ສຳເລັດຊຸດຝຶກອົບຮົມວຽກງານການພິມ ການຈັດພິມ ແລະ ການຈໍາໜ່າຍ

ທ່ານ ນາງ ຈັນເພັດ ຄໍາຟອງ ຫົວໜ້າກົມວັນນະຄະດີ ແລະ ການພິມຈໍາໜ່າຍ ກະຊວງ ວທ ກ່າວວ່າ: ວຽກງານການຈັດພິມ, ການພິມ ແລະ ການຈໍາໜ່າຍໃນປັດຈຸບັນ ເຫັນໄດ້ວ່າມີສິ່ງທ້າທ້າຍຫຼາຍຢ່າງທີ່ຕ້ອງໄດ້ເອົາໃຈໃສ່ພັດທະນາ ແລະ ການຄຸ້ມຄອງໃຫ້ມີປະສິດທິຜົນເປັນຕົ້ນ: ດ້ານເຕັກໂນໂລຊີການພິມຈຳໜ່າຍຕ້ອງຫັນໄປສູ່ທັນສະໄໝ, ດ້ານກົດໝາຍ ແລະ ບັນດານິຕິກຳກ່ຽວກັບວຽກງານພິມຈຳໜ່າຍທີ່ເປັນເຄື່ອງມືຄຸ້ມຄອງລັດຕ້ອງມີການປັບປຸງໃໝ່ ເພື່ອໃຫ້ສອດຄ່ອງກັບສະພາບປັດຈຸບັນ ແລະ ເຊື່ອມໂຍງກັບບັນດາປະເທດໃກ້ຄຽງ-ສາກົນ ດ້ານບຸກຄະລາກອນການພິມຈຳໜ່າຍຂອງລາວຍັງມີຈຳກັດທາງດ້ານປະລິມານ ແລະ ຄຸນນະພາບຈໍາເປັນຕ້ອງຮີບດ່ວນສ້າງພະນັກງານ-ລັດຖະກອນຂອງລັດ, ສ້າງພະນັກງານ-ກໍາມະກອນຂອງວິສາຫະກິດໃຫ້ພຽງພໍ ແລະ ມີຄວາມຮູ້ຄວາມສາມາດນໍາໃຊ້ເຕັກໂນໂລຊີທີ່ກ້າວໜ້າທັນສະໄໝ.ດັ່ງນັ້ນ, ຈຶ່ງຮຽກຮ້ອງໃຫ້ຜູ້ປະກອບການດ້ານການພິມຈຳໜ່າຍຕ້ອງກະກຽມຈັດສັນທຶນຮອນເພື່ອປ່ຽນຖ່າຍເຄື່ອງຈັກພິມໃຫ້ທັນສະໄໝ, ສົ່ງເສີມຍົກລະດັບພະນັກງານ-ກຳມະກອນຂອງຕົນໃຫ້ມີຄວາມຮູ້ຄວາມສາມາດນໍາໃຊ້ເຕັກໂນໂລຊີທີ່ທັນສະໄໝ, ຕ້ອງສຶກສາຮຽນຮູ້ກົດໝາຍ ແລະ ນິຕິກຳທີ່ກ່ຽວຂ້ອງກັບວຽກງານການພິມຈຳໜ່າຍເພື່ອເປັນບ່ອນອີງ ເປັນເຄື່ອງມືໃນການຄຸ້ມຄອງໃຫ້ສອດຄ່ອງກັບສະພາບປັດຈຸບັນ. ດັ່ງນັ້ນ, ເຊື່ອໝັ້ນວ່າຄວາມຮູ້, ບົດຮຽນທີ່ໄດ້ຮັບຈະຖືກໝູນໃຊ້ ແລະ ນໍາເຂົ້າໃນວຽກງານໃຫ້ເປັນຮູບປະທຳ. ພ້ອມນີ້, ຫວັງວ່າທາງກົມການຈັດພິມ, ການພິມ ແລະ ການຈໍາໜ່າຍແຫ່ງ ສສ ຫວຽດນາມຈະສືບຕໍ່ໃຫ້ການສະໜັບສະໜູນການຝຶກອົບຮົມໃຫ້ພະນັກງານຂອງລາວຕື່ມອີກ.

ທ່ານ ວັນສີ ກົວມົວ ກ່າວວ່າ: ວຽກງານການພິມ ແລະ ການຈຳໜ່າຍ ບໍ່ແມ່ນພຽງແຕ່ວຽກງານທາງດ້ານເຕັກນິກທຸລະກິດ, ແຕ່ຫາກແມ່ນເສົາຄ້ຳໜຶ່ງທີ່ສຳຄັນຂອງການພັດທະນາດ້ານປັນຍາ, ເປັນເຄື່ອງມືໃນການເຜີຍແຜ່ຂໍ້ມູນຂ່າວສານ, ແນວທາງນະໂຍບາຍຂອງພັກ-ລັດ ທັງເປັນກົນໄກໃນການປົກປັກຮັກສາ ແລະ ເສີມຂະຫຍາຍມໍລະດົກທາງດ້ານວັດທະນະທຳອັນດີງາມຂອງຊາດ, ເພື່ອສືບຕໍ່ກ້າວໄປໜ້າຕ້ອງພ້ອມກັນຜ່ານຜ່າສິ່ງທ້າທາຍ ແລະ ຍາດແຍ່ງໂອກາດໃໝ່ໆ. ໂດຍສະເພາະດ້ານເຕັກໂນໂລຊີຈຳເປັນຕ້ອງຫັນປ່ຽນໄປສູ່ເຕັກໂນໂລຊີການພິມທີ່ທັນສະໄໝເພື່ອຍົກສູງຄຸນນະພາບ ແລະ ປະສິດທິພາບການຜະລິດ, ດ້ານນິຕິກຳຕ້ອງສືບຕໍ່ປັບປຸງກົດໝາຍ ແລະ ລະບຽບການຕ່າງໆ ໃຫ້ສອດຄ່ອງກັບສະພາບການຂະຫຍາຍຕົວຂອງເສດຖະກິດ-ສັງຄົມ ແລະ ການເຊື່ອມໂຍງກັບພາກພື້ນ ແລະ ສາກົນ, ດ້ານບຸກຄະລາກອນ ຕ້ອງເລັ່ງລັດການສ້າງ ແລະ ພັດທະນາຊັບພະຍາກອນມະນຸດໃນຂະແໜງການພິມໃຫ້ມີທັງປະລິມານ ແລະ ຄຸນນະພາບ, ບັນດາຜູ້ປະກອບການຈົ່ງກ້າຫານ ແລະ ເປັນຜູ້ນຳໜ້າໃນການລົງທຶນໃສ່ເຕັກໂນໂລຊີທີ່ທັນສະໄໝ. ພ້ອມກັນນັ້ນ, ຂໍໃຫ້ເອົາໃຈໃສ່ຍົກລະດັບຄວາມຮູ້ຄວາມສາມາດຂອງພະນັກງານ-ກຳມະກອນຂອງຕົນໃຫ້ສາມາດນຳໃຊ້ເຕັກໂນໂລຊີໃໝ່ໆ ໄດ້ຢ່າງສໍານິຊຳນານ. ພະນັກງານ-ລັດຖະກອນຕ້ອງເພີ່ມທະວີການຄົ້ນຄວ້າ, ກຳແໜ້ນກົດໝາຍ ແລະ ບັນດານິຕິກຳທີ່ກ່ຽວຂ້ອງ ເພື່ອເປັນບ່ອນອີງທີ່ໜັກແໜ້ນໃນການຄຸ້ມຄອງ, ສົ່ງເສີມ ແລະ ອຳນວຍຄວາມສະດວກໃຫ້ການດຳເນີນທຸລະກິດມີຄວາມຄ່ອງຕົວ ແລະ ຖືກຕ້ອງຕາມລະບຽບກົດໝາຍ. ໂອກາດນີ້, ທ່ານ ຫງ້ວຽນ ຫງວຽນ ໄດ້ໃຫ້ກຽດມອບໃບຢັ້ງຢືນໃຫ້ສຳມະນາກອນທີ່ເຂົ້າຮ່ວມຝຶກອົບຮົມ.

ຂ່າວ-ພາບ:ບຸນຕອມ-ບຸນອຸ້ມ