ສະຫາຍ ສອນໄຊ ສີພັນດອນ ທີ່ຮັກແພງ, ໃນຊຸມມື້ທີ່ຜ່ານມາ ຂ້າພະເຈົ້າ ໄດ້ຕິດຕາມຢ່າງໃກ້ຊິດຕໍ່ສະພາບໄພນໍ້າຖ້ວມ ຢູ່ ສປປ ລາວ ແລະ ມີຄວາມເປັນຫ່ວງ ເປັນໃຍຢ່າງຍິ່ງ ທີ່ໄດ້ຮັບຂ່າວວ່າ: ຜົນກະທົບຈາກຝົນຕົກໜັກທີ່ຕໍ່ເນື່ອງກັນມາຫຼາຍວັນ ແລະ ເຮັດໃຫ້ເກີດນໍ້າຖ້ວມຢ່າງຮ້າຍແຮງຢູ່ຫຼາຍທ້ອງຖິ່ນຂອງ ສປປ ລາວ ຊຶ່ງໄດ້ສ້າງຄວາມເສຍຫາຍຢ່າງໜັກໜ່ວງໃຫ້ແກ່ຊີວິດ ແລະ ຊັບສິນ ໂດຍສະເພາະແມ່ນ ປະຊາຊົນ ຢູ່ບັນດາແຂວງທາງພາກເໜືອ ແລະ ພາກໃຕ້ຂອງລາວ. ຂ້າພະເຈົ້າ ຂໍສະແດງຄວາມເຫັນອົກເຫັນໃຈ ແລະ ເຂົ້າໃຈເຖິງ ຄວາມຫຍຸ້ງຍາກ ທີ່ພັກ, ລັດຖະບານ ແລະ ປະຊາຊົນລາວ ກຳລັງປະເຊີນ. ໃນນາມພັກ, ລັດຖະບານ ແລະ ປະຊາຊົນຫວຽດນາມ, ຂ້າພະເຈົ້າ ຂໍສະແດງຄວາມເຫັນອົກເຫັນໃຈ ແລະ ຄວາມເສົ້າສະຫຼົດໃຈຢ່າງສຸດຊຶ້ງ ມາຍັງພັກ, ລັດຖະບານ ແລະ ປະຊາຊົນລາວ ໂດຍສະເພາະຄອບຄົວຜູ້ປະສົບເຄາະຮ້າຍໃນຄັ້ງນີ້ດ້ວຍ. ຂ້າພະເຈົ້າມີຄວາມເຊື່ອໝັ້ນວ່າ: ພາຍໃຕ້ການນໍາພາອັນສະຫຼາດສ່ອງໃສຂອງພັກ ແລະ ລັດຖະບານ ຮ່ວມກັບຄວາມເອົາໃຈໃສ່ ແລະ ຊີ້ນຳຢ່າງໃກ້ຊິດຂອງສະຫາຍ, ປະເທດລາວອ້າຍນ້ອງຈະສາມາດຜ່ານຜ່າຄວາມຫຍຸ້ງຍາກໃນປັດຈຸບັນ. ພິເສດ ແມ່ນປະຊາຊົນຢູ່ເຂດຕ່າງໆທີ່ໄດ້ຮັບຜົນກະທົບຈາກໄພທຳມະຊາດຄັ້ງນີ້ ໃຫ້ກັບຄືນສູ່ສະພາບປົກກະຕິໂດຍໄວ. ພັກ, ລັດຖະບານ ແລະ ປະຊາຊົນຫວຽດນາມ ຍາມໃດກໍຈະຢູ່ຄຽງບ່າຄຽງໄຫຼ່ກັບພັກ, ລັດ ແລະ ປະຊາຊົນລາວ ບົນພື້ນຖານນໍ້າໃຈຄວາມສາມັກຄີ, ຮັກແພງຊ່ວຍເຫຼືອຊຶ່ງກັນ ແລະ ກັນ ຊຶ່ງເກີດມາຈາກສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ-ຫວຽດນາມ. ຕາງໜ້າພັກ, ລັດຖະບານ ແລະ ປະຊາຊົນຫວຽດນາມ, ຂ້າພະເຈົ້າ ຂໍສະແດງຄວາມຂອບໃຈຢ່າງຈິງໃຈ ສະຫາຍ ພ້ອມດ້ວຍພັກ, ລັດ ແລະ ປະຊາຊົນລາວ ທີ່ໄດ້ສົ່ງສານສະແດງຄວາມເຫັນອົກເຫັນໃຈຢ່າງສຸດຊຶ້ງມາຍັງຫວຽດນາມ ຕໍ່ ການສູນເສຍຈາກລົມພາຍຸ ເລກ 3 Wipha ທີ່ໄດ້ສ້າງຄວາມເສຍຫາຍ ແລະ ເຮັດໃຫ້ເຮືອທ່ອງທ່ຽວຫວິງ ຊວັນ 58 ຢູ່ອ່າວຮາລອງ ແຂວງກວາງນິງ ພິກຂວ້ຳທີ່ຜ່ານມາ. ພວກຂ້າພະເຈົ້າ ມີຄວາມຕື້ນຕັນໃຈ ແລະ ສະແດງຄວາມຂອບອົກຂອບໃຈຢ່າງຈິງໃຈ ໃນການແບ່ງເບົາຄວາມໂສກເສົ້າໃນຄັ້ງນີ້ ຊຶ່ງເປັນການສະແດງໃຫ້ເຫັນເຖິງຄວາມມີຊີວິດຊີວາ ຄວາມສາມັກຄີພິເສດ, ຊື່ສັດ ບໍລິສຸດຜຸດຜ່ອງ ແລະ ຄວາມສະໜິດຕິດພັນ ລະຫວ່າງສອງພັກ, ສອງລັດ ແລະ ປະຊາຊົນສອງປະເທດ ທີ່ຍາມໃດກໍຢູ່ຄຽງຂ້າງກັນ ພ້ອມກັນຜ່ານຜ່າທຸກສິ່ງທ້າທາຍ.
ໃນວັນດຽວກັນ, ສະຫາຍ ບຸຍແທັງເຊີນ ຮອງນາຍົກລັດຖະມົນຕີ ລັດຖະມົນຕີ ກະຊວງການຕ່າງປະເທດແຫ່ງ ສາທາລະນະລັດ ສັງຄົມນິຍົມຫວຽດນາມ ກໍໄດ້ສົ່ງສານສະແດງຄວາມເຫັນໃຈເຖິງ ສະຫາຍ ທອງສະຫວັນ ພົມວິຫານ ລັດຖະມົນຕີກະຊວງການຕ່າງປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ເຊັ່ນດຽວກັນ.
ຄໍາເຫັນ