ສະຖານທູດລາວ ທີ່ແບກແລງ ແຂ່ງຂັນກິລາຕີດອກປີກໄກ່ມິດຕະພາບ

ເມື່ອບໍ່ດົນມານີ້, ສະຖານເອກອັກຄະລັດຖະທູດ ແຫ່ງ ສປປ ລາວ ທີ່ ແບກແລງໄດ້ຮ່ວມກັບກົມອາຊີ ກະຊວງການຕ່າງປະເທດເຢຍລະມັນ ຈັດການແຂ່ງຂັນກິລາຕີດອກປີກໄກ່ມິດຕະພາບຂຶ້ນ ຢູ່ ສະໂມສອນ Sportforum Kleinmachnowທີ່ ນະຄອນຫຼວງແບກແລງສເຢຍລະມັນ ຊຶ່ງເປັນໜຶ່ງໃນກິດຈະກຳສະເຫຼີມສະຫຼອງວັນສ້າງຕັ້ງສາຍພົວພັນການທູດຄົບຮອບ 65 ປີ ແລະ 60 ປີ ການຮ່ວມມື ລະຫວ່າງ ສປປ ລາວ ແລະ ສເຢຍລະມັນ ໂດຍມີຜູ້ເຂົ້າຮ່ວມຈາກຝ່າຍລາວ ນໍາໂດຍ ທ່ານ ໄມບົວ ໄຊຍະວົງເອກອັກຄະລັດຖະທູດ ແຫ່ງ ສປປ ລາວ, ພະນັກງານສະຖານທູດ ພ້ອມດ້ວຍສະມາຊິກຄອບຄົວ, ນັກສຶກສາລາວ ແລະ ຄະນະສະມາຄົມຄົນເຊື້ອຊາດລາວ ທີ່ ແບກແລງ ຈຳນວນໜຶ່ງ ໄດ້ເຂົ້າຮ່ວມຫຼິ້ນ, ຊົມ ແລະ ເຊຍ.ຝ່າຍເຢຍລະມັນ ນໍາໂດຍ ທ່ານJan Freigang ຫົວໜ້າພະແນກອາຊີຕາເວັນອອກສຽງໃຕ້ ແລະ ອາຊຽນ ພ້ອມດ້ວຍພະນັກງານ ກະຊວງການຕ່າງປະເທດ ເຂົ້າຮ່ວມ.
 ທ່ານ ໄມບົວ ໄຊຍະວົງ ແລະ ທ່ານ Jan Freigang ໄດ້ມີຄຳເຫັນຕໍ່ການຈັດກິລາຕີດອກປີກໄກ່ມິດຕະພາບດັ່ງກ່າວໂດຍທ່ານເອກອັກຄະລັດຖະທູດ ໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືທີ່ດີມີມູນເຊື້ອມາແຕ່ດົນນານ, ການແລກປ່ຽນຢ້ຽມຢາມ, ການພົບປະສອງຝ່າຍຂອງການນໍາຂັ້ນສູງແລະ ສອງສະມາຄົມມິດຕະພາບ ລາວ-ເຢຍລະມັນ-ລາວ, ພ້ອມກັນບັ້ນ ກໍໄດ້ຕາງໜ້າໃຫ້ລັດຖະບານລາວ ສະແດງຄວາມຂອບໃຈ ຕໍ່ລັດຖະບານ ແລະ ປະຊາຊົນ ເຢຍລະມັນ ທີ່ໄດ້ໃຫ້ການຊ່ວຍເຫຼືອອັນລໍ້າຄ່າແກ່ ສປປ ລາວ ໃນຫຼາຍຂົງເຂດຂະແໜງການ ເຊັ່ນ: ການພັດທະນາຊົນນະບົດ, ກໍ່ສ້າງໂຄງລ່າງພື້ນຖານ, ອາຊີວະສຶກສາ, ອະນຸລັກສິ່ງແວດລ້ອມ, ພັດທະນາເສດຖະກິດແບບຍືນຍົງ, ສົ່ງເສີມພາກທຸລະກິດ-ເອກະຊົນ ແລະ ອື່ນໆຊຶ່ງການຊ່ວຍເຫຼືອດັ່ງກ່າວນັບແຕ່ປີ 1996 ມາເຖິງປັດຈຸບັນ ລວມມູນຄ່າຫຼາຍກວ່າ 571 ລ້ານເອີໂຣ  ແລະ ຍັງໄດ້ສະແດງຄວາມຫວັງວ່າການພົວພັນຮ່ວມມືລະຫວ່າງ ສອງປະເທດ ຈະສືບຕໍ່ຮັດແໜ້ນ ແລະ ເສີມຂະຫຍາຍໂດຍສະເພາະໃນຂະແໜງເສດຖະກິດ-ການຄ້າ, ການລົງທຶນ ແລະ ການທ່ອງທ່ຽວໃນຊຸມປີຕໍ່ໜ້າ. 
ທ່ານJan Freigang ໄດ້ສະແດງຄວາມຊົມເຊີຍ ຕໍ່ການຈັດກິດຈະກຳກິລາມິດຕະພາບສະເຫຼີມສະຫຼອງວັນສ້າງຕັ້ງສາຍພົວພັນການທູດ ລາວ-ເຢຍລະມັນຄັ້ງນີ້ ຊຶ່ງເປັນນິມິດໝາຍສໍາຄັນໃຫ້ແກ່ການຮ່ວມມືສອງຝ່າຍຕະຫຼອດໄລຍະ 65 ປີຜ່ານມາ. ການພົວພັນຮ່ວມມື ລະຫວ່າງ ສອງປະເທດເຢຍລະມັນ-ລາວ ແມ່ນຢູ່ໃນລະດັບດີເປັນຕົ້ນທາງດ້ານການເມືອງ, ການທູດ, ການພັດທະນາເສດຖະກິດ-ສັງຄົມ ທັງໃນກອບສອງຝ່າຍ ແລະ ຫຼາຍຝ່າຍ. ການຈັດກິລາມິດຕະພາບຮ່ວມກັນໃນຄັ້ງນີ້ ແມ່ນເປັນແນວຄວາມຄິດທີ່ດີ ເພື່ອສ້າງຄວາມໃກ້ຊິດ ແລະ ຄວາມເຂົ້າອົກເຂົ້າໃຈ ລະຫວ່າງ ພະນັກງານສະຖານທູດລາວ ແລະ ພະນັກງານຂອງກະຊວງການຕ່າງປະເທດເຢຍລະມັນ ໃຫ້ແໜ້ນແຟ້ນຂື້ນຕື່ມ. ພ້ອມດຽວກັນທ່ານ Jan Freigangຍັງໄດ້ຢືນຢັນຈະສືບຕໍ່ຊຸກຍູ້ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີ ກັບ ສປປ ລາວ ໃຫ້ມີໝາກຜົນຫຼາຍຂຶ້ນກວ່າເກົ່າ ບໍ່ວ່າຈະໃນກອບການຮ່ວມມືສອງຝ່າຍ ແລະ ຫຼາຍຝ່າຍ ໂດຍສະເພາະໃນຂອບອາຊຽນຊຶ່ງເຢຍລະມັນເປັນຄູ່ເຈລະຈາທີ່ສຳຄັນຂອງອາຊຽນ ແລະ ມີຄວາມຍິນດີຈະໃຫ້ການສະໜັບສະໜູນ ແລະ ຮ່ວມມືກັບ ສປປ ລາວ ໃນການເຮັດໜ້າທີ່ເປັນປະທານໝູນວຽນ ອາຊຽນ ໃນປີ 2024 ທີ່ຈະມາເຖິງນີ້ ໃຫ້ປະສົບຜົນສຳເລັດຢ່າງຈົບງາມ. 
        ພາຍຫຼັງສຳເລັດການແຂ່ງຂັນ, ທ່ານໄມບົວ ໄຊຍະວົງ ແລະ ທ່ານJan Freigang ໄດ້ມອບຂັນລາງວັນໃຫ້ແກ່ທີມກິລາ ທີ່ຊະນະເລີດການແຂ່ງຂັນ ໄດ້ທີ 1 ແລະ ທີ 2 ແລະ ຫຼັງຈາກນັ້ນທັງສອງຝ່າຍ ໄດ້ເຂົ້າຮ່ວມພາເຂົ້າສາມັກຄີເພື່ອຊົມເຊີຍຜົນສຳເລັດ ແລະ ວັນທີ່ມີຄວາມໝາຍສຳຄັນ ຂອງສອງປະເທດຄັ້ງນີ້ດ້ວຍບັນຍາກາດແຫ່ງມິດຕະພາບ ແລະ ຄວາມເຂົ້າອົກເຂົ້າໃຈ ຊຶ່ງກັນແລະກັນ. 
ຂ່າວ-ພາບ: ກະຊວງການຕ່າງປະເທດ