ສ້າງຄວາມເຂັ້ມແຂງໃນຊຸມຊົນເພື່ອການປັບຕົວເຂົ້າກັບການປ່ຽນແປງດິນຟ້າອາກາດຢູ່ເມືອງລອງ

ພິທີເຊັນບົດບັນທຶກຄວາມເຂົ້າໃຈ ໂຄງການສ້າງຄວາມເຂັ້ມແຂງໃນຊຸມຊົນເພື່ອການປັບຕົວເຂົ້າກັບການປ່ຽນແປງດິນຟ້າອາກາດແບບມີສ່ວນຮ່ວມ (WeAct) ລະຫວ່າງພະແນກກະສິກຳ ແລະ ປ່າໄມ້ ແຂວງຫຼວງນໍ້າທາ ກັບອົງການແຄຣ ນານາຊາດ ປະຈຳ ສປປ ລາວໄດ້ຈັດຂຶ້ນເມື່ອບໍ່ດົນມານີ້ ທີ່ແຂວງຫຼວງນ້ຳທາ, ໂດຍມີທ່ານ ພິມແກ້ວ ທໍາລະສິນຫົວໜ້າພະແນກກະສິກຳ ແລະ ປ່າໄມ້ແຂວງຫຼວງນ້ຳທາ, ທ່ານ ນາງ ແກ້ວອຳພອນສຸວັນນະພູມອຳນວຍການ ອົງການແຄຣ ນານາຊາດ ປະຈຳ ສປປ ລາວ, ທ່ານ ວຽງວິໄລ ມູນໂພໄຊຮອງຫົວໜ້າຫ້ອງການກະສິກໍາ ແລະ ປ່າໄມ້ ເມືອງລອງ, ມີຕາງໜ້າຈາກກະຊວງ, ຂັ້ນແຂວງ, ຂັ້ນເມືອງ ແລະຈາກພື້ນທີ່ເປົ້າໝາຍຂອງໂຄງການເຂົ້າຮ່ວມ.
ເປົ້າໝາຍຂອງ ໂຄງການ WeActແມ່ນແນໃສ່ສ້າງຄວາມເຂັ້ມແຂງຕໍ່ກັບຄວາມສາມາດໃນການປັບຕົວຂອງຊຸມຊົນທີ່ມີຄວາມສ່ຽງທີ່ສຸດຕໍ່ກັບໄພອັນຕະລາຍທີ່ຕິດພັນກັບສະພາບດິນຟ້າອາກາດ ໃນແຂວງຫຼວງນ້ຳທາ ໂດຍສະເພາະແມ່ນຢູ່ ເມືອງລອງ.ດ້ວຍການສະໜັບສະໜູນຈາກ ອົງການເບຣດສເດີເວີ (Bread for the World),ໂຄງການນີ້ແມ່ນຈະໄດ້ສ້າງຄວາມເຂັ້ມແຂງໃຫ້ແກ່ ຊາວກະສິກອນ 787 ຄອບຄົວ (3.195 ຄົນ, ແມ່ຍິງ ແລະຜູ້ຊາຍ ທີ່ໄດ້ຮັບຜົນປະໂຫຍດທາງກົງ) ແລະ 15.624 ຄົນທີ່ໄດ້ຮັບຜົນປະໂຫຍດທາງອ້ອມ.ດ້ວຍການເສີມຂະຫຍາຍ ໂອກາດດ້ານການເຮັດກະສິກຳແບບຍືນຍົງ ໂດຍຜ່ານການມີສ່ວນຮ່ວມ ແລະສ້າງຄວາມເຂັ້ມແຂງໃຫ້ແກ່ປະຊາຊົນ ກ່ຽວກັບຄວາມຮັບຮູ້ໃນການປັບຕົວຕໍ່ກັບການປ່ຽນແປງຂອງສະພາບດິນຟ້າອາກາດ, ເສີມຂະຫຍາຍການມີສ່ວນຮ່ວມຂອງປະຊາຊົນ ແລະຄວາມເຂັ້ມແຂງທາງດ້ານການເງິນໃຫ້ແກ່ ແມ່ຍິງແລະ ສ້າງກົນໄກຂໍ້ມູນທີ່ອ້າງອີງໄດ້ ແລະລະບົບການຮຽນຮູ້ ໃນການແລກປ່ຽນຄວາມຮູ້ໃນລະດັບທ້ອງຖິ່ນ ແລະ ມະຫາພາກ. ສິ່ງສຳຄັນທີ່ສຸດ ຂອງໂຄງການນີ້ ແມ່ນຈະສົ່ງເສີມຄວາມຮ່ວມມືກັບຄູ່ຮ່ວມພັດທະນາ ເຊັ່ນ:ສູນພັດທະນາຊົນນະບົດ (RDA) ແລະ ສະມາຄົມພັດທະນາກະສິກຳ ແລະ ສິ່ງແວດລ້ອມແບບຍືນຍົງ(SAEDA), ໂດຍການເຮັດວຽກຢ່າງໃກ້ຊິດຮ່ວມກັບ ພະແນກກະສິກຳ ແລະ ປ່າໄມ້ແຂວງ, ຫ້ອງການກະສິກໍາແລະ ປ່າໄມ້ເມືອງ, ສູນພັດທະນາຊົນນະບົດ ແລະ ສະມາຄົມພັດທະນາກະສິກຳ ແລະສິ່ງແວດລ້ອມແບບຍືນຍົງ ທີ່ຈະເປັນຜູ້ນຳພາ ແລະ ຊຸກຍູ້ ຢູ່ເບື້ອງຫຼັງໃນການວາງແຜນ, ຈັດຕັ້ງປະຕິບັດແລະ ຕິດຕາມກິດຈະກໍາທີ່ຫຼາກຫຼາຍ ຂອງໂຄງການໃນໄລຍະສາມປີຂ້າງໜ້າ.
ທ່ານ ພິມແກ້ວ ທໍລະສິນ ໄດ້ກ່າວວ່າ:ໃນໄລຍະຜ່ານມາ,ປະຊາຊົນແມ່ນທຳມາຫາກິນຕາມທຳມະຊາດ, ສະພາບດິນຟ້າອາກາດກໍມີການປ່ຽນແປງ. ດັ່ງນັ້ນ ຈຶ່ງມີຄວາມຈໍາເປັນທີ່ມີການປ່ຽນແປງ ຈະຕ້ອງໄດ້ປັບຕົວໃຫ້ເຂົ້າກັບສະພາບທຳມະຊາດນີ້ແມ່ນເປັນໂອາກາດດີທີ່ ອົງການແຄຣ ນານາຊາດ ປະຈຳ ສປປ ລາວ ໄດ້ສະໜັບສະໜູນຈັດຕັ້ງປະຕິບັດໂຄງການຢູ່ຢູ່ເມືອງລອງແຂວງຫຼວງນ້ຳທາ ເພື່ອຊ່ວຍໃຫ້ປະຊາຊົນສາມາດປັບຕົວ ແລະຊ່ວຍເຮັດໃຫ້ເຂົາເຈົ້າໄດ້ຮັບຜົນຜະລິດທີ່ມີປະໂຫຍດ, ມີຄຸນະພາບ ແລະ ໄດ້ຮັບປະລິມານທີ່ດີ,ຮັບປະກັນຜົນເສຍຫາຍຈາກໄພທຳມະຊາດໜ້ອຍລົງ ຮ່ວມກັນວາງແຜນເພື່ອໃຫ້ເກີດຜົນເປັນຈິງ.
ທ່ານ ນາງ ແກ້ວອຳພອນ ສຸວັນນະພູມ ໄດ້ກ່າວວ່າ: “ອົງການແຄຣມີຄວາມຍິນດີທີ່ຈະຮ່ວມມືກັບຄູ່ຮ່ວມງານລັດຖະບານ, ສູນພັດທະນາຊົນນະບົດ (RDA) ແລະສະມາຄົມພັດທະນາກະສິກຳ ແລະ ສິ່ງແວດລ້ອມແບບຍືນຍົງ (SAEDA) ເພື່ອສ້າງຄວາມເຂັ້ມແຂງຕໍ່ກັບຄວາມສາມາດໃນການປັບຕົວຂອງປະຊາຊົນ ໂດຍສະເພາະແມ່ຍິງ ແລະ ເດັກຍິງ ເພື່ອກະກຽມ, ປັບຕົວແລະ ຕອບສະໜອງຕໍ່ກັບຄວາມສ່ຽງທາງດ້ານສະພາບອາກາດ ແລະ ພາວະສຸກເສີນ. ສາມາດເສີມສ້າງຄວາມສາມັກຄີ ແລະ ຄວາມສຳນິຊຳນານການປັບຕົວເພື່ອການປ່ຽນແປງທາງດ້ານບົດບາດຍິງ-ຊາຍ,ຄວາມອາດສາມາດໃນການປັບຕົວ ແລະ ການສ້າງຄວາມເຂັ້ມແຂງໃຫ້ແກ່ແມ່ຍິງ, ປະກອບສ່ວນເຂົ້າໃນການປ່ຽນແປງໄປໃນທາງບວກເພື່ອປະກອບສ່ວນເຂົ້າໃນການຫຼຸດຜ່ອນຄວາມທຸກຍາກຢູ່ ສປປ ລາວ.
ຂ່າວ-ພາບ: ອຸ້ມ ສົມນໍ່ວັນ