ສະຫຼອງວັນຄົນພິການແຫ່ງຊາດແລະສາກົນ

ກະຊວງແຮງງານ ແລະ ສະຫວັດດີການສັງຄົມ, ອົງການພັດທະນາສາກົນ ປະເທດສະ ຫະລັດອາເມລິກາ (USAID) ແລະ ອົງການ ສະຫະປະຊາຊາດ ປະຈໍາ ສປປ ລາວ (UNDP), ສະມາຄົມຄົນພິການແຫ່ງຊາດລາວ ໄດ້ຈັດພະທີສະເຫຼີມສະຫຼອງວັນຄົນພິການ ແຫ່ງຊາດ ແລະ ສາກົນ ຂຶ້ນໃນວັນທີ 16 ທັນວາ 2023 ທີ່ສູນການຄ້າພາກຊັນ ນະຄອນຫຼວງວຽງຈັນ. ໂດຍການກ່າວເປີດຂອງ ທ່ານ ແສງອາລຸນ ຫຼວງຣາຊ, ຮັກສາການຫົວຫນ້າກົມນະໂຍບາຍຕໍ່ຜູ້ມີຜົນງານ, ພິການ ແລະ ຜູ້ອາຍຸສູງ (ຮັກສາການ ຫົວຫນ້າກອງເລຂາຄະນະກຳມະການແຫ່ງຊາດເພື່ອຄົນພິການ);  ທ່ານ ທອງຈັນ ດວງມະລາໄລ ປະທານສະມາຄົມຄົນພິການແຫ່ງຊາດລາວ; ມີທ່ານຜູ້ຕາງໜ້າຈາກຫ້ອງການຜູ້ປະສານງານອົງການສະຫະປະຊາຊາດ ແລະ ພາກສ່ວນກ່ຽວຂ້ອງເຂົ້າຮ່ວມ 
ການສະເຫຼີມສະຫຼອງງານຄັ້ງນີ້ ແມ່ນພາຍໃຕ້ຫົວຂໍ້ ສາມັກຄີຮ່ວມກັນປະຕິບັດງານເພື່ອຊ່ວຍເຫຼືອ ແລະ ບັນລຸເປົ້າໝາຍພັດທະນາແບບຍືນຍົງເພື່ອຄົນທີ່ມີຄວາມພິການ, ຮ່ວມກັບຄົນທີ່ມີຄວາມພິການ ແລະ ດ້ວຍຄົນທີ່ມີຄວາມພິການເອງ (United in action to rescue and achieve the SDGs for, with and by persons with disabilities) ໃນຫົວຂໍ້ນີ້ແມ່ນເນັ້ນໜັກໃສ່ການມີສ່ວນຮ່ວມ ແລະ ການເຂົ້າເຖິງສ່ວນບຸກຄົນຂອງຄົນພິການທີ່ສອດຄ່ອງກັບເປົ້າໝາຍການພັດທະນາແບບຍືນຍົງ.
ພາຍໃນງານພາກເຊົ້າມີກິດຈະກຳແຂ່ງຂັນກິລາແມ່ນຈັດຢູ່ທີ່ ສູນການແພດຟື້ນຟູໜ້າທີ່ການ ແລະ ມີກິດຈະກໍາຫຼາຍຢ່າງເຊັ່ນ:ການແຂ່ງຂັນກິລາບານບ້ວງລໍ້ເລື່ອນ, ເຕະບານຄົນພິການຕາ, ບອກເຊ່ຍ, ໂກນບານ ແລະ ເປຕັງ. ໃນສູນການຄ້າພາກຊັນ ມີການວາງສະແດງຈາກຫຼາຍອົງການ ຈັດຕັ້ງ ເພື່ອຄົນທີ່ມີຄວາມພິການ, ເພື່ອສະແດງໃຫ້ເຫັນຄວາມພະຍາຍາມຂອງຄົນທີ່ມີຄວາມພິການຢູ່ລາວ ໃນການປັບປຸງຊີວິດ ແລະ ຄວາມເປັນຢູ່. ນອກນັ້ນ ຍັງມີການສະແດງອີກຫຼາຍປະເພດເຊັ່ນ: ການສະແດງຟ້ອນລໍ້ເລື່ອນ, ການຮ້ອງເພງ, ການຫຼິ້ນເກມ, ການເຕັ້ນພາສາມື, ການເຕັ້ນ K-pop, ແລະ ເວທີສົນທະນາກ່ຽວກັບການຈ້າງງານແບບມີສ່ວນຮ່ວມ.ຂ່າວ: ຍຸພິນທອງ