ສຳຫຼວດຈຸດເລີ່ມຕົ້ນເຂດທີ່ໝັ້ນການປະຕິວັດລາວໃຕ້ຢູ່ເມືອງດາກຈຶງເພື່ອກຽມລົງມືກໍ່ສ້າງ

ໃນວັນທີ7ທັນວານີ້, ທ່ານເຫຼັກໄຫຼສີວິໄລເຈົ້າແຂວງເຊກອງພ້ອມດ້ວຍທ່ານສີສຸພັນມະຫາວົງຫົວໜ້າຫ້ອງວ່າການແຂວງ, ທ່ານເພັງນາຈັນທະພອນເຈົ້າເມືອງດາກຈຶງແລະຂະແໜງການກ່ຽວຂ້ອງໄດ້ລົງສຳຫຼວດຖານທີ່ໝັ້ນການປະຕິວັດລາວໃຕ້ຊຶ່ງພະນັກງານປະຕິວັດຮຸ່ນກ່ອນໄດ້ອາໄສເປັນບ່ອນເຄື່ອນໄຫວກໍ່ສ້າງຮາກຖານການເມືອງແລະນຳພາຂະບວນການຕໍ່ສູ້ຢູ່ພາກໃຕ້ຂອງລາວຕ້ານສັດຕູຜູ້ຮຸກຮານໃນຊຸມປີ1946-1947ໂດຍມີປະທານຄຳໄຕສີພັນດອນອະດີດປະທານພັກອະດີດປະທານປະເທດແຫ່ງສປປລາວເປັນຜູ້ບັນຊາເພື່ອສະເຫຼີມສະຫຼອງວັນເກີດປະທານຄໍາໄຕສີພັນດອນຄົບຮອບ100ປີໃນວັນທີ8ກຸມພາ2024ທີ່ຈະມາເຖິງ.
ທ່ານເຫຼັກໄຫຼສີວິໄລໄດ້ກ່າວວ່າ: ຖານທີ່ໝັ້ນການປະຕິວັດລາວໃຕ້ແມ່ນຕັ້ງຢູ່ເຂດບ້ານດາກປໍາ-ບ້ານດາກຊວງເມືອງດາກຈຶງຫ່າງຈາກເທດສະບານເມືອງປະມານ4ກິໂລແມັດຊຶ່ງການລົງສໍາຫຼວດຄັ້ງນີ້ຈຸດປະສົງກໍເພື່ອກໍານົດເຂດພື້ນທີ່, ສ້າງສິ່ງອໍານວຍຄວາມສະດວກ, ສ້າງເຮືອນຢູ່ຈໍາລອງຂອງປະທານຄໍາໄຕສີພັນດອນ, ສ້າງເຮືອນຢູ່ຈໍາລອງຂອງທະຫານລາວ-ທະຫານຫວຽດນາມແລະອື່ນໆທີ່ຕິດພັນກັບການໃຊ້ຊີວິດປະຈໍາວັນຂອງເພິ່ນໃນເວລານັ້ນໃຫ້ກາຍເປັນບ່ອນສຶກສາຮຽນຮູ້ປະຫວັດສາດແລະເປັນບ່ອນສຶກສາອົບຮົມມູນເຊື້ອປະຕິວັດໃຫ້ເຍົາວະຊົນ-ຄົນຮຸ່ນໃໝ່, ທັງເປັນສະຖານທີ່ທ່ອງທ່ຽວທາງປະຫວັດສາດເພື່ອແນໃສ່ໃຫ້ຜູ້ມາສຳຜັດໄດ້ສຶກສານ້ຳໃຈເສຍສະຫຼະ, ພິລະອາດຫານ, ຄວາມເດັດດ່ຽວໜຽວແໜ້ນຂອງພະນັກງານແລະນັກຮົບຮຸ່ນກ່ອນ.
ທ່ານເຫຼັກໄຫຼສີວິໄລໃຫ້ຮູ້ຕື່ມວ່າ: ໂຄງການບູລະນະ, ປັບປຸງຟື້ນຟູແລະກໍ່ສ້າງເຮືອຈໍາລອງຢູ່ຖານທີ່ໝັ້ນການປະຕິວັດລາວໃຕ້ຢູ່ເຂດບ້ານດາກປໍາ-ດາກຊວງເມືອງດາກຈຶງເປັນໂຄງການທີ່ມີຄວາມໝາຍສໍາຄັນ. ສະນັ້ນ, ຂະແໜງການກ່ຽວຂ້ອງທຸກຂັ້ນຕ້ອງສືບຕໍ່ໂຄສະນາ, ສຶກສາອົບຮົມການເມືອງ-ນໍາພາແນວຄິດ, ອະທິບາຍຊີ້ແຈງດ້ວຍເຫດດ້ວຍຜົນໃຫ້ປະຊາຊົນມີຄວາມຮັບຮູ້, ເຂົ້າໃຈ, ຮ່ວມມືແລະມີສ່ວນຮ່ວມຈັດຕັ້ງປະຕິບັດກິດຈະກໍາຕ່າງໆຂອງໂຄງການໃຫ້ສໍາເລັດຕາມແຜນການທີ່ວາງໄວ້.ທັງນີ້ກໍເພື່ອໃຫ້ສະຖານທີ່ດັ່ງກ່າວກາຍເປັນບ່ອນຮຽນຮູ້ປະຫວັດສາດ, ເປັນແຫຼ່ງທ່ອງທ່ຽວທາງປະຫວັດສາດທີ່ສາມາດດຶງດູດນັກທ່ອງທ່ຽວເຂົ້າທ່ຽວເມືອງດາກຈຶງກໍຄືແຂວງເຊກອງຫຼາຍຂຶ້ນໃນອະນາຄົດ.
(ຂ່າວ-ພາບ: ສັນຍາ)