ເມື່ອບໍ່ດົນມານີ້, ທີ່ຫ້ອງວ່າການແຂວງຫຼວງນໍ້າທາ ໄດ້ຈັດກອງປະຊຸມພົບປະແລກປ່ຽນບົດຮຽນສອງຝ່າຍ ລະຫວ່າງສານປະຊາຊົນແຂວງຫຼວງນໍ້າທາ ສປປ ລາວ ແລະ ສານປະຊາຊົນແຂວງຟູເຖາະ ສສ ຫວຽດນາມ, ຝ່າຍແຂວງຫຼວງນໍ້າທານໍາໂດຍທ່ານ ທອງແດງ ສິດທິສົນ ປະທານສານປະຊາຊົນແຂວງພ້ອມຄະນະ, ຝ່າຍແຂວງຟູເຖາະ ສສ ຫວຽດນາມນໍາໂດຍທ່ານ ໂດ໊ ຫງັອກຕ້ວນ ປະທານສານປະຊາຊົນແຂວງຟູເຖາະສສ ຫວຽດນາມ ພ້ອມຄະນະ, ມີພະນັກງານທີ່ກ່ຽວຂ້ອງທັງ 2 ຝ່າຍເຂົ້າຮ່ວມ.
ທ່ານ ທອງແດງ ສິດທິສົນ ກ່າວວ່າ: ສານປະຊາຊົນສູງສຸດແຫ່ງ ສປປລາວແລະ ສານປະຊາຊົນສູງສຸດແຫ່ງ ສສ ຫວຽດນາມ ໄດ້ສ້າງສາຍພົວພັນມິດຕະພາບ ແລະ ການຮ່ວມມືຮອບດ້ານຕາມແນວທາງການຕ່າງປະເທດຂອງພັກ ແລະ ລັດຖະບານວາງອອກ ຊຶ່ງໄດ້ມີການພົວພັນຮ່ວມມືຊ່ວຍເຫຼືອເຊິ່ງກັນແລະ ກັນຕະຫຼອດມາ.ໂດຍສະເພາະສານປະຊາຊົນແຂວງຫຼວງນໍ້າທາກັບສານປະຊາຊົນແຂວງຟູເຖາະ ຊຶ່ງໄດ້ເຊັນບົດບັນທຶກຊ່ວຍຈຳໃນວັນທີ 22 ສິງຫາ 2023,ອີງໃສ່ບົດບັນທຶກຊ່ວຍຈຳດັ່ງກ່າວ ຄະນະຜູ້ແທນສານປະຊາຊົນແຂວງຟູເຖາະ ຈຶ່ງໄດ້ມາຢ້ຽມຢາມແລກປ່ຽນບົດຮຽນກັບສານປະຊາຊົນແຂວງຫຼວງນ້ຳທາໃນຄັ້ງນີ້ຊຶ່ງເປັນຄັ້ງທໍາອິດ ແລະ ຈະມີຄັ້ງຕໍ່ໆໄປ. ແຂວງຫຼວງນໍ້າທາມີສານປະຊາຊົນແຂວງ ແລະ ສານເຂດ 2 ທີ່ຂຶ້ນກັບສານປະຊາຊົນສູງສຸດແຫ່ງ ສປປລາວ, ມີພະນັກງານທັງໝົດ 29 ຄົນ, ຍິງ 11 ຄົນ, ສານປະຊາຊົນເຂດ 2 ມີພະນັກງານ 35 ຄົນ,ຍິງ 14 ຄົນ, ມີ 6 ຄະນະສານຄື: ຄະນະສານອາຍາ, ຄະນະສານແພ່ງ, ຄະນະສານການຄ້າ, ຄະນະສານແຮງງານ, ຄະນະສານຄອບຄົວ ແລະ ຄະນະສານເດັກ, ສານປະຊາຊົນເຂດມີ 4 ຄະນະສານຄື: ຄະນະສານອາຍາ,ສານແພ່ງ, ສານແຮງງານ ແລະ ຄະນະສານຄອບຄົວ. ມີສິດພິຈາລະນາຕັດສິນຄະດີເປັນຂັ້ນຕົ້ນ ແລະ ພິພາກສາເປັນຂັ້ນອຸທອນ ຄະດີອາຍາກໍານົດໂທດຕັດອິດສະຫຼະພາບແຕ່ 3 ປີຂຶ້ນໄປ ແລະ ຄະດີແພ່ງມີມູນຄ່າແຕ່ 300 ລ້ານກີບຂຶ້ນໄປ, ສານປະຊາຊົນເຂດມີສິດພິຈາລະນາຄະດີເປັນຂັ້ນຕົ້ນ, ຄະດີອາຍາກໍານົດໂທດຕັດອິດສະຫຼະພາບຕໍ່າກວ່າ 3 ປີລົງມາ ແລະ ຄະດີແພ່ງມີມູນຄ່າຕໍ່າກວ່າ 300 ລ້ານກີບລົງມາ, ສໍາລັບສານປະຊາຊົນເຂດ ກົດໝາຍບໍ່ໃຫ້ສິດພິຈາລະນາຕັດສິນຄະດີການຄ້າ ແລະ ຄະດີເດັກ ແລະ ວຽກງານອື່ນໆ.
ໂອກາດດັ່ງກ່າວຜູ້ແທນທັງ 2 ຝ່າຍໄດ້ປະກອບຄຳຄິດເຫັນຮ່ວມກັນ,ປຶກສາຫາລື ແລະ ເປັນເອກະພາບລົງນາມເຊັນບົດບັນທຶກເພື່ອເຮັດໃຫ້ກອງປະຊຸມພົບປະ 2 ຝ່າຍມີປະສິດທິຜົນສູງໃນຕໍ່ໜ້າເປັນຕົ້ນແມ່ນວຽກງານຄຸ້ມຄອງສານ, ການປະຕິຮູບທາງດ້ານບໍລິຫານຍຸຕິທຳ, ການນຳເຕັກນິກ-ຂໍ້ມູນຂ່າວສານ; ວຽກງານກໍ່ສ້າງຍົກສູງຄວາມສາມາດຂອງພະນັກງານ; ສານປະຊາຊົນແຂວງຟູເຖາະໄດ້ຊ່ວຍເຫຼືອອຸປະກອນເຄື່ອງຮັບໃຊ້ຫ້ອງການໃຫ້ແກ່ສານປະຊາຊົນແຂວງຫຼວງນໍ້າທາ; ສານປະຊາຊົນສອງແຂວງໄດ້ສືບຕໍ່ການຢ້ຽມຢາມ, ເຮັດວຽກ ແລະ ແລກປ່ຽນບົດຮຽນນຳກັນຕາມຮູບແບບໝູນວຽນໜຶ່ງປີຕໍ່ຄັ້ງ;ສານປະຊາຊົນແຂວງຟູເຖາະ ແລະ ສານປະຊາຊົນແຂວງຫຼວງນໍ້າທາ ໄດ້ເປັນເອກະພາບມອບໃຫ້ຫົວໜ້າຫ້ອງການສານປະຊາຊົນສອງແຂວງ ເພື່ອເປັນຈຸດປະສານງານ ແລະ ສະໜອງຂໍ້ມູນ, ແລກປ່ຽນບົດຮຽນເຊິ່ງກັນ ແລະ ກັນໃນຂະບວນການຕ່າງໆ. ສອງຝ່າຍມີໜ້າທີ່ຮັບຜິດຊອບລາຍງານຕໍ່ສານປະຊາຊົນສູງສຸດຂອງສອງປະເທດ ແລະ ອຳນາດການປົກຄອງທ້ອງຖິ່ນຂອງສອງແຂວງເພື່ອຮັບຊາບ ແລະ ສ້າງເງື່ອນໄຂອຳນວຍຄວາມສະດວກໃຫ້ແກ່ວຽກງານຕາມບົດບັນທຶກ ແລະ ວຽກງານອື່ນໆທີ່ກ່ຽວຂ້ອງ.ໃນວັນດຽວກັນ, ຄະນະຜູ້ແທນສານປະຊາຊົນແຂວງຟູເຖາະກໍໄດ້ເຂົ້າພົບທ່ານ ຄຳຟອງ ອີນມະນີ ຮອງເລຂາພັກແຂວງປະທານສະພາປະຊາຊົນແຂວງຫຼວງນໍ້າທາເພື່ອລາຍງານຈຸດປະສົງຂອງການມາຢ້ຽມຢາມ ແລະ ເຮັດວຽກຢູ່ແຂວງຫຼວງນໍ້າທາຕື່ມອີກ. ຂ່າວ: ມຸນຕີ
ຄໍາເຫັນ