ເພີ່ມທະວີສ້າງຄວາມຮັບຮູ້ ແລະ ຄວາມເຂົ້າໃຈໂດຍພື້ນຖານ ກ່ຽວກັບ ກົດໝາຍທະເລ, ສິດ ແລະ ຜົນປະໂຫຍດຂອງປະເທດ
ກົມສົນທິສັນຍາ ແລະ ກົດໝາຍ, ກະຊວງການຕ່າງປະເທດ ຮ່ວມກັບ ສະຖານເອກອັກຄະຣາຊະທູດຍີ່ປຸ່ນ ປະຈຳ ສປປ ລາວ ຈັດກອງປະຊຸມສຳມະນາ ກ່ຽວກັບ ກົດໝາຍທະເລ ແລະ ປະເທດທີ່ບໍ່ມີຊາຍແດນຕິດຈອດກັບທະເລ ຂຶ້ນໃນວັນທີ 17 ມິຖຸນາ ນີ້,ພາຍໃຕ້ການເປັນປະທານຂອງ ທ່ານ ທອງຜ່ານ ສະຫວັນເພັດ ຮອງລັດຖະມົນຕີກະຊວງການຕ່າງປະເທດ ໂດຍມີນັກວິທະຍາກອນຈາກ ຍີ່ປຸ່ນ ແລະ ສປປ ລາວ ຂຶ້ນນຳສະເໜີເນື້ອໃນທັງໝົດ 3 ຫົວຂໍ້ ຄື: 1.ກົດໝາຍທະເລ, 2. ກົດໝາຍທະເລແລະບັນດາປະເທດທີ່ບໍ່ມີຊາຍແດນຕິດຈອດກັບທະເລ,ແລະ3.ການເຂົ້າຮ່ວມຂອງສປປລາວໃນວຽກງານການຄຸ້ມຄອງທະເລສາກົນ ຊຶ່ງມີນັກສຳມະນາກອນເຂົ້າຮ່ວມທັງໝົດ60 ທ່ານ, ໃນນັ້ນເພດຍິງ38 ທ່ານ.
ຈຸດປະສົງຂອງກອງປະຊຸມສຳມະນາຄັ້ງນີ້ ແມ່ນເພື່ອເພີ່ມທະວີສ້າງຄວາມຮັບຮູ້ ແລະ ຄວາມເຂົ້າໃຈໂດຍພື້ນຖານ ກ່ຽວກັບ ກົດໝາຍທະເລ, ສິດ ແລະ ຜົນປະໂຫຍດຂອງປະເທດທີ່ບໍ່ມີຊາຍແດນຕິດກັບທະເລ ແລະ ຄວາມສຳຄັນຂອງກົດໝາຍທະເລ ລວມທັງສົນທິສັນຍາ ສປຊ ວ່າດ້ວຍ ກົດໝາຍທະເລ.
ຜ່ານການດຳເນີນກອງປະຊຸມສຳມະນາ ນັກວິທະຍາກອນ ແລະ ນັກສຳມະນາກອນ ໄດ້ມີການແລກປ່ຽນຄຳຄິດເຫັນຢ່າງກົງໄປກົງມາ ຊຶ່ງສະແດງອອກໃນການຕັ້ງຄຳຖາມ, ການມີຄຳເຫັນ ແລະ ການສະແດງທັດສະນະສ່ວນຕົວຂອງບັນດານັກສຳມະນາກອນ ຈຶ່ງເຮັດໃຫ້ກອງປະຊຸມສຳມະນາຄັ້ງນີ້ ດຳເນີນໄປດ້ວຍບັນຍາກາດອັນຟົດຟື້ນ ທີ່ເຕັມໄປດ້ວຍເນື້ອໃນອັນເປັນປະໂຫຍດແກ່ຜູ້ເຂົ້າຮ່ວມ.
ຂ່າວ-ພາບ:ກະຊວງການຕ່າງປະເທດ
ຄໍາເຫັນ