ສຳເລັດກອງປະຊຸມຄະນະກຳມາທິການປະສານງານWAIPA ຄັ້ງທີ 3

ກອງປະຊຸມຄະນະກຳມາທິການປະສານງານWAIPA ຄັ້ງທີ 3 ໄດ້ຮັບຜົນສໍາເລັດຢ່າງຈົບງາມໃນວັນທີ 6 ກຸມພານີ້ ທີ່ນະຄອນຫຼວງວຽງຈັນສປປ ລາວ ຊຶ່ງໃຫ້ກຽດກ່າວເປີດກອງປະຊຸມ ໂດຍທ່ານ ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ,ເປັນກຽດໃນພິທີປິດກອງປະຊຸມໃນວັນດຽວກັນ ໂດຍທ່ານນາງ ທຸມມາລີ ວົງພະຈັນປະທານກຳມາທິການວັດທະນະທຳ-ສັງຄົມ, ສະພາແຫ່ງຊາດລາວປະທານ WAIPA, ທ່ານນາງສີຕິໂຣໄຊເມຣິຢັນຕິດາໂຕະຮາຈິອັບດຸນຣາມານເລຂາທິການໃຫຍ່ໄອປາ,ບັນດາທ່ານສະມາຊິກລັດຖະສະພາໄອປາ ພ້ອມດ້ວຍບັນດາທ່ານແຂກຖືກເຊີນເຂົ້າຮ່ວມ.
ທ່ານນາງ ທຸມມາລີ ວົງພະຈັນ ກ່າວວ່າ: ກອງປະຊຸມຄັ້ງນີ້ ດຳເນີນພາຍໃຕ້ຫົວຂໍ້“ສົ່ງເສີມລັດຖະສະພາເອົາໃຈໃສ່ບົດບາດຍິງ-ຊາຍເພື່ອປະຊາຄົມອາຊຽນທີ່ເຂັ້ມແຂງ, ເຊື່ອມຈອດແລະກວມລວມ”, ໄດ້ເປັນການຢັ້ງຢືນອີກເທື່ອໜຶ່ງ ເຖິງຄວາມສຳຄັນໃນຄວາມພະຍາຍາມຢ່າງບໍ່ຢຸດຢັ້ງຂອງບັນດາສະມາຊິກລັດຖະສະພາລະຫວ່າງຊາດອາຊຽນ(AIPA)ຕໍ່ການຊຸກຍູ້ ສົ່ງເສີມຄວາມສະເໝີພາບລະຫວ່າງຍິງ-ຊາຍແລະປະຕິບັດນະໂຍບາຍເອົາໃຈໃສ່ຕໍ່ບັນຫາບົດບາດຍິງ-ຊາຍ. ພວກເຮົາເຊື່ອໝັ້ນຢ່າງໜັກແໜ້ນວ່າຄວາມສະເໝີພາບລະຫວ່າງຍິງ-ຊາຍຈະບັນລຸໄດ້ກໍຕໍ່ເມື່ອແມ່ຍິງມີໂອກາດເທົ່າທຽມກັບເພດຊາຍໃນການມີສ່ວນຮ່ວມຢ່າງແທ້ຈິງໃນດ້ານການເມືອງແລະໄດ້ຮັບການບັນຈຸຢູ່ໃນຕຳແໜ່ງນຳພາ-ຕັດສິນບັນຫາເພີ່ມຂຶ້ນ.ຕະຫຼອດໄລຍະການພິຈາລະນາໃນກອງປະຊຸມ, ພວກເຮົາຍັງໄດ້ຮັບຮູ້ວ່າການບັນລຸຄວາມສະເໝີພາບລະຫວ່າງຍິງ-ຊາຍທີ່ແທ້ຈິງຮຽກຮ້ອງໃຫ້ສະມາຊິກລັດຖະສະພາທັງຍິງແລະຊາຍ ຕ້ອງມີສ່ວນຮ່ວມ ແລະ ໃຫ້ການຮ່ວມມືໃນວຽກງານດັ່ງກ່າວດ້ວຍຄວາມມຸ່ງໝັ້ນແລະຄວາມຮັບຜິດຊອບຮ່ວມກັນທີ່ຈະແກ້ໄຂບັນຫາ,ທັບມ້າງສິ່ງກີດຂວາງຕໍ່ແມ່ຍິງແລະສົ່ງເສີມການມີສ່ວນຮ່ວມ ເຂົ້າໃນຂະບວນການຕັດສິນບັນຫາຂອງລັດຖະສະພາ;ເນື່ອງຈາກເຫັນໄດ້ຄວາມສຳຄັນດັ່ງກ່າວ, ຂ້າພະເຈົ້າຈຶ່ງຢາກຊຸກຍູ້ໃຫ້ມີການຮ່ວມມືແລະປຶກສາຫາລື, ເຮັດວຽກຮ່ວມກັນ ລະຫວ່າງສະມາຊິກລັດຖະສະພາທັງຍິງ ແລະ ຊາຍ,ກໍຄືບັນດາອົງການຈັດຕັ້ງທັງພາກລັດ, ອົງການຈັດຕັ້ງສັງຄົມແລະພາກສ່ວນກ່ຽວຂ້ອງ ຢ່າງຕໍ່ເນື່ອງ ແລະ ຫຼາຍຂຶ້ນເພື່ອສ້າງສະພາບແວດລ້ອມທີ່ອຳນວຍຄວາມສະດວກໃຫ້ແມ່ຍິງໄດ້ເຂົ້າຮ່ວມຢ່າງຕັ້ງໜ້າໃນຂະບວນການທາງການເມືອງ, ຢູ່ໃນບົດບາດການເປັນຜູ້ນຳ, ຕັດສິນບັນຫາສຳຄັນທາງດ້ານເສດຖະກິດ, ວັດທະນະທຳ-ສັງຄົມ ແລະ ຂົງເຂດອື່ນໆ, ປະກອບສ່ວນຢ່າງແຂງຂັນເຂົ້າໃນການພັດທະນາປະເທດຊາດ ກໍຄືພາກພື້ນອາຊຽນຂອງພວກເຮົາ; ໂອກາດທີ່ສຳຄັນນີ້, ທ່ານນາງ ທຸມມາລີ ວົງພະຈັນ ໄດ້ເນັ້ນໜັກເຖິງຄວາມສໍາຄັນຂອງແຜນການປະຕິບັດງານWAIPA (PoA) ແລະ ກອບການຈັດຕັ້ງປະຕິບັດການມີສ່ວນຮ່ວມທາງການເມືອງແລະ ການເປັນຜູ້ນໍາຂອງແມ່ຍິງ,ແຜນ ແລະ ຂອບວຽກເຫຼົ່ານີ້, ໄດ້ຮັບການສ້າງຂຶ້ນຈາກຄວາມພະຍາຍາມຮ່ວມກັນຂອງພວກເຮົາ ເປັນການສະໜອງແຜນວຽກຢ່າງຮອບດ້ານເພື່ອກ້າວໄປສູ່ການບັນລຸຄວາມສະເໝີພາບລະຫວ່າງຍິງ-ຊາຍ ແລະການສົ່ງເສີມການມີສ່ວນຮ່ວມທາງການເມືອງຂອງແມ່ຍິງ, ທັງເປັນເອກະສານແນະນຳ ທີ່ສ້າງແຮງບັນດານໃຈແລະສະທ້ອນໃຫ້ເຫັນເຖິງຄວາມມຸ່ງໝັ້ນຂອງພວກເຮົາ ເພື່ອຮັບປະກັນວ່າບັນດານະໂຍບາຍ, ກົດໝາຍ, ນິຕິກຳແລະການຈັດຕັ້ງປະຕິບັດຕົວຈິງໃຫ້ເອົາໃຈໃສ່ຕໍ່ບັນຫາບົດບາດຍິງ-ຊາຍ ແມ່ນໄດ້ຝັງຢູ່ໃນລະບົບລັດຖະສະພາອາຊຽນ.
ກອງປະຊຸມຄະນະກໍາມາທິການປະສານງານWAIPA ຄັ້ງນີ້ ຍັງຮັບຮູ້ນຳກັນວ່າ ວຽກງານຂອງພວກເຮົາຍັງບໍ່ໄດ້ສິ້ນສຸດລົງພຽງແຕ່ໃນມື້ນີ້ເທົ່ານັ້ນ. ບັນດາຂໍ້ສັງເກດ, ຄຳຄິດເຫັນແລະຂໍ້ສະເໜີແນະທີ່ໄດ້ສັງລວມຢູ່ໃນການປະຊຸມຄັ້ງນີ້ຈະນຳໄປພິຈາລະນາຕື່ມອີກໃນວາລະກອງປະຊຸມAIPA ຄັ້ງທີ45. ກອງປະຊຸມດັ່ງກ່າວຈະເປັນເວທີສຳຄັນໃຫ້ພວກເຮົາມີສ່ວນຮ່ວມໃນການສົນທະນາ, ປຶກສາຫາລືຢ່າງເລິກເຊິ່ງ, ມີໂອກາດໄດ້ແບ່ງປັນການຈັດຕັ້ງປະຕິບັດທີ່ດີແລະ ວາງຍຸດທະສາດຮ່ວມກັນ ກ່ຽວກັບວິທີການຈັດຕັ້ງປະຕິບັດ, ມາດຕະການແລະ ຄໍາແນະນໍາຢ່າງມີປະສິດທິພາບ; ສຸດທ້າຍນີ້, ຂ້າພະເຈົ້າຫວັງຢ່າງຍິ່ງວ່າ ພວກເຮົາຈະມີສ່ວນຮ່ວມ, ໃຫ້ການຮ່ວມມືແລະ ມຸ່ງໝັ້ນປະຕິບັດຕາມຄຳໝັ້ນສັນຍາໃນຄັ້ງນີ້ເພື່ອສົ່ງເສີມລັດຖະສະພາເອົາໃຈໃສ່ບັນຫາບົດບາດຍິງ-ຊາຍ, ສ້າງປະຊາຄົມອາຊຽນທີ່ເຂັ້ມແຂງແລະສ້າງອະນາຄົດທີ່ທຸກຄົນໄດ້ມີສ່ວນຮ່ວມຢ່າງແທ້ຈິງ. ການມີສ່ວນຮ່ວມຢ່າງຫ້າວຫັນຂອງບັນດາທ່ານເປັນສິ່ງສໍາຄັນໃນການຫັນປ່ຽນຄວາມມຸ່ງຫວັງຂອງພວກເຮົາ ໃຫ້ໄປສູ່ການຈັດຕັ້ງປະຕິບັດຕົວຈິງທີ່ເປັນຮູບປະທຳແລະປະສົບຜົນສຳເລັດຕາມແຜນງານທີ່ວາງໄວ້.
(ຂ່າວ-ພາບ: ແສງຈັນ)