ສະຫາຍ ທອງສະຫວັນ ພົມວິຫານ ຕ້ອນຮັບ ຄະນະຜູ້ແທນກະຊວງ​ການ​ຕ່າງປະເທດ ສສ ຫວຽດນາມ

ພາຍຫຼັງການເຂົ້າຢ້ຽມຂໍ່ານັບກໍໄດ້ສືບຕໍ່ເຂົ້າຮ່ວມກອງປະຊຸມພົບປະສອງຝ່າຍລະຫວ່າງ ກົມພົວ ພັນຄົນເຊື້ອຊາດລາວຢູ່ຕ່າງປະເທດ ແລະ ຄະນະກຳມະການແຫ່ງລັດເພື່ອຊາວຫວຽດນາມຢູ່ຕ່າງປະເທດ, ໂດຍການເປັນປະທານຮ່ວມຂອງ ສະຫາຍ ພົງສະຫວັນ ສີສຸລາດ ຮອງລັດຖະມົນຕີກະຊວງການ ຕ່າງປະເທດ ແຫ່ງ ສປປ ລາວ ຜູ້ຊີ້ນຳວຽກງານພົວພັນຄົນເຊື້ອຊາດລາວຢູ່ຕ່າງປະເທດ ແລະ ສະຫາຍ ນາງ ເລ ທິ ທູ ຮັ່ງ ຮອງລັດຖະມົນຕີກະຊວງການຕ່າງປະເທດ ແຫ່ງ ສສ ຫວຽດນາມ ຜູ້ຊີ້ນຳ ຄະນະກຳມະການແຫ່ງລັດເພື່ອຊາວຫວຽດນາມຢູ່ຕ່າງປະເທດ, ກອງປະຊຸມໄດ້ມີການປຶກສາຫາລືແລກປ່ຽນຄຳຄິດຄຳເຫັນ ແລະ ຖອດຖອນບົດຮຽນຮ່ວມກັນຢ່າງກົງໄປກົງມາໃນຫຼາຍບັນຫາທີ່ສຳຄັນເພື່ອແນໃສ່ຮັດແໜ້ນສາຍພົວພັນມິດຕະພາບ ແລະ ຄວາມສາມັກຄີພິເສດຂອງສອງກະຊວງ. ກອງປະຊຸມຄັ້ງນີ້, ໄດ້ດຳເນີນໄປດ້ວຍບັນຍາກາດທີ່ສ້າງສັນ, ເຕັມໄປດ້ວຍໄມຕິຈິດມິດຕະພາບ ແລະ ສະໜິດສະໜົມກັນແໜ້ນແຟ້ນເປັນຢ່າງດີ ຊຶ່ງໄດ້ກາຍເປັນການເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ການຮ່ວມມືຮອບດ້ານຂອງສອງພັກສອງລັດ ກໍຄືສອງກົມພົວພັນຄົນເຊື້ອຊາດ ລາວຢູ່ຕ່າງປະເທດ ແລະ ຄະນະກຳມະການແຫ່ງລັດເພື່ອຊາວຫວຽດນາມຢູ່ຕ່າງປະເທດ. ພ້ອມນີ້, ທັງສອງຝ່າຍກໍໄດ້ລົງນາມບົດບັນທຶກຄວາມເຂົ້າໃຈ (MOU) ວ່າດ້ວຍການຮ່ວມມື, ແລກປ່ຽນບົດຮຽນ ວຽກງານພົວພັນຄົນເຊື້ອຊາດລາວ ແລະ ຄົນເຊື້ອຊາດຫວຽດນາມຢູ່ຕ່າງປະເທດ.

(ຂ່າວ: ກຕທ)