລະ ປະເທດລາວ ເປັນປະເທດສັງຄົມນິຍົມບ້ານໃກ້ເຮືອນຄຽງ ທີ່ມີສາຍພູ-ສາຍນໍ້າຕິດຈອດກັນ. ໃນຊຸມປີທີ່ຜ່ານມາ, ພາຍໃຕ້ຄວາມພະຍາຍາມຮ່ວມກັນຂອງ ສອງຝ່າຍ, ສາຍພົວພັນ ຈີນ-ລາວ ໄດ້ກ້າວເຂົ້າສູ່ໄລຍະດີທີ່ສຸດໃນປະຫວັດສາດ, ການສ້າງຄູ່ຮ່ວມຊາຕາກຳ ຈີນ-ລາວ ທີ່ມີຄວາມໝາຍຍຸດທະສາດ ໄດ້ກ້າວເຂົ້າສູ່ລວງເລິກຢ່າງບໍ່ຢຸດຢັ້ງ ແລະ ໄດ້ຮັບຜົນສໍາເລັດຢ່າງຫຼວງຫຼາຍ. ໃນສະພາບການໃໝ່ ທີ່ສະຖານະການຢູ່ປະເທດອ້ອມຂ້າງ ແລະ ສະຖານະການຂອງໂລກ ມີການພົວພັນ ແລະ ກະທົບກັນຢ່າງເລິກເຊິ່ງ, ຂ້າພະເຈົ້າ ຍິນດີຮ່ວມກັບ ສະຫາຍເລຂາທິການໃຫຍ່ ເພີ່ມທະວີການນໍາພາທາງດ້ານຍຸດທະສາດຕໍ່ສາຍພົວພັນ ຈີນ-ລາວ, ເສີມຂະຫຍາຍມິດຕະພາບ ອັນເປັນມູນເຊື້ອຂອງສອງຝ່າຍ, ລົງເລິກການແລກປ່ຽນບົດຮຽນໃນການຄຸ້ມຄອງພັກ ແລະ ບໍລິຫານລັດ, ເປີດກວ້າງການຮ່ວມມືທີ່ເປັນຮູບປະທໍາໃນຂົງເຂດຕ່າງໆ ເພື່ອຊຸກຍູ້ໃຫ້ການສ້າງຄູ່ຮ່ວມຊາຕາກຳ ຈີນ-ລາວ ກ້າວໄປສູ່ມາດຕະຖານສູງ, ຄຸນນະພາບສູງ ແລະ ລະດັບສູງຢ່າງບໍ່ຢຸດຢັ້ງ, ສ້າງຄວາມຜາສຸກໃຫ້ປະຊາຊົນສອງຊາດ ແລະ ຮັບໃຊ້ການພັດທະນາພາລະກິດສັງຄົມນິຍົມຂອງແຕ່ລະປະເທດ ໃຫ້ດີຂຶ້ນກວ່າເກົ່າ, ປະກອບສ່ວນອັນໃໝ່ ເຂົ້າໃນການຊຸກຍູ້ສັນຕິພາບ, ສະຖຽນລະພາບ ແລະ ການພັດທະນາເພື່ອຄວາມຈະເລີນຮຸ່ງເຮືອງຂອງພາກພື້ນ ແລະ ທົ່ວໂລກ.

ຂໍອວຍພອນໃຫ້ ສະຫາຍເລຂາທິການໃຫຍ່ ຈົງປະສົບຜົນສໍາເລັດອັນໃຫຍ່ຫຼວງກວ່າເກົ່າ ໃນພາລະໜ້າທີ່ອັນສູງສົ່ງຂອງຕົນ!